ইছলামাবাদ, ০৩ জুলাই (হি.স.)। পাকিস্তানৰ বেলুচিস্তান প্ৰদেশৰ কুৱেটাৰ পৰা পেছাৱৰলৈ যোৱা এখন বাছ আজি ঝোব আৰু ডেৰা ইছমাইল খানৰ মাজৰ ডানা ছাৰ অঞ্চলৰ গভীৰ খাৱৈত পৰি যায়। এই দুৰ্ঘটনাত কমেও ৪০ জন লোক নিহত হোৱাৰ লগতে ৮ জন লোক আহত হয়। বিষয়াসকলৰ মতে, অঞ্চলটোত যোৱা কিছু বছৰত এইটোৱেই হৈছে আটাইতকৈ মাৰাত্মক পথ দুৰ্ঘটনা। বেলুচিস্তানৰ মুখ্যমন্ত্ৰীৰ মুখপাত্ৰ শ্বাহিদ ৰিন্দে এই দুৰ্ঘটনা নিশ্চিত কৰিছে।

জিঅ’ নিউজ আৰু দুনিয়া নিউজৰ খবৰ অনুসৰি বেলুচিস্তানৰ মুখ্যমন্ত্ৰীৰ মুখপাত্ৰ ৰিণ্ডে কয় যে জিলাৰ বিষয়া, উদ্ধাৰ সংস্থা, আৰু অন্যান্য সংশ্লিষ্ট বিভাগসমূহে উদ্ধাৰ অভিযানত নিয়োজিত হৈ আছে। জিলা উপায়ুক্ত শ্বেৰানী ৱালি কাকৰে জনোৱা মতে, ঠেক ভূখণ্ডৰ বাবে উদ্ধাৰকাৰী দলসমূহে দুৰ্ঘটনাস্থলীত উপস্থিত হোৱাত অসুবিধাৰ সন্মুখীন হয়। স্বাস্থ্য বিষয়াসকলে জনোৱা মতে, বেলুচিস্তানৰ ওচৰৰ চিকিৎসালয়সমূহত জৰুৰীকালীন অৱস্থা ঘোষণা কৰা হৈছে।

বিষয়াসকলে জনোৱা মতে, বাছখনৰ ব্ৰেক বিকল হোৱাৰ সন্দেহ কৰা হৈছে। মৃতসকলৰ ভিতৰত মহিলা আৰু শিশুও আছে। আহতসকলক চিকিৎসাৰ বাবে জিলা সদৰ চিকিৎসালয়লৈ প্ৰেৰণ কৰা হৈছে। ৰিণ্ডে কয় যে উদ্ধাৰ অভিযানৰ বাবে বেলুচিস্তান আৰু খাইবাৰ পখতুনখোৱাৰ দল মোতায়েন কৰা হৈছে। প্ৰাথমিক তথ্য অনুসৰি বাছখনে নিজৰ ক্ষমতাতকৈ অধিক যাত্ৰী কঢ়িয়াই লৈ ফুৰিছিল। ৰিণ্ডৰ মতে, মৃত লোকজনক চিনাক্ত কৰাৰ প্ৰচেষ্টা অব্যাহত আছে। এই মৰ্মান্তিক ঘটনা সন্দৰ্ভত সবিশেষ তদন্তৰ অন্তত প্ৰকাশ কৰা হ’ব।

ৰাষ্ট্ৰপতি আছিফ আলী জাৰ্দাৰীয়ে দুৰ্ঘটনাটোক লৈ শোক প্ৰকাশ কৰি আহতসকলক সম্ভৱপৰ উত্তম চিকিৎসা সেৱা আগবঢ়াবলৈ সংশ্লিষ্ট কৰ্তৃপক্ষক নিৰ্দেশ দিয়ে। তেওঁ কয় যে সমগ্ৰ ৰাষ্ট্ৰই নিহতসকলৰ পৰিয়ালৰ সৈতে থিয় দিছে।

-----------

হিন্দুস্থান সমাচাৰ / অৰৱিন্দ