গোলাঘাট, ২৩ জুলাই (হি.স.)। শেহতীয়াকৈ পানী কিছু কমিলেও বানমুক্ত হোৱা নাই বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান ৷ বৰ্তমানেও উদ্যানখনৰ তিনিটা বনশিবিৰ বানৰ কৱলত থকাৰ তথ্য প্ৰকাশ কৰিছে উদ্যান কৰ্তৃপক্ষই । তৃণভূমি অঞ্চলসমুহ বানৰ কৱলত থকাৰ বাবে হাইলেণ্ড আৰু পৰ্যটন পথত আশ্ৰয় লৈছে প্ৰায়সমুহ জীৱকুল ৷বৰ্তমানলৈকে বন্যজীৱকুলৰ কোনো ক্ষয়ক্ষতি হোৱা নাই যদিও অধিক সতৰ্ক হৈ পৰিছে উদ্যান কৰ্তৃপক্ষ ৷

উল্লেখ্য় যে ৩৭ নং ৰাষ্ট্ৰীয় পথত মোতায়ন কৰা হৈছে অতিৰিক্ত বনকৰ্মী ৷ এনিমেল কৰিদৰৰ উপৰিও বিভিন্ন স্থানত স্থাপন কৰা হৈছে বেৰিকেড ৷ কিছু সংখ্যক জীৱকুলে ৩৭ নং ৰাষ্ট্ৰীয় পথ অতিক্ৰম কৰি আশ্ৰয় লৈছে কাৰ্বি আংলঙৰ নামনিত । কাৰ্বি আংলঙত জীৱকুলৰ নিৰাপত্তাৰ বাবে কাৰ্বি আংলঙ আৰু কাজিৰঙাৰ বন বিভাগে যৌথভাৱে পহৰা দিয়া হৈছে বুলি উল্লেখ কৰিছে কহঁৰা বনাঞ্চলৰ বনাঞ্চলিক বিষয়াই ৷ এই সময়ছোৱাত দাতিকাষৰীয়া ৰাইজক অনাহকত বন্যপ্ৰানী উদ্ধাৰ কাৰ্য্য কৰাৰ পৰা বিৰত থকাৰ আহ্বান জনোৱাৰ লগতে ৩৭ নং ৰাষ্ট্ৰীয় পথেৰে যাতায়ত কৰা বাহনৰ চালকসকলক সতৰ্কতাৰে এনিমেল কৰিদৰসমূহ অতিক্ৰম কৰাৰ অনুৰোধ জনায় ৷

---------------

হিন্দুস্থান সমাচাৰ / প্ৰকাশ ডেকা