নতুন দিল্লী, ০১ জুলাই (হি.স.)। অল ইণ্ডিয়া ৰেডিঅ’ৰ ৯০ বছৰীয়া জয়ন্তী উপলক্ষে আৰু ২০২৭ চনত দেশত ৰেডিঅ’ সম্প্ৰচাৰৰ শতবাৰ্ষিকীৰ প্ৰস্তুতিৰ অংশ হিচাপে বুধবাৰে উন্মোচন কৰা হয় স্ৱৰ প্ৰেৰণা বিঠিকা নামৰ এখন বিশেষ ফটো গেলেৰী। নতুন দিল্লীৰ অল ইণ্ডিয়া ৰেডিঅ’ ভৱনৰ ৰং ভৱন প্ৰেক্ষাগৃহত অনুষ্ঠিত এক অনুষ্ঠানত পদ্ম বিভূষণ বঁটা বিজয়ী তথা প্ৰখ্যাত বাঁহীবাদক পণ্ডিত হৰিপ্ৰসাদ চৌৰসিয়াই গেলেৰীখন উদ্বোধন কৰে।
স্ৱৰ প্ৰেৰণা বিঠিকাৰ জৰিয়তে অল ইণ্ডিয়া ৰেডিঅ'ৰ সৈতে বছৰ বছৰ ধৰি জড়িত হৈ থকা ভাৰতীয় সংগীতৰ চহকী পৰম্পৰাক দেশৰ লগতে বিদেশলৈ বিয়পোৱাত উল্লেখযোগ্য অৱদান আগবঢ়োৱা মহান সংগীতজ্ঞ আৰু শিল্পীসকলক সন্মান জনোৱা হয়।
অনুষ্ঠানত ভাষণ দি প্ৰসাৰ ভাৰতীৰ মুখ্য কাৰ্যবাহী বিষয়া গৌৰৱ দ্বিবেদীয়ে কয় যে স্বৰ প্ৰেৰণা গেলেৰী অল ইণ্ডিয়া ৰেডিঅ'ৰ কৃতজ্ঞতাৰ প্ৰতীক, যিসকল মহান শিল্পীৰ অৱদানে প্ৰতিষ্ঠানটোক দেশৰ এক বিশিষ্ট সাংস্কৃতিক চিহ্ন হিচাপে গঢ়ি তুলিছে। তেওঁ কয় যে ভৱিষ্যতে এই গেলেৰীখন সম্প্ৰসাৰিত কৰা হ’ব, আৰু সমগ্ৰ দেশৰ অল ইণ্ডিয়া ৰেডিঅ’ ষ্টেচনসমূহত স্থানীয় সংগীতৰ দীপ্তিমানসকলৰ বাবে নিবেদিত অনুৰূপ গেলেৰীসমূহ গঢ়ি তোলা হ’ব।
তেওঁ উল্লেখ কৰে যে অল ইণ্ডিয়া ৰেডিঅ’ই ভাৰতীয় সংগীতৰ বৈচিত্ৰ্যপূৰ্ণ পৰম্পৰা সদায় সংৰক্ষণ আৰু প্ৰচাৰ কৰি আহিছে। ইয়াৰ ডিজিটেল চেনেল ৰাগম আৰু আৰাধনাৰ জৰিয়তে শাস্ত্ৰীয় আৰু ভক্তিমূলক সংগীতে ২৪ ঘন্টাই শ্ৰোতাৰ মাজলৈ যায়।
এই উপলক্ষে পণ্ডিত হৰিপ্ৰসাদ চৌৰসিয়াই কয় যে অল ইণ্ডিয়া ৰেডিঅ’ তেওঁৰ বাবে পৰিয়ালৰ দৰে আৰু তেওঁৰ সংগীত যাত্ৰা আৰম্ভ হৈছিল অল ইণ্ডিয়া ৰেডিঅ’ৰ শিশু অনুষ্ঠানৰ পৰা। তেওঁ আস্থা প্ৰকাশ কৰে যে প্ৰতিষ্ঠানটোৱে ভৱিষ্যতেও নতুন প্ৰতিভাৰ বাবে এক মঞ্চ প্ৰদান কৰি যাব।
অনুষ্ঠানত পণ্ডিত হৰিপ্ৰসাদ চৌৰসিয়াৰ শিষ্য পণ্ডিত ৰূপক কুলকাৰ্ণীয়ে বাঁহীৰে অনুষ্ঠানটোক স্মৰণীয় কৰি তুলিছিল। তেওঁৰ এই প্ৰদৰ্শনে দৰ্শকৰ যথেষ্ট সমাদৰ লাভ কৰিছিল।
ভাৰতীয় সংগীত ঐতিহ্য সংৰক্ষণ আৰু নতুন প্ৰজন্মৰ শিল্পী আৰু সংগীতপ্ৰেমীক অনুপ্ৰাণিত কৰাৰ লক্ষ্যৰে ‘স্ৱৰ প্ৰেৰণা গেলেৰী’ পদক্ষেপ আৰম্ভ কৰা হয়।
গেলেৰীৰ প্ৰথম পৰ্যায়ত ২০ গৰাকী বিশিষ্ট সংগীতৰ প্ৰতিকৃতি প্ৰদৰ্শন কৰা হৈছে। ইয়াৰ ভিতৰত ভাৰত ৰত্ন বঁটা বিজয়ী এম. চুববুলক্ষ্মী, পণ্ডিত ৰবি শংকৰ, লতা মংগেশকাৰ, উস্তাদ বিছমিল্লাহ খান, পণ্ডিত ভীমসেন যোশী, আৰু ড° ভূপেন হাজৰিকা আদি। পদ্ম বিভূষণ আৰু পদ্ম ভূষণেৰে সন্মানিত অন্যান্য কিংবদন্তি সংগীতজ্ঞৰ প্ৰতিকৃতিও গেলেৰীত প্ৰদৰ্শিত হৈছে।
হিন্দুস্থান সমাচাৰ / মনোজ কুমাৰ শইকীয়া
