ইম্ফল, ২২ জুলাই (হি.স.)। মণিপুৰৰ কামজোং জিলাত প্ৰধানমন্ত্ৰী গ্ৰাম সাদক যোজনাৰ অধীনত নিৰ্মিত বেইলী দলঙত বিস্ফোৰণ সংঘটিত কৰাত কেইবাখনো গাঁও আৰু জিলা সদৰৰ মাজত থকা একমাত্ৰ পথ সংযোগ বিচ্ছিন্ন হৈ পৰে।

আৰক্ষীৰ মতে, ফাংগাই আৰু চাট্ৰিক গাঁৱৰ মাজৰ নামবান লোক নদীৰ ওপৰত থকা দলংখনত পুৱা প্ৰায় ৯:৩০ বজাত সংঘটিত হয় এই ঘটনা। প্ৰাথমিক তদন্তত ইম্প্ৰভাইজড এক্সপ্ল’ছিভ ডিভাইচ (আই ই ডি) ব্যৱহাৰৰ পৰামৰ্শ দিয়া হৈছে।

নদীৰ পাৰত ৰখাই থোৱা দূৰসংযোগ বিভাগৰ এখন বাহনতো আক্রমণকাৰীয়ে অগ্নিসংযোগ কৰি সম্পূৰ্ণৰূপে ধ্বংস কৰে।

আৰক্ষীয়ে জনোৱা মতে, এই দলংখনেই আছিল চাত্ৰিক আৰু ইয়াৰ আশে-পাশে থকা গাঁওসমূহক জিলা সদৰলৈ সংযোগ কৰা একমাত্ৰ পথ সংযোগী। বিষয়াসকলৰ মতে, ৰাজহুৱা আন্তঃগাঁথনিৰ ক্ষতিসাধন, পৰিবহণ আৰু যোগাযোগ সেৱাত ব্যাঘাত জন্মা, জনসাধাৰণৰ চলাচলত বাধা আৰোপ কৰা, অঞ্চলটোত ভয়ৰ পৰিৱেশ সৃষ্টি কৰাৰ লক্ষ্যৰে এই আক্ৰমণ চলোৱা হৈছিল।

আৰক্ষীয়ে এই কাণ্ডৰ সন্দৰ্ভত বিশেষ গুৰুত্ব দি চি এছ ডি থানাত সংশ্লিষ্ট শাখাৰ অধীনত গোচৰ ৰুজু কৰি তদন্ত আৰম্ভ কৰিছে । এতিয়ালৈকে কোনো উগ্ৰপন্থী সংগঠনে এই ঘটনাৰ দায়িত্ব স্বীকাৰ কৰা নাই।

-----------------

হিন্দুস্থান সমাচাৰ / অৰৱিন্দ