নতুন দিল্লী, ১২ জুলাই (হি.স.)। কেন্দ্ৰীয় চৰকাৰে ১৩-১৪ জুলাইত শ্বিলঙত ‘পৰৱৰ্তী প্ৰধান প্ৰশাসনিক আৰু ই-শাসন সংস্কাৰ’ বিষয়ক ৰাষ্ট্ৰীয় সন্মিলন অনুষ্ঠিত কৰিব। উদ্বোধনী অধিৱেশনত কেন্দ্ৰীয় ৰাজ্যিক মন্ত্ৰী (পাৰ্ছনেল) ড° জিতেন্দ্ৰ সিং আৰু মেঘালয়ৰ মুখ্যমন্ত্ৰী কনৰাড কে চাংমাই ভাষণ দিব।

কেন্দ্ৰীয় কৰ্মচাৰী, ৰাজহুৱা অভিযোগ আৰু পেঞ্চন মন্ত্ৰালয়ে উল্লেখ কৰে যে প্ৰশাসনিক সংস্কাৰ আৰু ৰাজহুৱা অভিযোগ বিভাগে মেঘালয় চৰকাৰৰ সহযোগত এই অনুষ্ঠানৰ আয়োজন কৰিব। জ্যেষ্ঠ বিষয়া, জিলা সংগ্ৰাহক, আৰু শাসন বিশেষজ্ঞকে ধৰি ৩০ জনতকৈ অধিক বক্তাই তেওঁলোকৰ বঁটা বিজয়ী পদক্ষেপ আৰু উদ্ভাৱনীমূলক প্ৰশাসনিক অভিজ্ঞতাসমূহ ভাগ-বতৰা কৰিব।

এই সন্মিলনৰ লক্ষ্য হৈছে পৰৱৰ্তী প্ৰজন্মৰ প্ৰশাসনিক সংস্কাৰ, ডিজিটেল শাসন, আৰু নাগৰিককেন্দ্ৰিক জনসেৱা প্ৰদানৰ ওপৰত আলোচনা কৰা। উদ্বোধনী অধিৱেশনত ডি এ আৰ পি জিৰ সম্পাদিকা নিবেদিতা শুক্লা ভাৰ্মা আৰু মেঘালয়ৰ মুখ্য সচিব ড০ শকীল পি আহমেদে ভাষণ দিব। এই সন্মিলনত কেন্দ্ৰ আৰু ৰাজ্য চৰকাৰৰ উচ্চপদস্থ বিষয়া, নীতি নিৰ্ধাৰক, শিক্ষাবিদ, প্ৰশাসনিক বিশেষজ্ঞকে ধৰি ৩০০ৰো অধিক অংশগ্ৰহণকাৰীয়ে অংশগ্ৰহণ কৰাৰ সম্ভাৱনা আছে।

দুদিনীয়া এই সন্মিলনত প্ৰধানমন্ত্ৰীৰ বঁটা বিজয়ী পদক্ষেপ (২০২৩ আৰু ২০২৪), ৰাষ্ট্ৰীয় ই-গভৰ্নেন্স বঁটা বিজয়ী প্ৰকল্প, মেঘালয় চৰকাৰৰ উত্তম পদ্ধতি, আৰু উত্তৰ-পূব অঞ্চলৰ ডিএআৰপিজি সমৰ্থিত পদক্ষেপৰ ওপৰত উপস্থাপন কৰা হ’ব। বিষয়সমূহৰ ভিতৰত থাকিব জিলা পৰ্যায়ৰ সামগ্ৰিক উন্নয়ন, ডিজিটেল শাসন, চাইবাৰ সুৰক্ষা, স্বাস্থ্য, শিক্ষা, গ্ৰাহক সুৰক্ষা, বেংকিং, নগৰ আৰু গ্ৰাম্য শাসন, আৰু প্ৰযুক্তি সক্ষম শাসন।

এই সন্মিলনৰ আৰম্ভণিতে মেঘালয় চৰকাৰৰ উত্তম পদ্ধতিৰ ওপৰত বিশেষ অধিবেশন অনুষ্ঠিত হ’ব, য’ত ৰাজ্যখনৰ অভিনৱ প্ৰশাসনিক পদক্ষেপ আৰু নাগৰিককেন্দ্ৰিক সংস্কাৰ প্ৰদৰ্শন কৰা হ’ব। ইয়াৰ পিছতে প্ৰধানমন্ত্ৰীৰ বঁটা বিজয়ী পদক্ষেপ আৰু ৰাষ্ট্ৰীয় ই-শাসন বঁটা বিজয়ী প্ৰকল্পৰ ওপৰত অধিৱেশন অনুষ্ঠিত হ’ব।

উত্তৰ-পূব অঞ্চলৰ উন্নয়নৰ ওপৰত গুৰুত্ব আৰোপ কৰা এই অধিবেশনত বাঁহ আৰু আগৰ কাঠৰ মূল্য শৃংখল, পৰ্যটন, আঞ্চলিক আন্তঃগাঁথনি, প্ৰকল্প নিৰীক্ষণ, আৰু আন্তঃৰাজ্যিক সহযোগিতা আদি বিষয়ৰ ওপৰত আলোচনা কৰা হ’ব। মেঘালয়, মিজোৰাম, আৰু নাগালেণ্ডৰ পৰাও ডিএআৰপিজি সহযোগিতামূলক পদক্ষেপসমূহ উপস্থাপন কৰা হ’ব।

হিন্দুস্থান সমাচাৰ / মনোজ কুমাৰ শইকীয়া