কাঠমাণ্ডু, ১০ জুলাই (হি.স.)। ৰাজহুৱা পদত অধিষ্ঠিত হৈ অস্বাভাৱিক উপায়েৰে সম্পত্তি আহৰণৰ গোচৰৰ তদন্তৰ বাবে গঠন কৰা সম্পত্তি অনুসন্ধান আয়োগে লাভ কৰিছে ১৩,৬৬০টা সম্পত্তিৰ সবিশেষ। লগতে আয়োগে কথিত অবৈধ সম্পত্তিৰ সৈতে জড়িত ১৫০০ অভিযোগ লাভ কৰিছে।

আয়োগৰ তথ্য অনুসৰি প্ৰাক্তন প্ৰধানমন্ত্ৰী, প্ৰাক্তন মুখ্য ন্যায়াধীশ, প্ৰাক্তন সেনা প্ৰধান, চৰকাৰী কৰ্মচাৰীয়ে নিজৰ সম্পত্তিৰ সবিশেষ দাখিল কৰিছে। ১৪ এপ্ৰিলত আয়োগে ৰাজহুৱা জাননী জাৰি কৰি তদন্তৰ অধীনত থকা বিষয়াসকলক তেওঁলোকৰ সম্পত্তি আৰু পৰিয়ালৰ মালিকানাধীন সম্পত্তিৰ সবিশেষ এমাহৰ ভিতৰত দাখিল কৰিবলৈ আহ্বান জনায়। কিন্তু পৰ্যাপ্ত দাখিলৰ অভাৱৰ বাবে আয়োগে ১৫ জুলাইলৈ সময়সীমা বৃদ্ধি কৰিছে।

এই পৰ্যন্ত প্ৰাক্তন প্ৰধানমন্ত্ৰী মাধৱ কুমাৰ নেপাল আৰু সুশীলা কাৰ্কী, প্ৰাক্তন মন্ত্ৰী পৰিষদৰ অধ্যক্ষ খিলৰাজ ৰেগমী, প্ৰাক্তন উপ-প্ৰধানমন্ত্ৰী ঈশ্বৰ পোখাৰেল, প্ৰাক্তন মন্ত্ৰী ওম প্ৰকাশ আৰিয়াল, ৰঘুজী পন্ত, আৰু যুৱৰাজ গ্যাৱালি, প্ৰাক্তন মুখ্য ন্যায়াধীশ ৰামকুমাৰ প্ৰসাদ শ্বাহ, গোপাল পৰাজুলি, ওম প্ৰকাশ মিশ্ৰ, প্ৰকাশমান সিং ৰাউত, আৰু প্ৰাক্তন সেনা মুৰব্বী ৰুকমংগত কটৱাল, মুখ্য সচিব সুমনৰাজ আৰিয়াল, অধিকাংশ সচিব, লোকসেৱা আয়োগৰ প্ৰাক্তন অধ্যক্ষ উমেশ মাইয়ালি, আৰু শক্তি অপব্যৱহাৰ তদন্ত আয়োগৰ প্ৰাক্তন মুখ্য আয়ুক্ত সূৰ্যনাথ উপাধ্যায়কে ধৰি অন্যান্যসকলে নিজৰ সম্পত্তিৰ বিবৃতি দাখিল কৰিছে।

আয়োগৰ মুখপাত্ৰ গণেশ কে চিয়ে জনোৱা মতে, বিগত কেইদিনমানৰ পৰা দৈনিক প্ৰায় ৫০০ লোকে নিজৰ বিবৃতি দাখিল কৰি আহিছে। বৃহস্পতিবাৰে আয়োগে ৬৬০টা সম্পত্তিৰ সবিশেষ লাভ কৰে। আয়োগে তদন্তৰ অধীনত থকা ব্যক্তিসকলক ব্যক্তিগতভাৱে, ডাকযোগে বা ইমেইলযোগে নিজৰ সম্পত্তিৰ বিবৃতি দাখিল কৰিবলৈ অনুমতি দিছে।

প্ৰধানমন্ত্ৰী বলেন্দ্ৰ শ্বাহে কেবিনেট বৈঠকত উচ্চতম ন্যায়ালয়ৰ প্ৰাক্তন ন্যায়াধীশ ৰাজেন্দ্ৰ কুমাৰ ভাণ্ডাৰীৰ নেতৃত্বত পাঁচজনীয়া সম্পদ তদন্ত আয়োগ গঠনৰ সিদ্ধান্ত লয়। প্ৰথম পৰ্যায়ত আয়োগে ২০০৬ চনৰ পৰা ২০২৬ চনৰ মাৰ্চ মাহৰ ভিতৰত ৰাজহুৱা পদবীত থকা বিষয়া-কৰ্মচাৰীৰ সম্পত্তিৰ তদন্ত কৰি আছে।পৰৱৰ্তী সময়ত ১৯৯০ চনৰ পৰা ২০০৬ চনৰ ভিতৰত ৰাজহুৱা পদবীত অধিষ্ঠিত ব্যক্তিসকলৰ সম্পত্তিৰ তদন্তৰ বাবে পৃথক অধিসূচনা জাৰি কৰা হ’ব।

-----------------

হিন্দুস্থান সমাচাৰ / অৰৱিন্দ