নতুন দিল্লী, ২৪ জুলাই (হি.স.)। নীট প্ৰশ্নকাকত ফাদিল সমস্যাক লৈ ২৬ দিনীয়া অনিৰ্দিষ্টকালীন অনশনৰ অন্ত পেলাইছে সমাজ কৰ্মী সোণম ৱাংচুকে। কেন্দ্ৰীয় স্বাস্থ্যমন্ত্ৰী জে পি নড্ডা আৰু পাৰমাণৱিক শক্তি বিভাগ আৰু মহাকাশ বিভাগৰ ৰাজ্যিক মন্ত্ৰী ড০ জিতেন্দ্ৰ সিঙৰ সৈতে দীঘলীয়া আলোচনাৰ অন্তত এই সিদ্ধান্ত লোৱা হৈছে। ইয়াৰ পূৰ্বে প্ৰধানমন্ত্ৰী নৰেন্দ্ৰ মোদীয়ে ভিডিঅ’ বাৰ্তা প্ৰেৰণ কৰি প্ৰশ্নকাকত ফাদিলৰ বাবে দায়ীসকলৰ বিৰুদ্ধে কঠোৰ ব্যৱস্থা গ্ৰহণ আৰু বিষয়টো সন্দৰ্ভত কেবিনেট পৰ্যায়ৰ বৃহৎ সিদ্ধান্ত লোৱাৰ প্ৰতিশ্ৰুতি দিছিল।

অনশন শেষ হোৱাৰ পিছত সোণম ৱাংচুকে কয় যে এই সিদ্ধান্ত বিস্তৃত আলোচনাৰ অন্তত আৰু দেশত কোনো প্ৰকাৰৰ হিংসাৰ সম্ভাৱনাক ধ্যান দি লোৱা হৈছে। তেওঁ লগতে কয় যে বিভিন্ন ৰাজনৈতিক দলৰ প্ৰায় ৬৫ জন সাংসদেও তেওঁৰ সৈতে সাক্ষাৎ কৰিছিল বা তেওঁক লিখিছিল, তেওঁৰ অনশন শেষ কৰিবলৈ অনুৰোধ জনাইছিল। ৱাংচুকে কয় যে তেওঁৰ সিদ্ধান্তৰ অন্তৰ্নিহিত কিছুমান চৰ্ত আছে, যিবোৰ তেওঁ অতি সোনকালে এটা পৃথক ভিডিঅ’ৰ জৰিয়তে শ্বেয়াৰ কৰিব। লগতে তেওঁৰ সমৰ্থকসকলক শান্তিপূৰ্ণভাৱে প্ৰতিবাদ অব্যাহত ৰাখিবলৈ আৰু কোনো ধৰণৰ হিংসাৰ পৰা বিৰত থাকিবলৈ আহ্বান জনায়।

এই সময়ছোৱাত জে পি নড্ডা আৰু ডাঃ জিতেন্দ্ৰ সিঙে ছফদৰজং হাস্পতালত সোণম ৱাংচুকক লগ পোৱাৰ ভিডিঅ’ও পোহৰলৈ আহিছে। সূত্ৰৰ পৰা জানিব পৰা মতে, চৰকাৰ আৰু প্ৰতিবাদকাৰীৰ মাজত কেইবাবাৰো আলোচনাৰ অন্তত কেইবাটাও গুৰুত্বপূৰ্ণ বিষয়ত একমতত উপনীত হয়। প্ৰতিবাদত জড়িত লোকসকলৰ বিৰুদ্ধে কোনো ধৰণৰ শাস্তিমূলক ব্যৱস্থা গ্ৰহণ নকৰাৰ আশ্বাস চৰকাৰে দিয়াটোৱেও অনশন অন্ত পেলোৱাত গুৰুত্বপূৰ্ণ ভূমিকা পালন কৰিছিল।

শিক্ষা ব্যৱস্থাত জবাবদিহিতা আৰু প্ৰতিযোগিতামূলক পৰীক্ষাত প্ৰশ্নকাকত ফাদিল হোৱাৰ অভিযোগ উত্থাপন কৰা ছাত্ৰ-ছাত্ৰী আৰু যুৱক-যুৱতীসকলৰ সমৰ্থনত সোণম ৱাংচুকে ২৮ জুনৰ পৰা অনিৰ্দিষ্টকালীন অনশন কাৰ্যসূচী আৰম্ভ কৰিছিল। তেওঁৰ মূল দাবীসমূহৰ ভিতৰত আছিল পৰীক্ষা ব্যৱস্থাত স্বচ্ছতা নিশ্চিত কৰা, দোষীৰ বিৰুদ্ধে কঠোৰ ব্যৱস্থা গ্ৰহণ কৰা, ভৱিষ্যতে প্ৰশ্নকাকত ফাদিল হোৱা ৰোধৰ বাবে ফলপ্ৰসূ ব্যৱস্থা ৰূপায়ণ কৰা।

১৮ জুলাইত অবিৰত অনশনৰ বাবে তেওঁৰ স্বাস্থ্যৰ অৱনতি ঘটে। চিকিৎসকৰ পৰামৰ্শ আৰু আদালতৰ নিৰ্দেশত দিল্লী আৰক্ষীয়ে তেওঁক চিকিৎসাৰ বাবে ছফদৰজং হাস্পতালত ভৰ্তি কৰে।

প্ৰধানমন্ত্ৰী নৰেন্দ্ৰ মোদীয়ে ভিডিঅ’ বাৰ্তা আৰু ছ’চিয়েল মিডিয়া প্লেটফৰ্মত পোষ্ট কৰি কয় যে “কাইলৈৰ কেবিনেট বৈঠকত প্ৰশ্নকাকত ফাদিলৰ বিৰুদ্ধে অধিক কঠোৰ ব্যৱস্থা গ্ৰহণ কৰা হ’ব”। প্ৰধানমন্ত্ৰীৰ এই আশ্বাসে প্ৰতিবাদৰ সমাধানৰ দিশত এক ইতিবাচক পৰিৱেশৰ সৃষ্টি কৰিলে আৰু যোৱা নিশা সন্ধিয়া সোণম ৱাংচুকে নিজৰ উপবাসৰ অন্ত পৰাৰ কথা ঘোষণা কৰে।

হিন্দুস্থান সমাচাৰ / মনোজ কুমাৰ শইকীয়া