নতুন দিল্লী, ২২ জুলাই (হি.স.)। ভাৰত, আমেৰিকা, অষ্ট্ৰেলিয়া আৰু জাপানৰ বৈদেশিক মন্ত্ৰীসকলৰ মেনিলাত অনুষ্ঠিত হোৱা কোৱাড বৈঠকত আছিয়ানৰ কেন্দ্ৰীয় ভূমিকা শক্তিশালী কৰা, মুক্ত আৰু মুকলি ভাৰত-প্ৰশান্ত মহাসাগৰীয় অঞ্চলক সমৰ্থন কৰা আৰু সামুদ্ৰিক সুৰক্ষা, অৰ্থনৈতিক সমৃদ্ধি, উদীয়মান প্ৰযুক্তি আৰু মানৱীয় সাহায্য আদি ক্ষেত্ৰত সহযোগিতা বৃদ্ধিৰ বাবে সন্মতি প্ৰকাশ কৰা হয়। আঞ্চলিক শান্তি আৰু স্থিতিশীলতাই ভাৰত-প্ৰশান্ত মহাসাগৰীয় অঞ্চলৰ নিৰাপত্তা আৰু সমৃদ্ধিৰ ভেটি বুলি উল্লেখ কৰি চাৰিখন দেশে আছিয়ানৰ সৈতে অংশীদাৰিত্ব আৰু অধিক শক্তিশালী কৰাৰ ওপৰত গুৰুত্ব আৰোপ কৰে।

বৈদেশিক পৰিক্ৰমা মন্ত্ৰালয়ে উল্লেখ কৰে যে ভাৰতৰ বৈদেশিক মন্ত্ৰী ড০ এছ জয়শংকৰ, অষ্ট্ৰেলিয়াৰ বৈদেশিক মন্ত্ৰী পেনি ৱং, জাপানৰ বৈদেশিক মন্ত্ৰী টোছিমিটছু মোটেগী, আৰু আমেৰিকাৰ বিদেশ মন্ত্ৰী মাৰ্কো ৰুবিঅ’ই এক যৌথ বিবৃতিত কয় যে আছিয়ানৰ ঐক্য আৰু কেন্দ্ৰীয়তাৰ প্ৰতি চাৰিখন দেশে অদম্য সমৰ্থন অব্যাহত ৰাখিছে। অঞ্চলটোৰ স্থিতিশীলতা, উন্নয়ন আৰু সমৃদ্ধিৰ বাবে কোৱাড আৰু আছিয়ানৰ মাজত সহযোগিতা অতি গুৰুত্বপূৰ্ণ।

বৈদেশিক মন্ত্ৰীসকলে আছিয়ানৰ সদস্য ৰাষ্ট্ৰসমূহৰ সৈতে সম্পৰ্ক আৰু অধিক শক্তিশালী কৰাৰ লগতে অঞ্চলটোৰ সফলতা আৰু উন্নয়নত গভীৰ বিনিয়োগ প্ৰকাশ কৰে। এই বৈঠকত আঞ্চলিক প্ৰত্যাহ্বান আৰু সুযোগসমূহৰ বিষয়ে বিতংভাৱে আলোচনা কৰা হয় আৰু আছিয়ানৰ ভাৰত-প্ৰশান্ত মহাসাগৰীয় দৃষ্টিভংগীৰ ব্যৱহাৰিক ৰূপায়ণক আগুৱাই নিয়াৰ বাবে সন্মতি দিয়া হয়।

যৌথ বিবৃতিটোত উল্লেখ কৰা হৈছে যে সামুদ্ৰিক আৰু আন্তঃৰাষ্ট্ৰীয় নিৰাপত্তা, অৰ্থনৈতিক সমৃদ্ধি আৰু নিৰাপত্তা, জটিল আৰু উদীয়মান প্ৰযুক্তি, মানৱীয় সাহায্য আৰু দুৰ্যোগ সাহায্য এনে ক্ষেত্ৰ য’ত কোৱাড আৰু আছিয়ানৰ মাজত সহযোগিতা আৰু অধিক বৃদ্ধি পাব। বৈদেশিক মন্ত্ৰীসকলে এই ক্ষেত্ৰত গুৰুত্ব আৰোপ কৰে যে এই ক্ষেত্ৰত ব্যৱহাৰিক সহযোগিতাই সমগ্ৰ ভাৰত-প্ৰশান্ত মহাসাগৰীয় অঞ্চলটো উপকৃত হ’ব।

বৈঠকত সামুদ্ৰিক সুৰক্ষাক বিশেষ গুৰুত্ব দিয়া হয়। ভাৰত-প্ৰশান্ত মহাসাগৰীয় সামুদ্ৰিক ক্ষেত্ৰখনত শান্তি আৰু স্থিতিশীলতা সমগ্ৰ অঞ্চলটোৰ নিৰাপত্তা আৰু অৰ্থনৈতিক উন্নয়নৰ বাবে অপৰিহাৰ্য বুলি উল্লেখ কৰে চাৰিওখন দেশে। তেওঁলোকে নিয়মভিত্তিক আন্তঃৰাষ্ট্ৰীয় ব্যৱস্থা, নিৰাপদ সাগৰীয় পথ, আৰু আঞ্চলিক সহযোগিতা শক্তিশালী কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।

যৌথ বিবৃতিটোত কোৱাড দেশসমূহে আঞ্চলিক আৰু বিশ্বব্যাপী প্ৰত্যাহ্বানসমূহ মোকাবিলা কৰিবলৈ আছিয়ানৰ সৈতে ঘনিষ্ঠভাৱে কাম কৰি যাব বুলিও উল্লেখ কৰা হৈছে। বৈদেশিক মন্ত্ৰীসকলে এই কথাত একমত হয় যে ভাৰত-প্ৰশান্ত মহাসাগৰীয় অঞ্চলটোক অধিক সুৰক্ষিত, সুস্থিৰ আৰু সমৃদ্ধিশালী কৰি তোলাৰ মূল চাবিকাঠি হ’ল সহযোগিতা, আলোচনা আৰু অংশীদাৰিত্ব।

হিন্দুস্থান সমাচাৰ / মনোজ কুমাৰ শইকীয়া