দক্ষিণ ২৪ পৰগনা, ১৩ জুলাই (হি.স.)। পশ্চিম বংগৰ দক্ষিণ ২৪ পৰগনা জিলাৰ বক্খালী উপকূলৰ সমীপত নিৰুদ্দেশ হোৱা মাছ ধৰা ট্ৰলাৰ মা কালি উদ্ধাৰ কৰা হৈছে। দেওবাৰে গভীৰ নিশা ট্ৰলাৰখনৰ পৰা আৰু চাৰিজন মাছমৰীয়াৰ মৃতদেহ উদ্ধাৰ কৰা হয়। ইয়াৰ পূৰ্বে দেওবাৰে উদ্ধাৰ কৰা হয় ৫টা মৃতদেহ। ইয়াৰ ফলত দুৰ্ঘটনাটোত মৃত্যু হোৱা লোকৰ সংখ্যা ৯ জনলৈ বৃদ্ধি পোৱাৰ বিপৰীতে নিৰুদ্দেশ হৈ আছে ছয়জন মাছমৰীয়া আৰু সন্ধান অব্যাহত আছে।

প্ৰশাসনিক বিষয়া আৰু মাছমৰীয়াসকলে গোটেই নিশা ট্ৰলাৰখনৰ ভিতৰত আৰু চাৰিওফালে এক নিবিড় অনুসন্ধান অভিযান চলায়। আশংকা কৰা হৈছে যে দুৰ্ঘটনাৰ সময়ত একাংশ মাছমৰীয়াক উচ্চ ঢৌৱে উটুৱাই নিব পাৰে। এই সন্দৰ্ভত মুখ্যমন্ত্ৰীক অৱগত কৰা হৈছে আৰু অধিক ব্যৱস্থা গ্ৰহণৰ কথা চিন্তা-চৰ্চা কৰা হৈছে।

দেওবাৰে নিশা ঘটনাস্থলীত উপস্থিত হয় সুন্দৰবন উন্নয়ন বিভাগৰ ৰাজ্যিক মন্ত্ৰী ডেপাংকৰ জানা। পাথৰপ্ৰতিমাৰ গোৱৰ্ধনপুৰ উপকূলীয় থানা এলেকাৰ সীতাৰামপুৰ ঘাটত চলি থকা সাহায্য আৰু উদ্ধাৰ অভিযানৰ ওপৰত গোটেই নিশা নিৰীক্ষণ কৰে। কাকদ্বীপ মহকুমা প্ৰশাসন, সুন্দৰবন আৰক্ষী, গোৱৰ্ধনপুৰ উপকূলীয় থানা, বন বিভাগ, আৰু মাছমৰীয়া সংগঠনৰ প্ৰতিনিধিও উপস্থিত থাকে।

তথ্য অনুসৰি মা কালি ট্ৰ'লাৰখনে ২ জুলাইত দীঘাৰ শংকৰপুৰ বন্দৰৰ পৰা মাছ ধৰিবলৈ সাগৰলৈ ৰাওনা হয়। ৫ জুলাইত ট্ৰলাৰখনৰ সৈতে যোগাযোগ হেৰাই গৈছিল। ইয়াৰ পিছতে আৰক্ষী, ক’ষ্ট গাৰ্ড, নৌসেনা, বন বিভাগ, আৰু মাছমৰীয়া সংগঠনে যৌথভাৱে অনুসন্ধান অভিযান আৰম্ভ কৰে।

উল্লেখযোগ্য যে যোৱা দেওবাৰে দক্ষিণ ২৪ পৰগনাৰ বক্খালী উপকূলৰ পৰা প্ৰায় ৩৫ কিলোমিটাৰ দূৰত্বত চুলাকাঠি বনাঞ্চলৰ সমীপৰ বাঘেৰচৰ অঞ্চলত ট্ৰলাৰখন উলটি থকা অৱস্থাত উদ্ধাৰ হৈছিল। যৌথ অভিযানৰ অন্তত ট্ৰলাৰখন সীতাৰপুৰ ঘাটলৈ অনা হয় আৰু তাত এজন এজনকৈ ৯জন মাছমৰীয়াৰ মৃতদেহ উদ্ধাৰ কৰা হয়। বৰ্তমান নিৰুদ্দেশ হোৱা ছয়জন মাছমৰীয়াৰ সন্ধান অব্যাহত আছে।

-----------------

হিন্দুস্থান সমাচাৰ / অৰৱিন্দ