নতুন দিল্লী, ১০ জুলাই (হি.স.)। ম্যানমাৰৰ এজন শৰণাৰ্থীৰ নাম ভৰ্তিৰ বাবে পাছপ’ৰ্টৰ প্ৰয়োজনীয়তাক প্ৰত্যাহ্বান জনাই এখন আবেদনৰ শুনানি গ্ৰহণ কৰি দিল্লী উচ্চ ন্যায়ালয়ে দিল্লী বিশ্ববিদ্যালয়লৈ জাননী জাৰি কৰে। ন্যায়াধীশ জছমীত সিঙৰ নেতৃত্বত এখন বিচাৰপীঠে দিল্লী বিশ্ববিদ্যালয়ৰ নীতিক লৈ প্ৰশ্ন উত্থাপন কৰি শৰণাৰ্থীয়ে ক’ৰ পৰা পাছপ’ৰ্ট লাভ কৰিব বুলি প্ৰশ্ন কৰে। ১৩ জুলাইত এই গোচৰৰ পৰৱৰ্তী শুনানি অনুষ্ঠিত হ’ব।

এই আবেদন দাখিল কৰিছে ম্যানমাৰৰ শৰণাৰ্থী হেনৰী হু আং লাইয়ে।

ৰাষ্ট্ৰসংঘৰ শৰণাৰ্থী উচ্চায়ুক্তই হেনৰীক ম্যানমাৰৰ শৰণাৰ্থী হিচাপে স্বীকৃতি দিছে। শুনানিৰ সময়ত হেনৰীৰ অধিবক্তা অশোক আগৰৱালাই যুক্তি আগবঢ়ায় যে দিল্লী বিশ্ববিদ্যালয়ৰ বিদেশী ছাত্ৰ-ছাত্ৰীক নামভৰ্তিৰ নীতি বৈষম্যমূলক আৰু শৰণাৰ্থীক বিদেশী ছাত্ৰ হিচাপে স্বীকৃতি দিয়া নহয়। তেওঁ যুক্তি দিছিল যে নিৰ্যাতনৰ পৰা পলায়ন কৰা শৰণাৰ্থীসকলে পলায়ন কৰা দেশৰ পৰা পাছপ’ৰ্ট লাভ কৰিব নোৱাৰে।

আৱেদনখনত দিল্লী বিশ্ববিদ্যালয়ৰ বিদেশী ছাত্ৰ শ্ৰেণীৰ অন্তৰ্গত শৰণাৰ্থীৰ পৰা পাছপ’ৰ্টৰ প্ৰয়োজনীয়তা প্ৰত্যাহাৰ কৰিবলৈ বা তেওঁলোকক এই প্ৰয়োজনীয়তাৰ পৰা ৰেহাই দিবলৈ দাবী জনাইছে।

আবেদনখনত উল্লেখ কৰা হৈছে যে ম্যানমাৰৰ ৰাজনৈতিক অস্থিৰতা, হিংসা আৰু নিৰ্যাতনৰ বাবে হেনৰী আৰু তেওঁৰ পৰিয়ালে ম্যানমাৰৰ পৰা পলায়ন কৰে। ৰাষ্ট্ৰসংঘৰ শৰণাৰ্থী উচ্চায়ুক্ত (UNHCR)ৰ সুৰক্ষাত ভাৰতত বাস কৰি আছে। ভাৰতত স্কুলীয়া শিক্ষা সমাপ্ত কৰি হেনৰীয়ে ২০২৬-২৭ শিক্ষাবৰ্ষৰ বাবে বিদেশী ছাত্ৰ নামভৰ্তি পঞ্জীয়নৰ জৰিয়তে দিল্লী বিশ্ববিদ্যালয়ত নামভৰ্তিৰ বাবে আবেদন জনায়। কিন্তু পাছপ’ৰ্ট জমা নিদিয়াৰ বাবে দিল্লী বিশ্ববিদ্যালয়ে তেওঁৰ আবেদন অসম্পূৰ্ণ বুলি ঘোষণা কৰে। হেনৰীয়ে দিল্লী বিশ্ববিদ্যালয়ে তেওঁৰ ইউএনএইচচিআৰৰ শৰণাৰ্থী নথিপত্ৰ পাছপ’ৰ্ট হিচাপে গ্ৰহণ কৰিবলৈ অনুৰোধ কৰিছিল যদিও কোনো সকাহ নাপালে। ইয়াৰ পিছতে হেনৰীয়ে উচ্চ ন্যায়ালয়ৰ কাষ চাপিছে।

হিন্দুস্থান সমাচাৰ / অৰৱিন্দ