তেহৰাণ/ৱাশ্বিংটন/কুৱেইট চহৰ/ছনা, ২৩ জুলাই (হি.স.)। ইৰাণৰ দক্ষিণৰ বন্দৰ চহৰ বুশ্বেহৰত আমেৰিকাই বিমান আক্ৰমণ চলাইছে। এই চহৰখনত ইৰাণৰ একমাত্ৰ অসামৰিক পাৰমাণৱিক শক্তি কেন্দ্ৰস্থল। ইৰাণৰ বিৰুদ্ধে একেৰাহে ১২ সংখ্যক নিশা আমেৰিকাৰ সামৰিক আক্ৰমণ চলে। ইৰাণৰ সেনাই আমেৰিকাৰ মিত্ৰশক্তিৰ ওপৰত ড্ৰোন আৰু মিছাইল নিক্ষেপ কৰি প্ৰতিশোধ লয়। কুৱেইটৰ এয়াৰ ডিফেন্স চিষ্টেম সক্ৰিয় কৰা হৈছে। য়েমেনত সক্ৰিয় ইৰাণ সমৰ্থক সন্ত্ৰাসবাদী সংগঠন হাউথীয়ে এতিয়া মুকলিকৈ হৰমুজ জলদ্বীপক লৈ সংঘাতত জড়িত হৈ পৰিছে।
আল জাজিৰাৰ তথ্য অনুসৰি বুশ্বেহৰৰ গৱৰ্ণৰ মহম্মদ মুজাফফাৰীয়ে ইৰাণৰ চৰকাৰী সংবাদ সংস্থা তাছনিমক জনাইছে যে আমেৰিকা বাহিনীয়ে দক্ষিণৰ উপকূলীয় চহৰ বুশ্বেহৰত আক্ৰমণ কৰিছে। ইয়াৰ ফলত এক শক্তিশালী বিস্ফোৰণ ঘটিছে। ঘটনাস্থলীত উপস্থিত থাকে জৰুৰীকালীন সেৱা। পাৰ্চী উপসাগৰীয় উপকূলত অৱস্থিত বন্দৰ চহৰ বুশ্বেহৰ হৈছে বুশ্বেহৰ প্ৰদেশৰ ৰাজধানীও। বুশ্বেহৰ পাৰমাণৱিক শক্তি কেন্দ্ৰৰ বাবে পৰিচিত। ই ইৰাণৰ একমাত্ৰ কাৰ্যক্ষম পাৰমাণৱিক শক্তি কেন্দ্ৰ। ৰাছিয়াৰ সহায়ত নিৰ্মিত এই উদ্যোগটো চহৰৰ মাজমজিয়াৰ পৰা প্ৰায় ১৭ কিলোমিটাৰ দক্ষিণে অৱস্থিত।
আমেৰিকাৰ কেন্দ্ৰীয় কমাণ্ডে (চেন্টকম) এক্সত পোষ্ট কৰিছিল যে ৰাষ্ট্ৰপতি ড’নাল্ড ট্ৰাম্পৰ নিৰ্দেশত ইৰাণৰ সামৰিক লক্ষ্যৰ বিৰুদ্ধে সন্ধিয়া ৫:৩০ ইৰাণৰ সামৰিক ঘাটিত আক্ৰমণ আৰম্ভ কৰা হৈছিল। ইৰাণৰ অসামৰিক আৰু বাণিজ্যিক জাহাজৰ প্ৰতি ভাবুকি কঢ়িয়াই অনাৰ ক্ষমতাক আৰু অধিক অৱনমিত কৰিবলৈ এই আক্ৰমণ চলোৱা হৈছিল। কুৱেইটৰ সেনাই উল্লেখ কৰিছে যে ইৰাণৰ পৰা ড্ৰ’ন আক্ৰমণ ৰোধ কৰিবলৈ সমগ্ৰ দেশতে বায়ু প্ৰতিৰক্ষা ব্যৱস্থা সক্ৰিয় কৰা হৈছে। কুৱেইট সেনাৰ জেনেৰেল ষ্টাফে কয় যে ড্ৰ’ন ভূপাতিত কৰিলে বিস্ফোৰণৰ শব্দ শুনা যায় আৰু ইয়াক লৈ আতংকিত হোৱাৰ প্ৰয়োজন নাই।
ইৰাণৰ শীৰ্ষ আলোচনাপন্থী মহম্মদ বাঘেৰী গালিবাফে কয় যে ইৰাণক নিৰাপত্তাৰ নিশ্চয়তা নিদিয়ালৈকে অঞ্চলটোৰ পৰিস্থিতি সলনি হ’ব নোৱাৰে। ইৰাণৰ স্বাস্থ্য মন্ত্ৰালয়ে প্ৰকাশ কৰা অনুসৰি ২৭ জুনৰ পৰা দেশখনত আমেৰিকাৰ আক্ৰমণত কমেও ৫৩ জন লোক নিহত হৈছে। ইফালে য়েমেনত ইৰাণ সমৰ্থক হাউথী বিদ্ৰোহীয়ে দাবী কৰিছে যে তেওঁলোকে লোহিত সাগৰত ছৌদি আৰৱৰ দুখন তেল টেংকাৰ মিছাইল আৰু ড্ৰোন আক্ৰমণেৰে ধ্বংস কৰিছিল। টেলিগ্ৰামত হাউথী বিদ্ৰোহীয়ে জাৰি কৰা এক বিবৃতি অনুসৰি টেংকাৰকেইখনৰ নাম এনচেলিয়া আৰু লাইলা। ইয়াৰ পূৰ্বে ব্ৰিটেইনৰ মেৰিটাইম ট্ৰেড অপাৰেচন অৰ্গেনাইজেশ্যনে চৌদি আৰৱৰ আল-ছুকাইখ চহৰৰ পৰা ৭০ নটিকেল মাইল (১৩০ কিলোমিটাৰ) দূৰত্বত এখন টেংকাৰত আক্ৰমণৰ কথা নিশ্চিত কৰিছিল।
হিন্দুস্থান সমাচাৰ / অৰৱিন্দ
