নতুন দিল্লী, ০২ জুলাই (হি.স.)। প্ৰধানমন্ত্ৰী নৰেন্দ্ৰ মোডী আৰু জাপানৰ প্ৰধানমন্ত্ৰী ছানাই তাকাইচিয়ে বৃহস্পতিবাৰে হায়দৰাবাদ হাউচত প্ৰতিনিধি পৰ্যায়ৰ আলোচনাত মিলিত হয়। দুয়োগৰাকী নেতাই ভাৰত-প্ৰশান্ত মহাসাগৰীয় অঞ্চলত বাণিজ্য, বিনিয়োগ, প্ৰতিৰক্ষা, প্ৰযুক্তি, সহযোগিতাকে ধৰি বিভিন্ন দ্বিপাক্ষিক আৰু বিশ্বব্যাপী বিষয়ৰ ওপৰত আলোচনা কৰে। এই আলোচনাৰ লক্ষ্য আছিল ভাৰত-জাপান বিশেষ কৌশলগত আৰু বিশ্বব্যাপী অংশীদাৰিত্ব আৰু অধিক শক্তিশালী কৰা ।

ইয়াৰ পূৰ্বে জাপানৰ প্ৰধানমন্ত্ৰী তাকাইচিক ৰাষ্ট্ৰপতি ভৱনৰ আগফালৰ চোতালত আনুষ্ঠানিকভাৱে আদৰণি জনোৱা হয়। প্ৰধানমন্ত্ৰী মোডীৰ উপস্থিতিত তেওঁক আনুষ্ঠানিকভাৱে গাৰ্ড অৱ অনাৰ প্ৰদান কৰা হয়। আদৰণি অনুষ্ঠানৰ সময়ত প্ৰধানমন্ত্ৰী মোদীয়ে তাকাইচিক তেওঁৰ কেবিনেট সতীৰ্থ আৰু অন্যান্য বিশিষ্ট ব্যক্তিসকলৰ সৈতে চিনাকি কৰাই দিয়ে। এই অনুষ্ঠানত তিনিটা সশস্ত্ৰ বাহিনীৰ মাৰ্চিং কন্টিংজেণ্ট আৰু সামৰিক বেণ্ডেও অনুষ্ঠান পৰিৱেশন কৰে।

বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে ছ’চিয়েল মিডিয়া প্লেটফৰ্ম এক্সত কয় যে প্ৰধানমন্ত্ৰী মোদীয়ে হায়দৰাবাদ হাউছত জাপানৰ প্ৰধানমন্ত্ৰী তাকাইচিক উষ্ম আদৰণি জনাইছে, যাৰ ফলত আস্থা, ভাগ-বতৰা কৰা মূল্যবোধ, আৰু কৌশলগত সমন্বয়ৰ ওপৰত ভিত্তি কৰি অংশীদাৰিত্বক আগুৱাই লৈ গৈছে।

আন এটা পোষ্টত জয়ছোৱালে ৰাষ্ট্ৰপতি ভৱনত অনুষ্ঠিত হোৱা অভ্যৰ্থনাৰ কথা উল্লেখ কৰি কয় যে ভাৰত আৰু জাপানৰ বিশেষ অংশীদাৰিত্ব আৰু অধিক শক্তিশালী কৰা হৈছে। ভাগ-বতৰা কৰা মূল্যবোধ আৰু বিশ্বাসৰ ওপৰত ভিত্তি কৰি গঢ়ি উঠা এই অংশীদাৰিত্বই ভৱিষ্যতক গঢ় দিব।

১৬ সংখ্যক ভাৰত-জাপান বাৰ্ষিক সন্মিলনত অংশগ্ৰহণৰ বাবে প্ৰধানমন্ত্ৰী মোডীৰ আমন্ত্ৰণত জাপানৰ প্ৰধানমন্ত্ৰী তাকাইচিয়ে ১ জুলাইৰ পৰা ৩ জুলাইলৈ ভাৰত ভ্ৰমণ কৰিব। এয়া তেওঁৰ ভাৰত ভ্ৰমণৰ প্ৰথম আনুষ্ঠানিক ভ্ৰমণ। আনুষ্ঠানিক আদৰণিৰ অন্তত তেওঁ বৈদেশিক পৰিক্ৰমা মন্ত্ৰী ড০ এছ জয়শংকৰৰ লগতে কেন্দ্ৰীয় কেবিনেটৰ অন্যান্য সদস্যসকলৰ সৈতেও সাক্ষাৎ কৰে।

তিনিদিনীয়া ভ্ৰমণৰ বাবে বুধবাৰে নতুন দিল্লীত উপস্থিত হয় টাকাইচি। প্ৰধানমন্ত্ৰী মোদীয়ে ছ’চিয়েল মিডিয়া প্লেটফৰ্ম এক্সত তেওঁক আদৰণি জনাই কয় যে তেওঁৰ প্ৰথম ভাৰত ভ্ৰমণত তেওঁক আতিথ্য প্ৰদান কৰাটো এক আনন্দৰ কথা। দুয়োখন দেশৰ বিশেষ কৌশলগত আৰু বিশ্বব্যাপী অংশীদাৰিত্ব আৰু অধিক শক্তিশালী কৰাৰ বাবে বিভিন্ন বিষয়ত এক ব্যাপক আলোচনা অনুষ্ঠিত হ’ব আৰু ভাৰত-প্ৰশান্ত মহাসাগৰীয় অঞ্চল আৰু ইয়াৰ বাহিৰত শান্তি, স্থিতিশীলতা, আৰু সমৃদ্ধিৰ প্ৰসাৰৰ বাবে দুয়োখন দেশে একেলগে কাম কৰি যাব ।

-----------

হিন্দুস্থান সমাচাৰ / অৰৱিন্দ