অৰ্ডোছ (চীন), ১০ জুলাই (হি.স.): এছিয়ান ২৩ বছৰ অনুৰ্ধ এথলেটিকছ চেম্পিয়নশ্বিপ ২০২৬ৰ আৰম্ভণিৰ দিনটোত ভাৰতে এটা সোণ, এটা ৰূপ আৰু তিনিটা ব্ৰঞ্জকে ধৰি মুঠ পাঁচটা পদক লাভ কৰে। ভাৰতৰ একমাত্ৰ স্বৰ্ণ পদক লাভ কৰে মিক্সড ৪x৪০০ মিটাৰ ৰিলে দলে।

আষ্টিক প্ৰধান, ছেণ্ড্ৰা মল ছাবু, ছেতু মিশ্ৰ, আৰু শ্ৰৱণী শচীন চাংগলেৰ ভাৰতীয় চতুৰ্থ দলে ৩:১৮.৬৪ ছেকেণ্ডত স্বৰ্ণ পদক লাভ কৰে। এয়া আছিল ভাৰতৰ দিনটোৰ শেষ ইভেন্ট।

ভাৰতৰ প্ৰথমটো পদক লাভ কৰে ভৰতপ্ৰীত সিঙে, যিয়ে পুৰুষৰ ডিস্কছ থ্ৰ’ত ৫২.৯১ মিটাৰ সৰ্বোত্তম প্ৰচেষ্টাৰে ব্ৰঞ্জৰ পদক লাভ কৰে। চীনৰ লি জিক্সিনে ৬০.৭৯ মিটাৰ থ্ৰ’ৰে সোণৰ পদক লাভ কৰাৰ বিপৰীতে তেওঁৰ দেশবাসী জিয়াং জেহাওৱে ৫৯.৬০ মিটাৰ থ্ৰ’ৰে ৰূপৰ পদক লাভ কৰে।

পুৰুষৰ ৫০০০ মিটাৰ দৌৰত ভাৰতে দুটা পদক লাভ কৰে। শিৱাজী পৰশুৰাম মদপগৌড়াই ১৪:০৮.১৯ সময়েৰে ৰূপৰ পদক লাভ কৰাৰ বিপৰীতে বিনোদ সিঙে ১৪:২৩.৬৭ সময়েৰে ব্ৰঞ্জৰ পদক লাভ কৰে। জাপানৰ ৰুই চুজুকিয়ে ১৪:০১.২৪ সময়েৰে স্বৰ্ণ পদক লাভ কৰে।

মহিলাৰ ৩০০০ মিটাৰ ষ্টীপলচেছত দিনটোৰ পঞ্চম পদক অৰ্জন কৰে প্ৰচি দেওকাৰে। ১০:৩২.৬৯ সময়েৰে ব্ৰঞ্জৰ পদক লাভ কৰে। চীনৰ ইয়াং য়িটিঙে ১০:১৪.৬৮ ছেকেণ্ডত স্বৰ্ণ পদক লাভ কৰাৰ লগতে লিউ ইউচিনে ১০:২৫.৫১ ছেকেণ্ডত ৰূপৰ পদক লাভ কৰে।

এছিয়ান ২৩ বছৰ অনুৰ্ধ এথলেটিকছ চেম্পিয়নশ্বিপৰ প্ৰথম সংস্কৰণত অংশগ্ৰহণ কৰিছে ভাৰতৰ ৫৩ গৰাকী খেলুৱৈয়ে। প্ৰথম দিনাৰ প্ৰদৰ্শনেৰে ভাৰতীয় দলটোৱে প্ৰতিযোগিতাখনক শক্তিশালী আৰম্ভণি কৰিছে।

হিন্দুস্থান সমাচাৰ / মনোজ কুমাৰ শইকীয়া