নতুন দিল্লী, ০২ জুলাই (হি.স.)। কেৰালাৰ কোচিত বুধবাৰে অনুষ্ঠিত হোৱা ছিফুড এক্সপ’ ইণ্ডিয়া ২০২৬ৰ সময়ত সাগৰীয় খাদ্যৰ মূল্য সংযোজনৰ ওপৰত ৰাষ্ট্ৰীয় দক্ষতা অলিম্পিয়াডৰ দ্বিতীয় সংস্কৰণৰ সামৰণি পৰে । সামুদ্ৰিক সামগ্ৰী ৰপ্তানি উন্নয়ন কৰ্তৃপক্ষই (এমপিইডিএ) আয়োজন কৰা এই অনুষ্ঠানত বহিঃৰাজ্যৰ বজাৰৰ বাবে মূল্য সংযোজিত সাগৰীয় খাদ্য সামগ্ৰী প্ৰস্তুত কৰাৰ ক্ষেত্ৰত দহজন প্ৰশিক্ষিত সাগৰীয় খাদ্য প্ৰক্ৰিয়াকৰণ পেছাদাৰীৰ দক্ষতা প্ৰদৰ্শন কৰা হয় ।
বাণিজ্য আৰু উদ্যোগ মন্ত্ৰালয়ে বৃহস্পতিবাৰে এক বিবৃতিত কয় যে বুধবাৰে কোচিত ছিফুড এক্সপ’ ইণ্ডিয়া ২০২৬ৰ সময়ত দ্বিতীয় সংস্কৰণৰ সাগৰীয় খাদ্যৰ মূল্য সংযোজন সম্পৰ্কীয় ৰাষ্ট্ৰীয় দক্ষতা অলিম্পিয়াডৰ গ্ৰেণ্ড ফিনালে অনুষ্ঠিত হয় । এই এমপিইডিএ পদক্ষেপত সাগৰীয় খাদ্য প্ৰক্ৰিয়াকৰণ খণ্ডৰ দহজন প্ৰশিক্ষিত পেছাদাৰীয়ে অংশগ্ৰহণ কৰে। অংশগ্ৰহণকাৰীসকলে মূল্য সংযোজিত সাগৰীয় খাদ্য সামগ্ৰী প্ৰস্তুত কৰাৰ ক্ষেত্ৰত নিজৰ ৰান্ধনী আৰু কাৰিকৰী দক্ষতা প্ৰদৰ্শন কৰে। ঘনিষ্ঠ প্ৰতিদ্বন্দ্বিতামূলক ফাইনেলত অন্ধ্ৰপ্ৰদেশৰ কাকিনাডাৰ দেৱী ফিচাৰিজ লিমিটেডৰ পি সূৰ্য্য ভাস্কৰে বিজয়ী হিচাপে আত্মপ্ৰকাশ কৰে ।
মন্ত্ৰালয়ৰ তথ্য অনুসৰি তামিলনাডুৰ টুটিকোৰিনৰ থেভা এণ্ড কোম্পানীৰ মুথু কুমাৰনে দ্বিতীয় স্থান লাভ কৰাৰ বিপৰীতে পশ্চিম বংগৰ কলকাতাৰ এছ এছ ছিফুডছ প্ৰাইভেট লিমিটেডৰ সাগৰিকা চৰ্দাৰ আৰু ওড়িশাৰ ভুৱনেশ্বৰ শবাৰী ফুড প্ৰডাক্টছ প্ৰাইভেট লিমিটেডৰ বাৰাছাৰাণী জেনাই ক্ৰমে তৃতীয় আৰু চতুৰ্থ স্থান লাভ কৰে ।
বাণিজ্য মন্ত্ৰালয়ে জনোৱা মতে, বিজয়ী প্ৰতিযোগীয়ে ₹১ লাখ টকাৰ নগদ পুৰস্কাৰ লাভ কৰে। দ্বিতীয় আৰু তৃতীয় স্থান লাভ কৰা সকলে ক্ৰমে ৭৫,০০০ আৰু ৫০,০০০ ₹ নগদ পুৰস্কাৰ লাভ কৰে। চতুৰ্থ স্থানত বিজয়ী প্ৰতিযোগীয়ে ২৫ হাজাৰ ₹ৰ সান্ত্বনা পুৰস্কাৰ লাভ কৰিব।
মন্ত্ৰালয়ৰ মতে, এই অনুষ্ঠানৰ পূৰ্বে এমপিইডিএই ভাৰতৰ পূব আৰু পশ্চিম উপকূলত সাগৰীয় খাদ্যৰ মূল্য সংযোজনৰ সৈতে জড়িত ৫০টা প্ৰশিক্ষণ কাৰ্যসূচী অনুষ্ঠিত কৰিছিল। এই কাৰ্যসূচীসমূহৰ জৰিয়তে ২৫০০ৰো অধিক সাগৰীয় খাদ্য প্ৰক্ৰিয়াকৰণ কৰ্মী আৰু পেছাদাৰীক আন্তঃৰাষ্ট্ৰীয় বজাৰত অধিক চাহিদা থকা সাগৰীয় খাদ্য সামগ্ৰী উৎপাদনৰ প্ৰশিক্ষণ দিয়া হৈছিল।
অলিম্পিয়াডৰ আঞ্চলিক মঞ্চসমূহ পশ্চিম উপকূলীয় অঞ্চলৰ বাবে মুম্বাইত আৰু পূব উপকূলীয় অঞ্চলৰ বাবে বিশাখাপট্টনমত অনুষ্ঠিত হৈছিল। ৩০ জুনত অনুষ্ঠিত এই আঞ্চলিক প্ৰতিযোগিতাসমূহত অংশগ্ৰহণকাৰীৰ মাজৰ পৰা দহজন চূড়ান্ত প্ৰতিযোগীক নিৰ্বাচিত কৰা হয়। গ্ৰেণ্ড ফিনালেৰ সময়ত অংশগ্ৰহণকাৰীসকলক আন্তঃৰাষ্ট্ৰীয় বজাৰত অধিক চাহিদা থকা ছটা মূল্য সংযোজিত সাগৰীয় খাদ্য সামগ্ৰী প্ৰস্তুত কৰাৰ দায়িত্ব দিয়া হৈছিল। ইয়াৰ ভিতৰত আছিল নোবাছি চিংৰা, ব্ৰেডেড বাটাৰফ্লাই চিংৰা, কুকড পিল্ড ডেভেইনড টেইল-অন চিংৰা, মেৰিনেটেড চিংৰা স্কেৱাৰ, ব্ৰেডেড স্কুইড ৰিং, আৰু ফিচ ফিলেট।
এম পি ই ডি এৰ অধ্যক্ষ পি জৱাহৰ, সঞ্চালক ড০ ৰাম মোহন এম কে, সম্পাদক ড০ গিবিন কুমাৰ, যুটীয়া সঞ্চালক শ্ৰী অনিল কুমাৰ, আৰু মুখ্য অতিথি আৰু ভাৰতীয় সাগৰীয় খাদ্য ৰপ্তানিকাৰক সংস্থাৰ মুখ্য কাৰ্যবাহী বিষয়া (চি ই অ’) ড০ কে.এন. ৰাঘৱনে বিজয়ীসকলক নগদ ধনৰ পুৰস্কাৰ, পদক আৰু প্ৰমাণ পত্ৰ প্ৰদান কৰে ।
এমপিইডিএৰ অধ্যক্ষ পি জৱাহৰে কয় যে এই অলিম্পিয়াড আন্তঃৰাষ্ট্ৰীয় বজাৰৰ পৰিৱৰ্তিত আশা পূৰণ কৰিবলৈ সক্ষম হ’ব পৰা এক শক্তিশালী আৰু বিশ্বব্যাপী প্ৰতিযোগিতামূলক সাগৰীয় খাদ্য খণ্ড গঢ়ি তোলাৰ দিশত এক গুৰুত্বপূৰ্ণ মাইলৰ খুঁটি। এমপিইডিএই গুণগত নিশ্চয়তা, খাদ্য সুৰক্ষা, প্ৰক্ৰিয়াকৰণৰ উৎকৃষ্টতা, কৰ্মশক্তিৰ দক্ষতা বিকাশ, বহনক্ষম সাগৰীয় খাদ্য উৎপাদন, আৰু নিৰ্ভৰযোগ্য যোগান শৃংখল শক্তিশালী কৰাৰ বাবে অহৰহ চেষ্টা কৰি আছে।
তেওঁ উল্লেখ কৰে যে এই অলিম্পিয়াডে ভাৰতৰ সাগৰীয় খাদ্য ৰপ্তানি পৰিৱেশ তন্ত্ৰক শক্তিশালী কৰাৰ বাবে এক গুৰুত্বপূৰ্ণ মঞ্চ হিচাপে কাম কৰে। এই অনুষ্ঠানত কেন্দ্ৰ আৰু ৰাজ্য চৰকাৰৰ জ্যেষ্ঠ বিষয়া, সাগৰীয় খাদ্য ৰপ্তানিকাৰক, আন্তঃৰাষ্ট্ৰীয় ক্ৰেতা, উদ্যোগ প্ৰতিনিধি, কাৰিকৰী বিশেষজ্ঞ, আৰু ছিফুড এক্সপ’ ইণ্ডিয়া ২০২৬ত অংশগ্ৰহণ কৰা প্ৰতিনিধিসকল উপস্থিত থাকে।
--------------
হিন্দুস্থান সমাচাৰ / অৰৱিন্দ
