নতুন দিল্লী, ২৩ জুলাই (হি.স.)। ভাৰতীয় জুডোৰ বাবে দীৰ্ঘদিনীয়া শক্তিশালী খেলুৱৈ বিকাশ ব্যৱস্থাই এতিয়া আন্তঃৰাষ্ট্ৰীয় পৰ্যায়ত নিজৰ প্ৰভাৱ দেখুৱাইছে। উন্নত প্ৰশিক্ষণ, বৈজ্ঞানিক প্ৰস্তুতি আৰু অবিৰত সমৰ্থনৰ বাবেই চাৰিগৰাকী ভাৰতীয় মহিলা জুডো খেলুৱৈয়ে গ্লাছগো কমনৱেলথ গেমছ ২০২৬ৰ বাবে ভাৰতীয় দলত স্থান নিশ্চিত কৰিছে।

কমনৱেলথ গেমছৰ বাবে নিৰ্বাচিত খেলুৱৈসকলৰ ভিতৰত মধ্যপ্ৰদেশৰ ইয়ামিনী মৌৰ্য, উত্তৰাখণ্ডৰ পৰা উন্নতি শৰ্মা, পঞ্জাৱৰ পৰা ইশ্ৰুপ নাৰং আৰু মণিপুৰৰ পৰা তখেলাম্বম ইনুংনাবী। যোৱা কেইবছৰমানৰ পৰা চাৰিওজন খেলুৱৈয়ে ধাৰাবাহিকভাৱে ভাল প্ৰদৰ্শন কৰি ৰাষ্ট্ৰীয় দলত নিজৰ স্থান নিশ্চিত কৰিছে।

এই খেলুৱৈসকলে এক্সিছ বেংক আৰু ইনস্পাইৰ ইনষ্টিটিউট অৱ স্প’ৰ্টছৰ (আই আই এছ) যৌথ খেলুৱৈ বিকাশ কাৰ্যসূচীৰ অধীনত প্ৰশিক্ষণ আৰু অন্যান্য সুবিধা লাভ কৰি আহিছে। এই পদক্ষেপৰ জৰিয়তে এতিয়ালৈকে ৫০০ৰো অধিক খেলুৱৈক সহায় কৰা হৈছে, য’ত আছে ৪৭১ গৰাকী জুনিয়ৰ আৰু ৫৩ গৰাকী অভিজাত মহিলা জুডো খেলুৱৈ।

এই কাৰ্যসূচীৰ সৈতে জড়িত খেলুৱৈসকলে ৰাষ্ট্ৰীয় আৰু আন্তঃৰাষ্ট্ৰীয় প্ৰতিযোগিতাত ১৪০টাতকৈও অধিক পদক লাভ কৰিছে। তদুপৰি জাপান, জৰ্জিয়া, উজবেকিস্তানৰ দৰে দেশত অনুষ্ঠিত ১১টা আন্তঃৰাষ্ট্ৰীয় প্ৰশিক্ষণ শিবিৰত অংশগ্ৰহণ কৰাৰ সুযোগ পাইছে, যাৰ ফলত তেওঁলোকে বিশ্বমানৰ প্ৰতিযোগিতাৰ অভিজ্ঞতা লাভ কৰিছে।

এক্সিছ বেংকৰ গ্ৰুপ মুৰব্বী বিজয় মুলবাগালে কয় যে খেলুৱৈসকলক সঠিক পৰিৱেশ আৰু উচ্চ পৰ্যায়ৰ প্ৰশিক্ষণ প্ৰদানৰ ফলত তেওঁলোকৰ প্ৰদৰ্শনৰ ক্ৰমাগত উন্নতি হৈছে, আৰু কমনৱেলথ গেমছৰ বাবে চাৰিজন খেলুৱৈৰ নিৰ্বাচন এই দিশত এক উল্লেখযোগ্য কৃতিত্ব।

ইফালে, আই আই এছৰ সভানেত্ৰী মনীষা মালহোত্ৰাই কয় যে প্ৰতিষ্ঠানটোৰ উদ্দেশ্য কেৱল খেলুৱৈক প্ৰশিক্ষণ দিয়াই নহয়, আন্তঃৰাষ্ট্ৰীয় পৰ্যায়ত সফলতা লাভ কৰিবলৈ প্ৰয়োজনীয় সকলো সম্পদ প্ৰদান কৰা।

বিশেষকৈ উত্তৰ-পূব আৰু অন্যান্য ৰাজ্যৰ পৰা ভাৰতীয় জুডোত বিগত বছৰবোৰত নতুন প্ৰতিভাৰ উত্থান ঘটাটো ক্ৰমাৎ দেশত এই ক্ৰীড়াৰ ভিত্তি শক্তিশালী হোৱাৰ ইংগিত দিয়ে। এতিয়া সকলোৰে দৃষ্টি এইসকল খেলুৱৈয়ে কমনৱেলথ গেমছত প্ৰদৰ্শন কৰি ভাৰতৰ পদক অভিযানক কিমান দূৰ আগুৱাই নিব পাৰে তাৰ ওপৰত।

হিন্দুস্থান সমাচাৰ / মনোজ কুমাৰ শইকীয়া