শোণিতপুৰ, ১০ জুলাই (হি.স.)। শোণিতপুৰ জিলাৰ তেজপুৰৰ ডিপোটাত বৃহস্পতিবাৰে নিশা সংঘটিত এক শোকাবহ পথ দুৰ্ঘটনাত এখন ট্ৰাক ৰাষ্ট্ৰীয় পথৰ দাঁতিৰ খাৱৈত বাগৰি পৰাৰ ফলত ট্ৰাকখনৰ চালকজন নিহত হয় ৷ উল্লেখযোগ্য যে,নিশা সংঘটিত এই দুৰ্ঘটনাটো আজি পুৱাহে পোহৰলৈ আহে ৷

উল্লেখযোগ্য যে, ডিপোটা দলঙৰ সমীপত নিয়ন্ত্ৰণ হেৰুৱাই এপি ৩৯ইউপি ২২৬৭ নম্বৰৰ সামগ্ৰী কঢ়িয়াই অনা ট্ৰাকখন ৰাষ্ট্ৰীয় ঘাইপথৰ পৰা তললৈ বাগৰি পৰে আৰু এটা অংশ পানীত সোমাই পৰে ৷ আজি পুৱা স্থানীয় লোকে ট্ৰাকখন দেখা পাই আৰক্ষীক খৱৰ দিয়ে আৰু আৰক্ষীয়ে ঘটনাস্থলীত উপস্থিত হৈ ট্ৰাকখনৰ ভিতৰতে চালকজন আৱদ্ধ হৈ থকাটো নিশ্চিত কৰে ৷ ইতিমধ্যেই চালকজনৰ মৃত্যু ঘটিছিল ৷ ৰক্ষীয়ে প্ৰকাশ কৰা অনুসৰি চালকজনৰ পৰা চালকৰ অনুজ্ঞাপত্ৰ আদি উদ্ধাৰ নোহোৱাত নিশা পৰ্যন্ত চালকজনৰ পৰিচয় উদ্ধাৰ হোৱা নাই ৷

ইপিনে আজি বিয়লি তেজপুৰৰ ভোমোৰাগুৰিত আন এক পথ দুৰ্ঘটনা সংঘটিত হয় ৷ নিয়ন্ত্ৰণ হেৰুৱাই পথৰ পৰা বাগৰি পথাৰৰ দ-অংশত সোমাই পৰে এখন দ্ৰুতবেগী ব্যক্তিগত বাহন ৷ এই দুৰ্ঘটনাৰ ফলত বাহনখনৰ চালক, মহিলা যাত্ৰীসহ ছজন লোক আঘাতপ্ৰাপ্ত হৈছে ৷ স্থানীয় লোকে দুৰ্ঘটনাত পটিত বাহনখনৰ পৰা লোকসকলক উদ্ধাৰ কৰি চিকিৎসালয়লৈ প্ৰেৰণৰ ব্যৱস্থা কৰে ৷

হিন্দুস্থান সমাচাৰ / সমীৰ কাৰ