কোকৰাঝাৰ, ০২ জুলাই (হি.স.)। আজি বিটিচি প্ৰধান হাগ্ৰামা মহিলাৰীয়ে কোকৰাঝাৰৰ বিটিচি সচিবালয়ৰ সন্মিলন কক্ষত অনুষ্ঠিত এখন উচ্চ পৰ্যায়ৰ বিভাগীয় পৰ্যালোচনা বৈঠকত সভাপতিত্ব কৰি কোকৰাঝাৰ জিলাত ৰূপায়ণ হৈ থকা বিভিন্ন উন্নয়নমূলক আঁচনি আৰু আন্তঃগাঁথনি প্ৰকল্প সমূহৰ অগ্ৰগতি পৰ্যালোচনা কৰে। বৈঠকত সময়মতে কাম সম্পূৰ্ণ কৰা, গুণগত মান নিশ্চিত কৰা আৰু স্বচ্ছতাৰে প্ৰকল্প সমূহ ৰূপায়ণ কৰাৰ ওপৰত বিশেষ গুৰুত্ব আৰোপ কৰা হয়।

বৈঠকৰ আৰম্ভণিতে বিটিচিৰ সচিব কৰ্মদেৱ ব্ৰহ্মই আদৰণি ভাষণ প্ৰদান কৰে। বৈঠকত বিধায়ক ৰূপম ৰায়, আশ্ৰাফুল ইছলাম শ্বেখ আৰু সভাৰাম বসুমতাৰী, এমচিএলএ ধনেশ্বৰ গয়াৰী, অনতাজ আলী, যুবিৰাজ বসুমতাৰি আৰু আজামুল হক; কাৰ্যবাহী সদস্য ডেৰহাছাত বসুমতাৰী, ৰবিৰাম নাৰ্জাৰী, মৃত্যুঞ্জয় নাৰ্জাৰী আৰু প্ৰকাশ বসুমতাৰী উপস্থিত থকাৰ লগতে বিভিন্ন বিভাগৰ সচিব আৰু জ্যেষ্ঠ বিষয়াসকলেও অংশগ্ৰহণ কৰে।

বৈঠকত লোক নিৰ্মাণ বিভাগ (পথ), লোক নিৰ্মাণ বিভাগ (ভৱন), পঞ্চায়ত আৰু গ্ৰামোন্নয়ন বিভাগ আৰু পৌৰ পৰিষদৰ কাম-কাজৰ অগ্ৰগতিৰ লগতে পঞ্চদশ বিত্ত আয়োগ আৰু ষষ্ঠ ৰাজ্যিক বিত্ত আয়োগৰ অধীনত ৰূপায়ণ হৈ থকা প্ৰকল্পসমূহৰ অগ্ৰগতি পৰ্যালোচনা কৰা হয়। ইয়াৰ উপৰিও প্ৰধানমন্ত্ৰী আৱাস যোজনা–গ্ৰামীণ (PMAY-G), মনৰেগা (MGNREGA), ৰাষ্ট্ৰীয় সামাজিক সহায়তা কাৰ্যসূচী (NSAP), প্ৰধানমন্ত্ৰী গ্ৰাম সড়ক যোজনা (PMGSY), দীনদয়াল উপাধ্যায় গ্ৰামীণ কৌশল্য যোজনা (DDU-GKY), অসমমালা, প্ৰধানমন্ত্ৰী আয়ুষ্মান ভাৰত স্বাস্থ্য আন্তঃগাঁথনি অভিযান (PM-ABHIM), দীনদয়াল দক্ষতা প্ৰশিক্ষণ কাৰ্যসূচী, নগৰ উন্নয়ন প্ৰকল্প, মিনি ষ্টেডিয়াম, দক্ষতা কেন্দ্ৰ, স্ব-সহায়ক গোট (SHG)-ৰ বিভিন্ন কাৰ্যকলাপ আদি আঁচনি আৰু প্ৰকল্পসমূহৰ অগ্ৰগতিও পৰ্যালোচনা কৰা হয়।

বৈঠকত বিটিচি প্ৰধানগৰাকীয়ে সংশ্লিষ্ট বিভাগসমূহক প্ৰকল্প ৰূপায়ণত উদ্ভৱ হোৱা বাধাসমূহ অতি শীঘ্ৰে দূৰ কৰিবলৈ, নিৰ্ধাৰিত সময়সীমাৰ ভিতৰত কাম সম্পূৰ্ণ কৰিবলৈ আৰু প্ৰতিটো পৰ্যায়ত জবাবদিহিতা নিশ্চিত কৰিবলৈ নিৰ্দেশ দিয়ে। তেওঁ কয় যে জনসাধাৰণৰ স্বাৰ্থত উন্নত আন্তঃগাঁথনি গঢ়ি তুলি উন্নত সেৱা প্ৰদান নিশ্চিত কৰিবলৈ সকলো উন্নয়নমূলক কাম গুণগত মান আৰু স্বচ্ছতা বজাই ৰাখি সময়মতে সম্পূৰ্ণ হ’ব লাগিব।

হাগ্ৰামা মহিলাৰীয়ে লগতে জানিবলৈ দিয়ে যে বৈঠকত উপস্থাপন কৰা অগ্ৰগতিৰ ভিত্তিত আকস্মিক পৰিদৰ্শন আৰু পৰ্যালোচনা চলোৱা হ’ব। তেওঁ সংশ্লিষ্ট বিভাগসমূহক অসম্পূৰ্ণ কামসমূহ দ্ৰুতগতিত আগবঢ়াই সম্পূৰ্ণ কৰাৰ বাবে নিৰ্দেশ দিয়ে। তেওঁ লগতে ঘোষণা কৰে যে পৰৱৰ্তী বিভাগীয় পৰ্যালোচনা বৈঠক ছেপ্টেম্বৰ মাহত অনুষ্ঠিত হ’ব য’ত বিভিন্ন বিভাগে লাভ কৰা অগ্ৰগতি আৰু প্ৰদান কৰা নিৰ্দেশনাসমূহৰ ৰূপায়ণ পৰ্যালোচনা কৰা হ’ব।

হিন্দুস্থান সমাচাৰ / কিশোৰ মিশ্ৰ