নতুন দিল্লী, ২৩ জুলাই (হি.স.)। দিল্লীৰ যন্তৰ মন্তৰত ছ’চিয়েল মিডিয়া প্ৰচাৰ ককৰোচ জনতা পাৰ্টি (চিজিপি)য়ে চলাই থকা প্ৰতিবাদত ৰাষ্ট্ৰীয় নিৰাপত্তা আইন (এন এছ এ) আৰোপ কৰা সন্দৰ্ভত সংবাদ মাধ্যমত প্ৰকাশ পোৱা বাতৰিৰ মাজতে দিল্লী আৰক্ষীয়ে এক স্পষ্টীকৰণ জাৰি কৰিছে।

বৃহস্পতিবাৰে আৰক্ষীয়ে স্পষ্ট কৰি দিয়ে যে চিজেপিৰ প্ৰতিবাদ ৰোধ বা মোকাবিলা কৰিবলৈ এন এছ এৰ অধীনত দিল্লী আৰক্ষী আয়ুক্তক প্ৰতিৰোধমূলক কাৰ্য্যৰ ক্ষমতা প্ৰদান কৰা হোৱা নাই। এই আদেশ বিশুদ্ধভাৱে নিয়মীয়া প্ৰশাসনিক প্ৰক্ৰিয়াৰ অংশ, যিটো প্ৰতি তিনিমাহৰ মূৰে মূৰে নবীকৰণ কৰা হয়।

আৰক্ষীৰ তথ্য অনুসৰি চিজেপিৰ প্ৰতিবাদ নিয়ন্ত্ৰণৰ বাবে আৰক্ষী আয়ুক্তগৰাকীক এন এছ এৰ অধীনত গ্ৰেপ্তাৰ আৰু আটক কৰাৰ ক্ষমতা প্ৰদান কৰা বুলি একাংশ সংবাদ মাধ্যমে প্ৰকাশ কৰিছিল। তেওঁলোকে এই প্ৰতিবেদনসমূহক বিভ্ৰান্তিকৰ বুলি অভিহিত কৰি কয় যে বৰ্তমানৰ এই নিৰ্দেশৰ প্ৰতিবাদৰ সৈতে কোনো সম্পৰ্ক নাই।

আৰক্ষীয়ে উল্লেখ কৰে যে এন এছ এৰ অধীনত ক্ষমতা নবীকৰণৰ নিৰ্দেশ ২০২৬ চনৰ ৭ জুলাইৰ পৰা জাৰি কৰা হৈছিল। এই আদেশ ২০২৬ চনৰ ১৯ ​​জুলাইৰ পৰা ২০২৬ চনৰ ১৮ অক্টোবৰলৈ কাৰ্যকৰী হ’ব। অৰ্থাৎ চিজেপিৰ প্ৰতিবাদ আৰম্ভ হোৱাৰ পূৰ্বেই এই নিৰ্দেশ জাৰি কৰা হৈছিল আৰু নিৰ্ধাৰিত প্ৰশাসনিক প্ৰক্ৰিয়া অনুসৰি কাৰ্যকৰী কৰা হৈছিল।

তেওঁলোকে স্পষ্ট কৰি দিয়ে যে সাম্প্ৰতিক পৰিস্থিতিৰ প্ৰতি লক্ষ্য ৰাখি কোনো বিশেষ প্ৰস্তাৱ বা পৃথক অনুৰোধ কৰা হোৱা নাই। প্ৰতি তিনিমাহৰ মূৰে মূৰে সংঘটিত হোৱা নিয়মীয়া নবীকৰণৰ সৈতে চিজেপিৰ প্ৰতিবাদৰ সম্পৰ্ক একাংশ সংবাদ মাধ্যমত প্ৰকাশ পাইছিল, যিয়ে ভুল বাৰ্তা প্ৰেৰণ কৰিছিল।

এনে বিভ্ৰান্তিকৰ বাতৰিক বিশ্বাস নকৰিবলৈ আৰু কোনো তথ্য কেৱল চৰকাৰী সূত্ৰৰ পৰা পৰীক্ষা কৰিবলৈ জনসাধাৰণক আহ্বান জনাইছে আৰক্ষীয়ে। তেওঁলোকে কয় যে ছ’চিয়েল মিডিয়া আৰু অন্যান্য প্লেটফৰ্মত প্ৰচাৰিত অসত্য তথ্যই আইন-শৃংখলাৰ বিষয়ত বিভ্ৰান্তিৰ সৃষ্টি কৰিব পাৰে, সেয়েহে কেৱল বাস্তৱিক তথ্যহে বিশ্বাস কৰিব লাগে।

হিন্দুস্থান সমাচাৰ / অৰৱিন্দ