কোকৰাঝাৰ, ১১ জুলাই (হি.স.)। বডোলেণ্ড অঞ্চলৰ যুৱক-যুৱতীসকলৰ বাবে এক সুন্দৰ খবৰ। দীৰ্ঘদিনীয়া দাবী পূৰণ কৰি কেন্দ্ৰীয় ৰে’ল মন্ত্ৰালয়ে কোকৰাঝাৰত ৰে’ল নিযুক্তি ব’ৰ্ডৰ পৰীক্ষা কেন্দ্ৰ স্থাপনৰ বাবে আনুষ্ঠানিকভাৱে অনুমোদন জনাইছে ।
সাংসদ প্ৰমোদ বড়োৱে এই তথ্য ছ’চিয়েল মিডিয়াৰ জৰিয়তে শ্বেয়াৰ কৰে। তেওঁ উল্লেখ কৰে যে বিটিচিত ইউপিপিএল নেতৃত্বাধীন চৰকাৰৰ কাৰ্যকালত কৰা বিশেষ প্ৰচেষ্টাৰ ফলত এই সাফল্য সম্ভৱ হৈ উঠিছে। এই সিদ্ধান্তই অঞ্চলটোৰ শিক্ষিত যুৱক-যুৱতীসকলৰ বাবে ৰে’লৱেত নতুন কৰ্মসংস্থাপনৰ সুযোগ মুকলি কৰিব।
সাংসদগৰাকীয়ে কেন্দ্ৰীয় ৰে’ল মন্ত্ৰী অশ্বিনী বৈষ্ণৱ আৰু ৰে’লৱে ব’ৰ্ডৰ অধ্যক্ষ তথা মুখ্য কাৰ্যবাহী বিষয়া সতীশ কুমাৰৰ প্ৰতি কৃতজ্ঞতা জ্ঞাপন কৰে। তেওঁ কয় যে কোকৰাঝাৰত এটা পৰীক্ষা কেন্দ্ৰ স্থাপন কৰিলে পৰীক্ষাৰ্থীসকলে দীৰ্ঘ দূৰত্ব যাবলগীয়া হোৱাৰ পৰা ৰক্ষা পৰিব আৰু চৰকাৰী নিযুক্তি পৰীক্ষাৰ বাবে ভৌগোলিক অসুবিধাৰ সন্মুখীন হ’ব নালাগিব, যাৰ ফলত বডোলেণ্ডৰ হাজাৰ হাজাৰ যুৱক-যুৱতী পোনপটীয়াকৈ উপকৃত হ’ব।
--------------
হিন্দুস্থান সমাচাৰ / অৰৱিন্দ
14 Jul 2026