নতুন দিল্লী, ০২ জুলাই (হি.স.)। শেহতীয়াকৈ মণিপুৰত সংঘটিত ঘটনাক লৈ কেন্দ্ৰীয় চৰকাৰক সমালোচনা কৰিছে প্ৰাক্তন কংগ্ৰেছ সভাপতি তথা লোকসভাত বিৰোধী দলৰ নেতা ৰাহুল গান্ধীয়ে। তেওঁ কয় যে মণিপুৰ বছৰ বছৰ ধৰি হিংসাত্মক পৰিস্থিতিয়ে আগুৰি ধৰিছে আৰু এতিয়াও পৰিস্থিতি স্বাভাৱিক হোৱা নাই। আনকি ৰাজ্যত ৰাষ্ট্ৰপতিৰ শাসন জাপি দিয়া হৈছিল যদিও পৰিস্থিতিৰ কোনো পৰিৱৰ্তন দেখা পোৱা নাই।

বৃহস্পতিবাৰে ৰাহুল গান্ধীয়ে ছ’চিয়েল মিডিয়া প্লেটফৰ্ম এক্সত কয় যে মণিপুৰত ঘৃণা আৰু হিংসাৰ জুইত পুনৰবাৰ ২০টা ঘৰ ধ্বংস হৈছে। হাজাৰ হাজাৰ লোকে প্ৰাণ হেৰুৱাইছে, আৰু অগণন পৰিয়াল বিধ্বস্ত হৈছে । মণিপুৰে যি দুখ-কষ্টৰ মাজেৰে পাৰ হৈ গৈছে সেয়া কল্পনা কৰাটো কঠিন।

ধৰ্ম, জাতি, ভাষা, অঞ্চল, পৰিচয় আদিৰ ভিত্তিত মানুহক বিভাজিত কৰা কেন্দ্ৰীয় চৰকাৰৰ মতাদৰ্শৰ ফল এই পৰিস্থিতি বুলি তেওঁ অভিযোগ কৰে। আজি কেৱল মণিপুৰেই নহয়, সমগ্ৰ দেশে সহানুভূতিৰ আশা হেৰুৱাই পেলাইছে।

ৰাহুল গান্ধীয়ে কয় যে মণিপুৰ উন্নত ভৱিষ্যতৰ যোগ্য, আৰু ইয়াৰ বাবে সামাজিক সংহতিৰ প্ৰয়োজন। দেশখন ঐক্যবদ্ধ হৈ থকা আৰু বিভাজনকাৰী ৰাজনীতিৰ ওপৰত উঠি অহাৰ প্ৰয়োজন।

উল্লেখযোগ্য যে বুধবাৰে মণিপুৰৰ কামজং জিলাৰ ভাৰত-ম্যানমাৰ সীমান্তৰ সমীপত নগা আৰু কুকি জনগোষ্ঠীৰ মাজত সংঘৰ্ষৰ সময়ত ২০টাতকৈও অধিক ঘৰত জুই লগাই দিয়া হয়। এই ঘটনাৰ পিছতে অঞ্চলটোত উত্তেজনা অব্যাহত আছে, আৰু নিৰাপত্তা বাহিনী মোতায়েন কৰা হৈছে।

হিন্দুস্থান সমাচাৰ / অৰৱিন্দ