- প্ৰতিবাদকাৰীয়ে শিলগুটি নিক্ষেপ কৰি ঘাইপথ অৱৰোধ, জিলাখনত জাৰি ১৬৩ ধাৰা

ভূপাল/দাতিয়া, ১১ জুলাই (হি.স.)। ভাৰতীয় জনতা পাৰ্টিয়ে মধ্যপ্ৰদেশৰ দতিয়া বিধানসভাৰ উপ-নিৰ্বাচনৰ বাবে আশুতোষ তিৱাৰীক প্ৰাক্তন গৃহমন্ত্ৰী ড° নৰোত্তম মিশ্ৰৰ ঠাইত মনোনীত কৰাৰ পিছতে জিলাখনত বিস্ফোৰণ ঘটিছে। টিকট সলনি কৰাত ক্ষুব্ধ সমৰ্থকসকলৰ প্ৰতিবাদ শনিবাৰে পুৱাই হিংসাত্মক হৈ পৰে, যাৰ ফলত জিলা প্ৰশাসনে আইন-শৃংখলা বজাই ৰাখিবলৈ ১৬৩ ধাৰা জাৰি কৰে।

সঁচাকৈয়ে দতিয়া বিধানসভাৰ উপ-নিৰ্বাচন ঘোষণাৰ পিছৰে পৰা এই অঞ্চলত সক্ৰিয়ভাৱে জড়িত হৈ আছিল প্ৰাক্তন গৃহমন্ত্ৰী ড০ নৰোত্তম মিশ্ৰ । আনকি মনোনয়ন পত্ৰও সংগ্ৰহ কৰিছিল আৰু ৰাজহুৱা সভাও অনুষ্ঠিত কৰিছিল। অৱশ্যে অন্তিম মুহূৰ্তত দলটোৱে আশুতোষ তিৱাৰীৰ নামত অনুমোদন জনায় । এই পৰ্যন্ত ১৩ জন লোকে দতিয়া আসনৰ বাবে প্ৰ-পত্ৰ ক্ৰয় কৰিছে, আৰু ইয়াৰে চাৰিজনে মনোনয়ন দাখিল কৰিছে। বিজেপিয়ে টিকট ঘোষণা কৰাৰ লগে লগে দলৰ ভিতৰৰ বিদ্ৰোহ চৰ্চালৈ আহিল। শুকুৰবাৰে ড° নৰোত্তম মিশ্ৰৰ সমৰ্থকে জিলাখনৰ গোৱালিয়ৰ-ঝাঁচী ঘাইপথকে ধৰি কেইবাটাও স্থান অৱৰোধ কৰে । শুকুৰবাৰে সন্ধিয়া আৰম্ভ হোৱা অশান্তি শনিবাৰে পুৱা প্ৰায় ৪:৩০ বজাত হিংসাত্মক সংঘৰ্ষলৈ পৰিণত হয়। প্ৰায় ১৫ৰ পৰা ২০ কিলোমিটাৰ গোৱালিয়ৰ-ঝান্সী ঘাইপথ অৱৰোধ কৰে প্ৰতিবাদকাৰীয়ে।

প্ৰতিবাদৰ সময়ত ক্ষুব্ধ জনতাই আৰক্ষীৰ ওপৰত শিলগুটি নিক্ষেপ কৰি কেইবাখনো বাহনৰ ক্ষতিসাধন কৰাৰ লগতে এখন বাহন ওলোটা কৰি পেলায়। পৰিস্থিতি নিয়ন্ত্ৰণৰ বাহিৰলৈ যোৱাৰ লগে লগে আৰক্ষীয়ে কন্দুৱা গেছৰ গোলা নিক্ষেপ কৰি ৰাইজক ছত্ৰভংগ দিয়ে। শিলগুটি নিক্ষেপত আহত হয় দতিয়া এছ পি আৰু এছ ডি অ’ পিকে ধৰি ৮ জন আৰক্ষী বিষয়া। নৰোত্তম মিশ্ৰৰ একাংশ সমৰ্থকও আহত হোৱা বুলি জানিব পৰা গৈছে।

বৰাউনকালানত পথ অৱৰোধৰ খবৰ পোৱাৰ পিছতে সতৰ্কতামূলক ব্যৱস্থা হিচাপে প্ৰশাসনে দতিয়াস্থিত বিজেপিৰ কাৰ্যালয়ৰ বাহিৰত গধুৰ আৰক্ষী বাহিনী মোতায়েন কৰে। ভিতৰত উপস্থিত থকা প্ৰায় ২৫০ জন শ্ৰমিকক নিৰাপত্তাজনিত কাৰণত আৱদ্ধ কৰি ৰখা হৈছিল। আনকি একাংশ সমৰ্থকে নিজকে ভিতৰত আবদ্ধ কৰি ৰাখিছিল যদিও পিছত বিষয়াসকলে বুজাই দিয়াৰ পিছত তেওঁলোকক মুকলি কৰি দিয়া হৈছিল। আইন-শৃংখলা পৰিস্থিতিৰ পৰিপ্ৰেক্ষিতত দতিয়া জিলা প্ৰশাসনে ভাৰতীয় নাগৰিক সুৰক্ষা সংহিতাৰ ১৬৩ নং ধাৰা প্ৰয়োগ কৰিছে। ইয়াৰ অধীনত অনুমতি অবিহনে যিকোনো সভা, শোভাযাত্ৰা, প্ৰতিবাদ, বা ৰাজহুৱা অনুষ্ঠান নিষিদ্ধ। পাঁচজন বা তাতকৈ অধিক লোকৰ সমাগম হোৱাতো নিষেধাজ্ঞা আৰোপ কৰা হৈছে। জিলাখনত কটকটীয়া নিৰাপত্তাৰ ব্যৱস্থা কৰা হৈছে, পৰিস্থিতি নিৰীক্ষণৰ বাবে চুক-কোণে আৰক্ষী বাহিনী মোতায়েন কৰা হৈছে।

টিকট অস্বীকাৰক লৈ সৃষ্টি হোৱা ক্ষোভৰ বাবে দতিয়া বিজেপিৰ ভিতৰত এক বৃহৎ সাংগঠনিক সংকটৰ সৃষ্টি হৈছে। বিজেপিৰ জিলা সভাপতি ৰঘুবীৰ সাৰণ, নগৰ মন্ত্ৰী, জিলা কোষাধ্যক্ষকে ধৰি কেইবাগৰাকীও জ্যেষ্ঠ বিষয়াই পদৰ পৰা পদত্যাগ কৰিছে। সমৰ্থকসকলে দাবী কৰিছে যে বিজেপিৰ কেইবাজনো কাউন্সিলাৰেও গণ পদত্যাগ দাখিল কৰিছে। ইফালে টিকট পোৱাৰ পাছত আশুতোষ তিৱাৰীয়ে কয়, দলটোৱে দিয়া দায়িত্ব মই সম্পূৰ্ণ নিষ্ঠাৰে পালন কৰিম। ড° নৰোত্তম মিশ্ৰ মোৰ অভিভাৱক; তেওঁ নিজেই ফোন কৰি অভিনন্দন জনালে।

জিলা অতিৰিক্ত আৰক্ষী অধীক্ষক মঞ্জীত সিং চাওলাই কয় যে জিলাখনৰ কেইবাটাও স্থানত প্ৰতিবাদ চলি আছে। পৰিস্থিতিৰ পৰিপ্ৰেক্ষিতত আৰক্ষী মুখ্য কাৰ্যালয়ৰ পৰা অতিৰিক্ত বাহিনীৰ অনুৰোধ কৰা হৈছে। প্ৰতিবাদকাৰীৰ সৈতে আলোচনা কৰি পৰিস্থিতি শান্ত কৰাৰ প্ৰচেষ্টা চলোৱা হৈছে।

এই প্ৰতিবাদৰ বাবে ঘণ্টীয়া শতাধিক ট্ৰাক আৰু যাত্ৰীবাহী বাছ ঘাইপথত আবদ্ধ হৈ থাকে। পৰিস্থিতি অধিক ভয়াৱহ হোৱা দেখি আৰক্ষীয়ে ঝান্সী আৰু গোৱালিয়াৰ অভিমুখে গৈ থকা বাহনসমূহ ডাইভাৰ্ট কৰে। সম্প্ৰতি দতিয়া আৰু গ্ৱালিয়ৰ আৰক্ষীয়ে যৌথভাৱে যান-বাহন পৰিচালনা কৰি আছে।

--------------

হিন্দুস্থান সমাচাৰ / অৰৱিন্দ