নতুন দিল্লী, ২৩ জুলাই (হি.স.)। যন্তৰ মন্তৰত প্ৰতিবাদৰ সময়ত বুধবাৰে নিশা পৰিস্থিতি পুনৰ নিয়ন্ত্ৰণৰ বাহিৰলৈ যায়। টলষ্টয় মাৰ্গ আৰু পাৰ্লিয়ামেণ্ট মাৰ্গৰ মাজত প্ৰতিবাদকাৰী আৰু আৰক্ষীৰ মাজত তীব্ৰ সংঘৰ্ষৰ সূত্ৰপাত হয় । আৰক্ষীৰ অভিযোগ যে প্ৰতিবাদকাৰীসকলে হঠাতে নিৰাপত্তা বাহিনীক শিল আৰু বটলেৰে আঘাত কৰিবলৈ আৰম্ভ কৰে। এই হিংসাত্মক ঘটনাত দুজন এচিপি আৰু দুজন পৰিদৰ্শককে ধৰি প্ৰায় এক ডজন আৰক্ষী বিষয়া আৰু ৰেপিড একচন ফৰ্চৰ জোৱান আহত হয়। লগে লগে আহতসকলক ওচৰৰ চিকিৎসালয়ত ভৰ্তি কৰোৱা হয়। আৰক্ষীয়ে দাবী কৰা মতে, প্ৰতিবাদকাৰীয়ে পথত খুকুৰি দেখুৱাইছিল ।

আৰক্ষীৰ মতে, নিশা প্ৰায় ৮:৩০ বজাৰ পৰা আৰম্ভ হয় হিংসাত্মক ঘটনা। আইন-শৃংখলা বজাই ৰাখিবলৈ টলষ্টয় মাৰ্গত আৰক্ষী আৰু নিৰাপত্তাৰক্ষী মোতায়েন কৰা হৈছিল। ইফালে প্ৰতিবাদকাৰীৰ দল উপস্থিত হৈ হঠাতে নিৰাপত্তাৰক্ষীক শিলগুটি নিক্ষেপ কৰিবলৈ আৰম্ভ কৰে। আৰক্ষীয়ে দাবী কৰিছে যে প্ৰতিবাদকাৰীসকলৰ একাংশই তৰোৱাল, খুকুৰি, লাঠি, শিল আদিৰে সজ্জিত আছিল। এইবোৰৰ সহায়ত নিৰাপত্তা বাহিনীক আক্ৰমণ কৰা হৈছিল।

পৰিস্থিতি তীব্ৰতৰ হোৱাৰ লগে লগে আৰক্ষী আৰু নিৰাপত্তা বাহিনীয়ে দায়িত্ব ল’লে। অতিৰিক্ত আৰক্ষী বাহিনীক মাতি অনা হয়। নিৰাপত্তা বাহিনীয়ে লাঠী চালনাৰ সহায়ত ৰাইজক ছত্ৰভংগ দিয়াৰ লগতে পৰিস্থিতি নিয়ন্ত্ৰণৰ বাবে কন্দুৱা গেছৰ গোলাও নিক্ষেপ কৰে। প্ৰতিৰোধমূলক কাৰ্য্যৰ পিছতে সংঘৰ্ষকাৰীয়ে পলায়ন কৰে। কিন্তু দীৰ্ঘসময় ধৰি সমগ্ৰ অঞ্চলটোত পৰিস্থিতি উত্তেজনাময় হৈ থাকিল।

আৰক্ষী বিষয়াৰ মতে, এই আক্ৰমণত কন’ট প্লেচৰ এচিপিও আহত হয়। মূৰত আঘাত পোৱাত জ্যেষ্ঠ বিষয়াই লগে লগে ডাঃ ৰাম মনোহৰ লোহিয়া চিকিৎসালয়লৈ লৈ যায়। আন আন আহত আৰক্ষী আৰু আৰ এফৰ জোৱানকো প্ৰাথমিক চিকিৎসাৰ বাবে চিকিৎসালয়লৈ প্ৰেৰণ কৰা হয়।

দিল্লী আৰক্ষীয়ে দাবী কৰিছে যে হিংসাত্মক ঘটনাৰ সময়ত একাংশ প্ৰতিবাদকাৰীয়ে মুকলিকৈ তৰোৱাল আৰু খুকুৰি উলিওৱা দেখা গৈছিল। আৰক্ষীয়েও সন্দেহ প্ৰকাশ কৰিছে যে অসামাজিক উপাদানকে ধৰি একাংশ বাহিৰৰ লোকেও ভিৰত যোগদান কৰাৰ ফলত পৰিস্থিতি আৰু অধিক ভয়াৱহ হৈ পৰে। এই দিশটোও তদন্তত অন্তৰ্ভুক্ত কৰা হৈছে। হিংসাত্মক পৰিস্থিতিৰ পিছত টলষ্টয় মাৰ্গ, পাৰ্লিয়ামেণ্ট মাৰ্গ, আৰু জন্তৰ মন্তৰৰ আশে-পাশে নিৰাপত্তা আৰু অধিক বৃদ্ধি পাইছে। দিল্লী আৰক্ষী আৰু নিৰাপত্তাৰক্ষীৰ অতিৰিক্ত কোম্পানী মোতায়েন কৰা হয়। শান্তি বজাই ৰাখিবলৈ লাউডস্পীকাৰৰ জৰিয়তে প্ৰতিবাদকাৰীক আহ্বান জনাইছে আৰক্ষীয়ে।

-----------------

হিন্দুস্থান সমাচাৰ / অৰৱিন্দ