ইম্ফল, ০২ জুলাই (হি.স.)। মণিপুৰত কুকি জনজাতিৰ প্ৰতিিনিধিত্ব কৰা মুখ্য সংস্থা, কুকি ইনপি মণিপুৰ (কেআইএম)য়ে বুধবাৰে কামজং জিলা ফায়মোল গাওঁখনত হোৱা অগ্নিকাণ্ডৰ ঘটনাটো কঠোৰভাৱে নিন্দা জনাইছে। সংযুক্তি অভিযোগ কৰিছে যে এই আক্ৰমণৰ বাবে তাংখুল-নেতৃত্বাধীন এন এছ চি এন-আই এম আৰু মায়ানমাৰৰ শ্নী নেশনেৰেলিটিজ আর্মীৰ (এছএনএ) সশস্ত্ৰ সদস্যবৃন্দ দায়ী আছিল।

ৰাজ্যৰ পাহাৰীয়া জিলাসমূহৰ কুকি গাঁওসমূহক লক্ষ্য কৰি সংঘটিত হোৱা ধাৰাবাহিক হিংসাত্মক ঘটনাৰ অংশ বুলি অভিহিত কৰি কিমে পৰিস্থিতি অধিক তীব্ৰতৰ নহ’বলৈ কেন্দ্ৰ আৰু মণিপুৰ চৰকাৰৰ পৰা শীঘ্ৰে হস্তক্ষেপৰ দাবী জনায়।

সংগঠনটোৱে জনোৱা মতে, টাংখুল অধ্যুষিত অঞ্চলৰ কুকি বসতিস্থলীত ধাৰাবাহিকভাৱে আক্ৰমণ চলোৱা এই শেহতীয়া কাণ্ডত ফাইমোল গাঁও সম্পূৰ্ণৰূপে ধ্বংস হৈছিল।

এই ঘটনাক লৈ কিমে উদ্বেগ প্ৰকাশ কৰে। সংগঠনটোৱে দাবী কৰিছে যে গাঁওখন আছাম ৰাইফলছৰ জোৱানৰ সুৰক্ষাত আছিল আৰু অগ্নিসংযোগৰ এদিন পূৰ্বে নিৰাপত্তা বাহিনীয়ে নিজৰ পদ খালী কৰিছিল বুলি অভিযোগ উত্থাপন কৰিছে। সংস্থাটোৱে উল্লেখ কৰে যে নিৰাপত্তা বাহিনী প্ৰত্যাহাৰৰ সময়ে বৰ্তমানৰ নিৰাপত্তা ব্যৱস্থাক লৈ গুৰুতৰ প্ৰশ্নৰ উত্থাপন কৰিছে। আক্রমণৰ অভিযোগ উত্থাপন হোৱা পৰিস্থিতিৰ তাৎক্ষণিক আৰু স্বচ্ছ তদন্তৰ দাবী জনাইছে৷

এইটো কোনো বিচ্ছিন্ন কাণ্ড নহয় বুলি দাবী কৰি কিমে ২০২৬ চনৰ ভিতৰত গাঁৱত অগ্নিসংযোগৰ কেইবাটাও কাণ্ডৰ উদাহৰণ দাঙি ধৰে। সংগঠনে এইবোৰ কাণ্ডৰ তালিকা প্ৰস্তুত কৰে: ২৬ জানুৱাৰীত কাংপকপিৰ কে ছংলুং; ৮ৰ পৰা ৯ ফেব্ৰুৱাৰীৰ ভিতৰত উখৰুলৰ লিটন-ছাৰেইখং; ২৫ এপ্ৰিলত উখৰুলত ছংফেল আৰু মুলাম; ৬ মে’ত কামজঙত লংকা; ১২ মে’ত ম্যানমাৰ সীমান্তৰ মলনয়; ৩০ মে’ত কাংপকপিত খৰাম বৈফেই; ৫ জুনত কাংপকপিত লয়বল খুলেন; ১১ জুনত কামজংৰ কুলটুহ গাঁও আৰু শেহতীয়াকৈ কামজঙৰ ফাইমোল গাঁও।

কিমে অভিযোগ কৰে যে এই বাৰে বাৰে ঘটা কাণ্ডবোৰে কুকি বসতিৰ বিৰুদ্ধে হিংসাৰ এক ধাৰাবাহিক আৰ্হি প্ৰতিফলিত কৰে। সংস্থাটোৱে যুক্তি দিছিল যে এনে ধ্বংসলীলাক আইন-শৃংখলাৰ বিচ্ছিন্ন কাণ্ড হিচাপে চাব নালাগে, বৰঞ্চ তাৎক্ষণিক হস্তক্ষেপৰ প্ৰয়োজন হোৱা এক বৃহৎ নিৰাপত্তাজনিত প্ৰত্যাহ্বানৰ চিন হিচাপেহে চাব লাগে। ভাৰত চৰকাৰৰ সৈতে যুদ্ধবিৰতি চুক্তি হোৱাৰ পিছতো এন এছ চি এন-আই এমৰ সদস্যসকলে কেনেকৈ কোনো ফলপ্ৰসূ ব্যৱস্থা নোলোৱাকৈ অসামৰিক বসতিস্থলত বাৰে বাৰে আক্ৰমণ কৰিবলৈ সক্ষম হ’ল, সেই বিষয়েও সংগঠনটোৱে প্ৰশ্ন উত্থাপন কৰে। কিমে কয় যে এনে ঘটনাই শান্তি প্ৰক্ৰিয়াৰ প্ৰতি জনসাধাৰণৰ আস্থা ক্ষুণ্ণ কৰিব পাৰে।

এছ এন এৰ কথিত ভূমিকাক লৈ উদ্বেগ প্ৰকাশ কৰি কিমে বিষয়টোক ৰাষ্ট্ৰীয় নিৰাপত্তাৰ এক জটিল বিষয় বুলি অভিহিত কৰি অধিক কঠোৰ সীমা ব্যৱস্থাপনা ব্যৱস্থাৰ দাবী জনায়। ইয়াৰ উপৰিও সীমান্তৰ সিপাৰে কাম কৰা সশস্ত্ৰ সংগঠনে ভাৰতীয় ভূখণ্ডক লক্ষ্য কৰি লোৱাত বাধা দিবলৈ ম্যানমাৰ চৰকাৰৰ সৈতে আলোচনাত মিলিত হ’বলৈ ভাৰত চৰকাৰক আহ্বান জনায়।

কিমে কেন্দ্ৰীয় গৃহ মন্ত্ৰালয়, মণিপুৰ চৰকাৰ, আৰু সকলো নিৰাপত্তা সংস্থাক কথিত নিৰাপত্তাজনিত ত্ৰুটি দূৰ কৰাৰ বাবে তাৎক্ষণিক পদক্ষেপ গ্ৰহণ কৰিবলৈ আৰু স্পৰ্শকাতৰ অঞ্চলত সাধাৰণ নাগৰিকৰ সুৰক্ষা নিশ্চিত কৰিবলৈ আহ্বান জনায়।

-----------------

হিন্দুস্থান সমাচাৰ / অৰৱিন্দ