কাঠমাণ্ডু, ২২ জুলাই (হি.স.)। ধাৰাবাহিকভাৱে হোৱা মুষলধাৰ বৰষুণে নেপালৰ পৰিস্থিতি অধিক ভয়াৱহ কৰি তুলিছে, যাৰ ফলত দেশৰ বিভিন্ন প্ৰান্তত বানপানীৰ লগতে ভূমিস্খলনৰ সৃষ্টি হৈছে। ফলত কেইবাটাও ডাঙৰ ৰাষ্ট্ৰীয় ঘাইপথ আৰু পথ বন্ধ হৈ আছে। নেপাল আৰক্ষীয়ে যাত্ৰীসকলক যাতায়তৰ পূৰ্বে সাৱধানতা অৱলম্বন কৰাৰ লগতে পথৰ অৱস্থা পৰীক্ষা কৰিবলৈ আহ্বান জনাইছে।
বৰষুণৰ ফলত কাভ্ৰেপালনচক আৰু সিন্ধুলী সংযোগী বি পি ঘাইপথৰ খুৰকোট-নেপালথক-কাটুঞ্জেবেছি অংশত বানপানীৰ আশংকা বৃদ্ধি পাইছে। সতৰ্কতামূলক ব্যৱস্থা হিচাপে এই পথৰ সকলো যান-বাহনৰ যাতায়ত সন্ধিয়া ৬ বজাৰ পৰা পুৱা ৪ বজালৈ পৰৱৰ্তী জাননী নিদিয়ালৈকে বন্ধ কৰি দিয়া হৈছে। একেদৰে কান্তি লোকপথৰ মাকৱানপুৰ অংশতো সন্ধিয়া ৫ বজাৰ পৰা পুৱা ৫ বজালৈ যাতায়ত বাধা আৰোপ কৰা হৈছে। ধাৰাসাৰ বৰষুণৰ ফলত মেচি ঘাইপথৰ ইলাম পৌৰসভাৰ ৰাজদুৱালী অঞ্চলৰ পথটো বোকালৈ পৰিণত হোৱাৰ ফলত পথটো সম্পূৰ্ণৰূপে বন্ধ হৈ পৰিছে।
ইফালে সিন্ধুপালচোক জিলাৰ ভোটেকোশীৰ জিৰোকিলো আৰু কোদাৰী অঞ্চলত হোৱা ভূমিস্খলনৰ ফলত অৰ্ণিকো ঘাইপথৰ যাতায়ত সম্পূৰ্ণৰূপে ব্যাহত হৈছে।
বাগলুং জিলাৰ জয়মিনি পৌৰসভাৰ বেলবাগড়স্থিত কালিগণ্ডাকী কৰিড’ৰতো ভূমিস্খলনে সম্পূৰ্ণৰূপে আৱদ্ধ হৈ পৰিছে। তদুপৰি পঞ্চথাৰ জিলাৰ মিকলাজুং গ্ৰাম্য পৌৰসভাৰ কোপচে অঞ্চলৰ ৰাংকে-ৰবি-ভেদেটাৰ পথ আৰু গোৰ্খা জিলাৰ ধৰচেৰ লিডিং অঞ্চলৰ অৰুঘাট-মাছিখোলা পথটোও ভূমিস্খলন আৰু বেয়া বতৰৰ ফলত ক্ষতিগ্ৰস্ত হৈছে।
নেপাল আৰক্ষীৰ তথ্য অনুসৰি বুধবাৰে পুৱা ললিতপুৰ জিলাৰ বাগমতী পৌৰসভাৰ পাণ্ডুৰ অঞ্চলত শুকান ভূমিস্খলনে কান্তি লোকপথ সম্পূৰ্ণৰূপে অৱৰোধ কৰি পেলায়। অব্যাহত থকা বৰষুণৰ পৰিপ্ৰেক্ষিতত প্ৰশাসনে জনসাধাৰণক অপ্ৰয়োজনীয় যাতায়তৰ পৰা আঁতৰি থাকিবলৈ, শেহতীয়া বতৰ আৰু পথৰ তথ্যৰ পৰামৰ্শ ল’বলৈ, প্ৰশাসনে জাৰি কৰা সুৰক্ষাৰ নিৰ্দেশনা মানি চলিবলৈ আহ্বান জনাইছে।
--------------
হিন্দুস্থান সমাচাৰ / অৰৱিন্দ
