নতুন দিল্লী, ২০ জুলাই (হি.স.)। সোমবাৰে প্ৰধানমন্ত্ৰী নৰেন্দ্ৰ মোদীয়ে বৰ্ষাকালিন অধিৱেশনৰ পূৰ্বে সদনৰ কাৰ্যসূচীত সক্ৰিয়ভাৱে অংশগ্ৰহণ কৰিবলৈ সকলো সাংসদক আহ্বান জনায়। তেওঁ উল্লেখ কৰে যে নিজৰ যুক্তি আৰু তথ্য শক্তিশালী হ’লে শান্ত মনৰ সহায়ত মাত উঠাব পাৰি। তেওঁ কয় যে চহকী বিতৰ্ক, প্ৰতিটো কণ্ঠৰ বাবে স্থান, প্ৰতিটো ধাৰণাক সন্মান নিশ্চিত কৰাৰ দায়িত্ব সংসদৰ । আজিৰে পৰা আৰম্ভ হৈছে সংসদৰ বৰ্ষাকালিন অধিৱেশন। প্ৰতিটো অধিবেশনৰ পূৰ্বে প্ৰধানমন্ত্ৰীয়ে পৰম্পৰাগতভাৱে সংসদ কমপ্লেক্সত সংবাদ মাধ্যমক সম্বোধন কৰি চৰকাৰৰ অগ্ৰাধিকাৰ আৰু অধিবেশনৰ বাবে তেওঁৰ আশাৰ বিষয়ে অৱগত কৰে।

তেওঁ বৰ্ষাকালিন অধিবেশনক বৰ্ষা ঋতুৰ লগত তুলনা কৰি কয় যে যেতিয়া দুয়োটা সক্ৰিয় হয় তেতিয়া উৎপাদনশীলতা বৃদ্ধি পায়। ইয়াৰ দ্বাৰা এফালে জাতি আৰু আনফালে সকলো জীৱৰ উপকাৰ হয়। তেওঁ দুয়োৰে সক্ৰিয় অংশগ্ৰহণৰ কামনা কৰে। প্ৰধানমন্ত্ৰীয়ে কয় যে দেশখনে এতিয়া উন্নয়নৰ এক নতুন গতি লাভ কৰিছে, আৰু সংসদে নিজৰ ইতিবাচক চিন্তাধাৰাৰে বাৰিষাৰ অধিবেশনৰ সময়ত ইয়াক আৰু অধিক শক্তিশালী কৰিব পাৰে। তেওঁ কয় যে সংসদৰ কাম-কাজ, অৰ্থপূৰ্ণ আলোচনা, আৰু দেশক আগুৱাই নিয়াৰ প্ৰচেষ্টা এই সময়ৰ প্ৰয়োজনীয়তা । দেশপ্ৰেমৰ ধাৰণাই যাতে সদনত স্থান লাভ কৰি থাকে সেয়া আমাৰ দায়িত্ব।

প্ৰধানমন্ত্ৰীয়ে কয় যে বিগত এমাহত দেশবাসীয়ে বহু সাফল্য লাভ কৰিছে যিয়ে দেশবাসীক গৌৰৱান্বিত কৰি তুলিছে । এই কৃতিত্বসমূহে ৰাষ্ট্ৰীয়, আন্তঃৰাষ্ট্ৰীয়, আৰু মহাকাশ খণ্ডক সামৰি লৈছে । ইয়াৰ ভিতৰত ৰাজস্থানত তেল শোধনাগাৰ উদ্বোধন, তৃতীয়টো অৰ্ধপৰিবাহী উদ্যোগ মুকলি, গ্ৰীণ হাইড্ৰজেন ট্ৰেইন আদি। এটা যুৱ ষ্টাৰ্টআপ স্কাইৰুটে মহাকাশলৈ ব্যক্তিগত ৰকেট নিক্ষেপ কৰাৰ সাফল্যৰ কথা উল্লেখ কৰি প্ৰধানমন্ত্ৰীয়ে কয় যে ষ্টাৰ্টআপটোৰ কৰ্মচাৰীসকলৰ গড় বয়স ২৮ বছৰ। ইয়াৰ দ্বাৰা প্রমাণিত হৈছে যে ভাৰতৰ যুৱক-যুৱতীসকলৰ সম্ভাৱনা আৰু আকাংক্ষা মহাকাশৰ দৰেই সীমাহীন৷

তেওঁ কয়, এই কৃতিত্বই ভাৰতক আত্মবিশ্বাসেৰে ভৰাই তোলে আৰু বিশ্বজুৰি ভাৰতৰ প্ৰফাইল উন্নীত কৰে । ৰিফৰ্ম এক্সপ্ৰেছৰ বাবেই আজি যুৱক-যুৱতীসকলে এনে মহান কাম সম্পন্ন কৰিবলৈ সক্ষম হৈছে।

-----------------

হিন্দুস্থান সমাচাৰ / অৰৱিন্দ