ধুবুৰী, ২৫ জুলাই (হি.স.)। ধুবুৰী জিলাৰ বিলাসীপাৰাত বাল্য বিবাহ কৰাৰ অভিযোগত বাতিল হৈছে গুটিপাৰা গাওঁ পঞ্চায়তৰ এগৰাকী নিৰ্বাচিত প্ৰতিনিধিৰ পদ । ধুবুৰী জিলা আয়ুক্তই খাৰিজ কৰিলে প্ৰতিনিধি গৰাকীৰ পদ । এই ঘটনাই পঞ্চায়ত খনৰ ভিতৰত চ'ৰাত তীব্ৰ চাঞ্চল্যৰ সৃষ্টি কৰিছে ।
উল্লেখ্য যে, বিলাসীপাৰা সমজিলাৰ অন্তৰ্গত ২৫ নং গুটিপাৰা গাওঁ পঞ্চায়তৰ নিৰ্বাচিত সদস্যা তথা পঞ্চায়ত খনৰ উপ সভানেত্ৰী ৰেজিনা খাতুনৰ হৈছিল বাল্য বিবাহ । পঞ্চায়ত খনৰ ৭ নং ৱাৰ্ডৰ পৰা আলী আজগৰৰ পত্নী ৰেজিনা খাতুনে নিৰ্বাচনী শপতনামাত ভুৱা তথ্য দাখিল কৰি পাৰ হৈছিল নিৰ্বাচনী বৈতৰণী । তথ্য মতে ১৬ জানুৱাৰী ২০০৩ চনত জন্ম হোৱা ৰেজিনা খাতুনে প্ৰথম সন্তানৰ জন্ম দিয়াৰ সময়ত বয়স হৈছিল ১৭ বছৰ ৫ মাহ ৬ দিন । ইয়াৰ বিৰুদ্ধে অভিযোগকাৰীয়ে ধুবুৰী জিলা নিৰ্বাচনী বিষয়াৰ ওচৰত দাখিল কৰিছিল অভিযোগ ।
অভিযোগৰ ভিত্তিত তদন্তকাৰী বিষয়া এ হালৈৰ তদন্তৰ প্ৰতিবেদনত ৰেজিনা খাতুনৰ বাল্য বিবাহ হোৱাটো নিশ্চিত কৰে । যাৰ বাবে জিলা নিৰ্বাচনী বিষয়াই অসম পঞ্চায়ত আইন উলংঘন কৰাৰ অপৰাধত DDP-38/2025/P, Date 23/7/26 নং চিঠি যোগে খাৰিজ কৰে ৰেজিনা খাতুনৰ প্ৰতিনিধিৰ পদ ।
এই ঘটনাই অঞ্চলটোত তীব্ৰ খলকনিৰ সৃষ্টি কৰিছে ।
---------------
হিন্দুস্থান সমাচাৰ / প্ৰকাশ ডেকা
26 Jul 2026
