মাদুৰাই, ১৩ জুলাই (হি.স.)। তামিলনাডুৰ মাদুৰাইৰ সমীপত সোমবাৰে পুৱা চৰকাৰী বাছ আৰু ব্যক্তিগত অমিনিবাছৰ মাজত মুখামুখি সংঘৰ্ষত এগৰাকী মহিলাসহ পাঁচজন লোকৰ মৃত্যু হয়। দুৰ্ঘটনাটোত গুৰুতৰভাৱে আহত দুয়োখন বাছৰ ৪১জন যাত্ৰীক প্ৰাথমিক চিকিৎসাৰ বাবে মেলুৰ চৰকাৰী চিকিৎসালয়লৈ প্ৰেৰণ কৰা হয় আৰু পিছত উন্নত চিকিৎসাৰ বাবে মাদুৰাইৰ ৰাজাজী চৰকাৰী চিকিৎসালয়ত ভৰ্তি কৰোৱা হয়।

মাদুৰাই জিলাৰ কোট্টমপট্টিৰ সমীপৱৰ্তী ভানজিনাগৰম গাঁৱৰ চাৰিলেনযুক্ত ঘাইপথত সংঘটিত হয় এই দুৰ্ঘটনা। পুৱাৰ ভাগত দুয়োখন বাছ তীব্ৰ বেগেৰে গৈ থকা অৱস্থাত সংঘটিত হয় এই দুৰ্ঘটনা। চেন্নাইৰ পৰা মাৰ্থানডামলৈ গৈ থকা ব্যক্তিগত অমিনিবাছখনে ভানজিনাগৰম গাঁৱৰ কাষ চাপি অহাৰ লগে লগে নিয়ন্ত্ৰণ হেৰুৱাই পেলায়। চেন্নাইৰ পৰা মাৰ্থানডাম অভিমুখে গৈ থকা বাছখনৰ চালকজনে প্ৰথমে ৰোড ডিভাইডাৰৰ সৈতে খুন্দা মাৰে। ইয়াৰ পিছতে বাছখনে নিয়ন্ত্ৰণ হেৰুৱাই বিপৰীত লেন পাৰ হৈ মাদুৰাইৰ পৰা তিৰুচিৰাপল্লীলৈ যোৱা চৰকাৰী বাছৰ সৈতে মুখামুখি সংঘৰ্ষত লিপ্ত হয়।

চৰকাৰী বাছখনৰ সৈতে খুন্দা মৰাৰ পিছত ব্যক্তিগত অমিনিবাছখনে বাওঁফালে ঘূৰি ভানজিনাগৰম গাঁৱৰ ৰাজহুৱা অপেক্ষা কক্ষ (বাছ আশ্ৰয় শিবিৰ)ত খুন্দা মাৰে। ইয়াৰ প্ৰভাৱ ইমানেই ভয়াৱহ আছিল যে ৱেটিং ৰুমটো ভাঙি ক্ষতিগ্ৰস্ত হয়। এই ভয়ংকৰ মুখামুখি সংঘৰ্ষত দুয়োখন বাহনৰ সন্মুখৰ অংশ সম্পূৰ্ণৰূপে ক্ষতিগ্ৰস্ত হয়। থিতাতে নিহত এগৰাকী মহিলাসহ পাঁচজন লোক। দুয়োখন বাছৰ ৪১ জন যাত্ৰী গুৰুতৰভাৱে আহত হয়। কোট্টামপট্টি আৰক্ষী আৰু স্থানীয় বাসিন্দাই ঘটনাস্থলীত উপস্থিত হৈ আহতসকলক উলিয়াই আনি প্ৰাথমিক চিকিৎসাৰ বাবে মেলুৰ চৰকাৰী চিকিৎসালয়লৈ প্ৰেৰণ কৰে।

মেলুৰ চৰকাৰী চিকিৎসালয়ত প্ৰাথমিক চিকিৎসা গ্ৰহণ কৰাৰ পিছত আহত আটাইকেইজনক উন্নত চিকিৎসাৰ বাবে মাদুৰাইৰ ৰাজাজী চৰকাৰী চিকিৎসালয়ত ভৰ্তি কৰা হৈছে। আৰক্ষীয়ে গোচৰ ৰুজু কৰি দুৰ্ঘটনাটোৰ তদন্ত আৰম্ভ কৰিছে। প্ৰাৰম্ভিক তদন্ততো চালকজনৰ টোপনি অহাৰ বাবেই দুৰ্ঘটনাটো সংঘটিত হৈছে নেকি, কিয়নো পুৱাতে দুৰ্ঘটনা সংঘটিত হৈছে। এই দুৰ্ঘটনাৰ বাবে ৰাষ্ট্ৰীয় ঘাইপথত কেইবা ঘণ্টা ধৰি যাতায়ত ব্যাহত হৈ পৰে।

ঘটনাস্থলীত নগৰৰ উপ-মহাপৰিদৰ্শক অভিনৱ কুমাৰ আৰু জিলা আৰক্ষী অধীক্ষক দেৱনাথনে উপস্থিত হৈ ঘটনাৰ তদন্ত আৰম্ভ কৰে। মৃত লোকজনক চিনাক্ত কৰি সবিশেষ সংগ্ৰহৰ বাবেও আৰক্ষীয়ে কাম কৰি আছে। দুৰ্ঘটনাটোৰ বিষয়ে তথ্য লাভ কৰাৰ লগে লগে মাদুৰাই জিলা উপায়ুক্ত নিশান্ত কৃষ্ণই মেলুৰ চৰকাৰী চিকিৎসালয়লৈ যায় আৰু আহতসকলক সাক্ষাৎ কৰি তেওঁলোকৰ মংগলৰ বিষয়ে সোধা-পোছা কৰে। আহতসকলক সান্ত্বনা দি চিকিৎসকৰ পৰা তেওঁলোকৰ চিকিৎসা আৰু স্বাস্থ্য সম্পৰ্কে বিতং তথ্য লাভ কৰে।

--------------

হিন্দুস্থান সমাচাৰ / অৰৱিন্দ