–বিৰোধীৰ হুলস্থুলৰ মাজতে দুয়োটা সদন দুপৰীয়া ২ বজালৈ স্থগিত

নতুন দিল্লী, ২৭ জুলাই (হি.স.)। বিৰোধী সাংসদসকলৰ হুলস্থুল আৰু শ্লোগানৰ মাজতে সোমবাৰে কেন্দ্ৰীয় চৰকাৰে লোকসভাত উত্থাপন কৰে ৰাজহুৱা পৰীক্ষা (অন্যায় উপায় প্ৰতিৰোধ) সংশোধনী বিধেয়ক, ২০২৬। কেন্দ্ৰীয় মন্ত্ৰী ড° জিতেন্দ্ৰ সিঙে সদনত উত্থাপন কৰে বিধেয়কখন। অব্যাহত থকা বিৰোধিতা আৰু হুলস্থুলৰ বাবে লোকসভাৰ অধ্যক্ষ ওম বিৰলাই দুপৰীয়া ২ বজালৈ সদন স্থগিত ৰাখে। ৰাজ্যসভাও একে সময়লৈ স্থগিত ৰখা হৈছিল।

পুৱা ১১ বজাত দুয়োটা সদনৰ কাৰ্য্যবিধি পুনৰ আৰম্ভ হোৱাৰ লগে লগে বিৰোধী সাংসদসকলে বিভিন্ন বিষয়ত শ্লোগান দিবলৈ আৰম্ভ কৰে। অব্যাহত থকা হুলস্থুলৰ বাবেই প্ৰথমে লোকসভা আৰু ৰাজ্যসভা দুয়োটাৰে কাৰ্য্যবিধি দিনৰ ১২ বজালৈ স্থগিত ৰখা হয়। আনকি যেতিয়া ১২ বজাত পুনৰ কাৰ্য্যবিধি আৰম্ভ হৈছিল, তেতিয়াও এই অচলাৱস্থা অব্যাহত আছিল, যাৰ ফলত দুয়োটা সদন দুপৰীয়া ২ বজালৈ স্থগিত ৰখা হৈছিল।

২০২৪ চনৰ আইন সংশোধনৰ বাবে চৰকাৰে উত্থাপন কৰিছে এই বিধেয়কখন। প্ৰস্তাৱিত সংশোধনীত কাগজ ফাদিলৰ অভিযোগত অভিযুক্তসকলৰ বাবে অধিক কঠোৰ শাস্তি আৰু গধুৰ জৰিমনা বিহাৰ ব্যৱস্থা কৰা হৈছে। ইয়াৰ উপৰিও ৰাজ্য চৰকাৰ আৰু কেন্দ্ৰীয় শাসিত অঞ্চলসমূহক বিশেষ ফাষ্ট ট্ৰেক আদালত স্থাপনৰ ক্ষমতা প্ৰদান কৰা হৈছে, য’ত এনে গোচৰৰ শুনানি দৈনিক কৰা হ’ব। কেন্দ্ৰীয় চৰকাৰ আৰু ইয়াৰ সংস্থাসমূহে অনুষ্ঠিত কৰা ৰাজহুৱা পৰীক্ষাৰ ক্ষেত্ৰত এই আইন প্ৰযোজ্য হ’ব। ইয়াৰ পৰিসৰৰ ভিতৰত থাকিব কেন্দ্ৰীয় লোকসেৱা আয়োগ (ইউপিএছচি), কৰ্মচাৰী নিৰ্বাচন আয়োগ (এছএছচি), ৰেলৱে নিযুক্তি, বেংকিং নিযুক্তি পৰীক্ষা, ৰাষ্ট্ৰীয় পৰীক্ষণ সংস্থা (এনটিএ), আৰু অন্যান্য কেন্দ্ৰীয় নিযুক্তি আৰু প্ৰৱেশ পৰীক্ষা।

চৰকাৰে কয় যে এই সংশোধনী নীট কাগজ ফাদিল বিতৰ্ক আৰু তাৰ পিছত সমগ্ৰ দেশত ছাত্ৰ-ছাত্ৰীৰ প্ৰতিবাদৰ পোহৰত অনা হৈছে। প্ৰধানমন্ত্ৰী নৰেন্দ্ৰ মোদীয়ে ২৩ জুলাইত এই আইনখন অধিক কটকটীয়া কৰাৰ কথা ঘোষণা কৰে। ইয়াৰ পাছতে ইনফ’ছিছৰ সহ-প্ৰতিষ্ঠাপক নন্দন নিলেকানীৰ নেতৃত্বত এটা উচ্চ পৰ্যায়ৰ টাস্ক ফ’ৰ্চো পৰীক্ষা ব্যৱস্থাৰ সংস্কাৰৰ বাবে ঘোষণা কৰা হয়।

ইফালে, পদত্যাগ কৰাৰ পিছত প্ৰথমবাৰৰ বাবে সংসদত প্ৰৱেশ কৰে প্ৰাক্তন কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে। নেশ্যনেল ডেম’ক্ৰেটিক এলায়েন্সৰ সাংসদসকলে তেওঁক চাদৰ আৰু মিথিলা পাগুৰিৰে আদৰণি জনাই সংসদ ভৱনৰ ভিতৰলৈ লৈ যায়। এই সময়ত সাংসদসকলে ধৰ্মেন্দ্ৰ প্ৰধান জিন্দাবাদৰ শ্লোগানও উত্থাপন কৰে। নীট প্ৰশ্ন কাকত ফাদিলৰ বিতৰ্কৰ মাজতে ২৫ জুলাইত পদৰ পৰা পদত্যাগ কৰিছিল ধৰ্মেন্দ্ৰ প্ৰধানে।

উল্লেখযোগ্য যে ২০২৬ চনৰ ৩ মে’ত অনুষ্ঠিত হোৱা এনইইটি-ইউজি পৰীক্ষাৰ প্ৰশ্নকাকত ফাদিল হোৱাৰ পিছত বাতিল কৰি পুনৰ সময় নিৰ্ধাৰণ কৰিবলগীয়া হৈছিল। এই বিষয়টোক লৈ সমগ্ৰ দেশতে প্ৰতিবাদৰ সূত্ৰপাত হয়। কেন্দ্ৰীয় তদন্তকাৰী ব্যুৰো (চিবিআই)ৰ তদন্ত অব্যাহত আছে। এতিয়ালৈকে ১৩ জন অভিযুক্তক গ্ৰেপ্তাৰ কৰা হৈছে, আৰু সংস্থাটোৱে অতি সোনকালে অভিযোগনামা দাখিল কৰাৰ সম্ভাৱনা আছে।

--------------

হিন্দুস্থান সমাচাৰ / অৰৱিন্দ