ৱাশ্বিংটন, ২৪ জুলাই (হি.স.)। আমেৰিকাই ভাৰতৰ পৰা আমদানি কৰা সামগ্ৰীৰ ওপৰত ১০ শতাংশ অতিৰিক্ত আমদানি শুল্ক (টেৰিফ) ঘোষণা কৰিছে। শুকুৰবাৰৰ পৰা কাৰ্যকৰী হ’ল এই সিদ্ধান্ত। ৰাষ্ট্ৰপতি ড’নাল্ড ট্ৰাম্পৰ নিৰ্দেশ অনুসৰি আমেৰিকাৰ বাণিজ্য প্ৰতিনিধিয়ে বলপূৰ্বক শ্ৰমেৰে নিৰ্মিত সামগ্ৰী আমদানি কৰাৰ বাবে ভাৰতকে ধৰি ৬০খন দেশৰ বিৰুদ্ধে এই ব্যৱস্থা গ্ৰহণ কৰিছে। এই দেশসমূহৰ ওপৰত ১০ৰ পৰা ১২.৫ শতাংশলৈকে অতিৰিক্ত আমদানি শুল্ক আৰোপ কৰা হৈছে।
ৱাশ্বিংটন পোষ্টৰ প্ৰতিবেদন অনুসৰি ভাৰতকে ধৰি ১৭খন দেশৰ ওপৰত ১০ শতাংশ অতিৰিক্ত শুল্ক আৰোপ কৰা হৈছে আৰু ৪৩খন দেশৰ ওপৰত ১২.৫ শতাংশ অতিৰিক্ত শুল্ক আৰোপ কৰা হৈছে। ১৯৭৪ চনৰ বাণিজ্য আইন ৩০১ নং ধাৰাত আমেৰিকাই এই ব্যৱস্থা গ্ৰহণ কৰিছে। বৃহস্পতিবাৰ-শুকুৰবাৰে পুৱা ১২:০১ বজাৰ পৰা নতুন অতিৰিক্ত আমদানি শুল্ক কাৰ্যকৰী হয়।
আমেৰিকাৰ সংবাদ মাধ্যমৰ বাতৰি অনুসৰি আৰ্জেণ্টিনা, বাংলাদেশ, ব্ৰিটেইন, কম্বোডিয়া, কানাডা, ইকুৱেডৰ, এল ছালভাডৰ, গুৱেটামালা, হণ্ডুৰাছ, ভাৰত, ইণ্ডোনেছিয়া, জৰ্ডান, মালয়েছিয়া, মেক্সিকো, পাকিস্তান, শ্ৰীলংকা, আৰু ট্ৰিনিদাদ আৰু ট’বাগোত অতিৰিক্ত ১০ শতাংশ আমদানি শুল্ক আৰোপ কৰা হৈছে। ইউৰোপীয় সংঘ, টাইৱান, জাপান, দক্ষিণ কোৰিয়া আৰু ছুইজাৰলেণ্ডক এনে শুল্কৰ হাৰ নিৰ্ধাৰণ কৰিছে, যিটো বৰ্তমানৰ অতি অনুকূল দেশৰ শুল্কৰ সৈতে মিলিলে মুঠ ১০ শতাংশ বা ১২.৫ শতাংশ শুল্ক হ’ব। বাকী ৩৮খন দেশত ১২.৫ শতাংশ শুল্ক আৰোপ কৰা হৈছে, য’ত চীনকে ধৰি আমেৰিকাই উইগুৰ সংখ্যালঘুসকলক ৱৰ্ক কেম্পত আটক কৰাৰ অভিযোগ উত্থাপন কৰিছে, যিটো পদক্ষেপ বেইজিঙে অস্বীকাৰ কৰিছে। এনে সময়তে আমেৰিকাৰ এই পদক্ষেপ লোৱা হৈছে যেতিয়া অস্থায়ী ১০ শতাংশ বিশ্বব্যাপী শুল্কৰো ম্যাদ উকলি গৈছে।
আমেৰিকাৰ বাণিজ্য প্ৰতিনিধি জেমছন গ্ৰীৰে কয় যে আমেৰিকাই প্ৰায় এশ বছৰ ধৰি বলপূৰ্বক শ্ৰমৰ সৈতে জড়িত সামগ্ৰীৰ আমদানি নিষিদ্ধ কৰি ৰাখিছে আৰু এতিয়া ৱাশ্বিংটনে আশা কৰিছে যে ইয়াৰ বাণিজ্যিক অংশীদাৰসকলেও একেধৰণৰ পদক্ষেপ ল’ব। এই কাৰ্য্যই হৈছে মানৱ অধিকাৰ উলংঘা আৰু অন্যায় বাণিজ্যিক পদ্ধতি ৰোধৰ দিশত প্ৰথম পদক্ষেপ।
এই পদক্ষেপ ট্ৰাম্প প্ৰশাসনৰ বাণিজ্য নীতিৰ অংশ, যাৰ অধীনত আমেৰিকাই বিশ্বজুৰি আমদানি শুল্ক বৃদ্ধি কৰাৰ পৰিকল্পনা কৰিছিল। ইয়াৰ পূৰ্বে ট্ৰাম্পৰ “পাৰস্পৰিক আমদানি শুল্ক” আদেশ আমেৰিকাৰ উচ্চতম ন্যায়ালয়ে বাতিল কৰিছিল, তাৰ পিছত ট্ৰাম্প প্ৰশাসনে ১৯৭৪ চনৰ বাণিজ্য আইন ৩০১ নং ধাৰাত নতুন শুল্ক আৰোপ কৰিছিল।
ইফালে কেইবাখনো দেশে নতুন শুল্কক লৈ প্ৰতিবাদ সাব্যস্ত কৰিছে। নৰৱেৰ বৈদেশিক মন্ত্ৰী এছপেন বাৰ্থ আইডে কয় যে এই শুল্কৰ কোনো ভিত্তি নাই কাৰণ ইতিমধ্যে তেওঁলোকৰ হাতত বলপূৰ্বক শ্ৰমৰ দ্বাৰা নিৰ্মিত সামগ্ৰীৰ ব্যৱসায় ৰোধ কৰাৰ লক্ষ্যৰে স্পষ্ট নিয়ম আছে। অষ্ট্ৰেলিয়া আৰু ব্ৰাজিলে নতুন শুল্কক অন্যায় বুলি অভিহিত কৰি কয় যে তেওঁলোকে এই শুল্ক আঁতৰাবলৈ বিচাৰিব।
আমেৰিকাৰ বাণিজ্য মন্ত্ৰী ডমিনিক লেব্লাংকে কানাডাত কয় যে তেওঁলোকে অনাগত সপ্তাহকেইটাত এই বিষয় আৰু অন্যান্য বাকী থকা বিষয়সমূহৰ ওপৰত আমেৰিকাৰ সৈতে গঠনমূলকভাৱে যোগাযোগ কৰি যাব, যাৰ ফলত আমাৰ নাগৰিকসকলৰ সুবিধা নিশ্চিত হ’ব।
মেছাচুচেটছৰ ডেম’ক্ৰেটিক গৱৰ্ণৰ মৌৰা হিলীয়ে এক বিবৃতিত এই শুল্কক সমালোচনা কৰি কয় যে ইয়াৰ ফলত খৰচ বৃদ্ধি পাব আৰু ব্যৱসায়ত নেতিবাচক প্ৰভাৱ পৰিব।
ইফালে, ট্ৰাম্প প্ৰশাসনে যুক্তি আগবঢ়ায় যে যিবোৰ দেশে বলপূৰ্বক শ্ৰমেৰে নিৰ্মিত সামগ্ৰীৰ ওপৰত কঠোৰ ব্যৱস্থা গ্ৰহণ নকৰে, সেইবোৰ দেশৰ লাভ হয়, যাৰ ফলত আমেৰিকাৰ কোম্পানীসমূহৰ ক্ষতি হয়। নতুন শুল্কসমূহে বিশ্বৰ যোগান শৃংখলত শ্ৰমিকৰ অধিকাৰ সুৰক্ষিত কৰাত সহায় কৰিব। অৱশ্যে সমালোচকসকলে কয় যে এই শুল্কে আমদানি অধিক ব্যয়বহুল কৰি তুলিব পাৰে আৰু অতিৰিক্ত খৰচৰ জৰিয়তে আমেৰিকাৰ গ্ৰাহকসকলকো প্ৰভাৱিত কৰিব পাৰে।
হিন্দুস্থান সমাচাৰ / মনোজ কুমাৰ শইকীয়া
