নগাঁও, ১১ জুলাই (হি.স.)। ৰহাৰ চাপৰমুখৰ চাঞ্চল্যকৰ শিশু অপহৰণকাৰী পৰিয়ালক পুলি-পোখাই উৎখাতৰ দাবী চাপৰমুখবাসীৰ৷ ৰাজহুৱা সভাৰ জৰিয়তে প্ৰশাসনক এই দাবী জনালে ৰাইজে৷ উল্লেখ্য যে যোৱা বুধবাৰে চাপৰমুখৰ মেহেৰুণ নেছা নামৰ আশাকৰ্মী এগৰাকীয়ে চাপৰমুখ কালীবাৰীৰ পৰা এটি ৮বছৰীয়া শিশুক ফুচুলাই অপহৰণ কৰিছিল৷

কিন্তু আৰক্ষীৰ তৎপৰতাত সেইদিনা নিশাই শিশুটিক উদ্ধাৰ কৰাৰ লগতে আটক কৰিছিল মেহেৰুণ নেছাসহ আন তিনিজন সহযোগীক৷ শুক্ৰবাৰে এই অপহৰণৰ মাষ্টাৰ মাইণ্ড সুভাষ দাস নামৰ শিশু সৰবৰাহকাৰী জনকো চাপৰমুখ আৰক্ষীয়ে নগাঁৱৰ পৰা আটক কৰিবলৈ সক্ষম হয়৷ পূৰ্ৱতে নঘটা এনে ঘটনাক লৈ উদ্বেগ প্ৰকাশ কৰিছে চাপৰমুখবাসীয়ে৷ এনে ঘটনাক লৈ চাপৰমুখত এক ৰাজহুৱা সভা অনুষ্ঠিত হয়৷

ৰাজহুৱা সভাত দুস্কৃতিকাৰী মেহেৰুণ নেছাৰ পৰিয়ালক চাপৰমুখৰ পৰা উৎখাত কৰিবলৈ প্ৰশাসনক দাবী জনাইছে৷ লগতে চাপৰমুখত উদ্বেগজনক ভাৱে বৃদ্ধি পোৱা ড্ৰাগছ, মদ, ভাং আদিৰ বিৰুদ্ধেও কঠোৰ হ’বলৈ আৰক্ষী প্ৰশাসনক দাবী জনাইছে ৰাইজে৷

হিন্দুস্থান সমাচাৰ / প্ৰকাশ ডেকা