নতুন দিল্লী, ০৩ জুলাই (হি.স.)। অহা ৪ জুলাই শনিবাৰে ৰাজস্থান আৰু গুজৰাট ভ্ৰমণ কৰিব প্ৰধানমন্ত্ৰী নৰেন্দ্ৰ মোডীয়ে । ৰাজস্থানৰ যোধপুৰ আৰু বালোত্ৰা আৰু গুজৰাটৰ সানন্দত কেইবাটাও গুৰুত্বপূৰ্ণ উন্নয়নমূলক প্ৰকল্পৰ উদ্বোধন আৰু আধাৰশিলা স্থাপন কৰিব। ৰাজস্থানত প্ৰায় ১.০৬ লাখ কোটি টকাৰ উন্নয়নমূলক প্ৰকল্প উন্মোচন কৰা হ’ব, আনহাতে গুজৰাটত দেশৰ অৰ্ধপৰিবাহী নিৰ্মাণ ক্ষমতাক শক্তিশালী কৰিব পৰা চিজি ছেমিৰ অ’এছএটি ইউনিট উদ্বোধন কৰা হ’ব। এই উপলক্ষে তেওঁ এখন ৰাজহুৱা সভাতো ভাষণ দিব।

প্রধানমন্ত্রীৰ কার্যালয়ৰ তথ্য অনুসৰি প্রধানমন্ত্রীয়ে পুৱা প্রায় ১০:৪৫ বজাত যোধপুৰত ৪৮০ কোটি টকা ব্যয় সাপেক্ষে নির্মিত নতুন বিমানবন্দৰ টার্মিনেল ভৱনটো উদ্বোধন কৰিব ৷ ২৩ হাজাৰ বৰ্গমিটাৰতকৈ অধিক এলেকাত বিস্তৃত এই টাৰ্মিনেলটোৱে বছৰি ২০ লাখ যাত্ৰীক চম্ভালিব পাৰে। একেটা অনুষ্ঠানতে তেওঁ সংশোধিত উড়ান আঁচনিও উন্মোচন কৰিব। এই আঁচনিৰ অধীনত অহা দহ বছৰৰ বাবে ২৮,৮৪০ কোটি টকাৰ ব্যৱস্থাৰে ১০০টা নতুন বিমানবন্দৰ গঢ়ি তোলা হ’ব, ২০০টা আধুনিক হেলিপেড নিৰ্মাণ কৰা হ’ব আৰু আঞ্চলিক বিমান সেৱাৰ প্ৰসাৰ কৰা হ’ব।

ইয়াৰ পিছত প্ৰধানমন্ত্ৰীয়ে বালোতৰাত প্ৰায় ১.০৬ লাখ কোটি টকাৰ বিভিন্ন প্ৰকল্পৰ উদ্বোধন আৰু আধাৰশিলা স্থাপন কৰিব। ইয়াৰ ভিতৰত আটাইতকৈ বিশিষ্ট হৈছে দেশৰ প্ৰথমটো গ্ৰীণফিল্ড সংহত শোধনাগাৰ-সহ-পেট্ৰ’কেমিকেল প্ৰকল্প, যিটো ₹৭৯,৪৫০ কোটিতকৈ অধিক ব্যয়ৰে বিকশিত কৰা হৈছে, যিটো পাচপাদ্ৰাত ৰাষ্ট্ৰৰ বাবে উৎসৰ্গা কৰা হ’ব। ৯ এমএমটিপিএ ক্ষমতাসম্পন্ন এই প্ৰকল্পই দেশৰ শক্তি সুৰক্ষা, পেট্ৰ’কেমিকেল আত্মনিৰ্ভৰশীলতা, আৰু ঔদ্যোগিক উন্নয়নত নতুন গতি প্ৰদান কৰিব।

প্ৰধানমন্ত্ৰীয়ে জয়পুৰ মেট্ৰ’ ৰে’ল প্ৰকল্পৰ দ্বিতীয় পৰ্যায়ৰ আধাৰশিলাও স্থাপন কৰিব। ১৩,০০০ কোটি টকাৰো অধিক ব্যয় সাপেক্ষে এই প্ৰকল্পই ৩৬টা ষ্টেচনৰ সৈতে ৪১ কিলোমিটাৰ দৈৰ্ঘ্যৰ উত্তৰ-দক্ষিণ মেট্ৰ’ কৰিডৰ গঢ়ি তুলিব। ইয়াৰ দ্বাৰা জয়পুৰৰ উদ্যোগিক আৰু আৱাসিক এলেকাৰ মাজত ৰাজহুৱা পৰিবহণ ব্যৱস্থা আৰু অধিক শক্তিশালী হ’ব। প্ৰথম পৰ্যায়ৰ অধীনত ১১.৬৪ কিলোমিটাৰ দৈৰ্ঘ্যৰ মেট্ৰ’ কৰিড’ৰ ১১টা ষ্টেচনৰ সৈতে ইতিমধ্যে কাৰ্যক্ষম হৈ উঠিছে।

ইয়াৰ উপৰিও প্ৰধানমন্ত্ৰীয়ে চুৰু-সাদুলপুৰ আৰু চুৰু-ৰাতংগৰ ৰে’ল ডাবলিং প্ৰকল্প, যোধপুৰ ৰিং ৰোডৰ চাৰিলেন অংশ, বিকানেৰৰ ১০০০ মেগাৱাট আৰু ৩০০ মেগাৱাট সৌৰশক্তি প্ৰকল্প, ৰাজস্থান নবীকৰণযোগ্য শক্তি খণ্ডৰ সৈতে জড়িত শক্তি সঞ্চাৰণ প্ৰকল্পৰ উদ্বোধন আৰু আধাৰশিলা স্থাপন কৰিব। এই উপলক্ষে ৰাজস্থান চৰকাৰৰ বিভিন্ন বিভাগৰ বাবে নিৰ্বাচিত প্ৰায় ৫৪ হাজাৰ যুৱক-যুৱতীকো নিযুক্তি পত্ৰ প্ৰদান কৰা হ’ব।

সন্ধিয়া প্ৰধানমন্ত্ৰীয়ে গুজৰাটৰ ছানন্দত উপস্থিত হৈ চিজি ছেমিৰ আউটচ’ৰ্চড ছেমিকণ্ডাক্টৰ এছেম্বলি এণ্ড টেষ্ট (অ’এছএটি) সুবিধা উদ্বোধন কৰিব। ₹৭,৫০০ কোটিতকৈ অধিক বিনিয়োগেৰে বিকশিত এই উদ্যোগটো ভাৰত অৰ্ধপৰিবাহী অভিযানৰ অধীনত অনুমোদিত প্ৰথম চাৰিটা প্ৰকল্পৰ ভিতৰত অন্যতম। সম্পূৰ্ণ ক্ষমতা লাভ কৰাৰ লগে লগে এই উদ্যোগটোৱে বছৰি ৫ বিলিয়ন পৰ্যন্ত অৰ্ধপৰিবাহী চিপ উৎপাদন কৰিব পাৰিব আৰু ই অটোম’বাইল, টেলিকমিউনিকেচন, ৫জি, ঔদ্যোগিক, আৰু ইণ্টাৰনেট অৱ থিংছ খণ্ডৰ প্ৰয়োজনীয়তা পূৰণ কৰিব।

হিন্দুস্থান সমাচাৰ / মনোজ কুমাৰ শইকীয়া