নতুন দিল্লী, ০৯ জুন (হি.স.)। পাকিস্তানী সন্ত্ৰাসবাদী শ্বাহজাদ ভাট্টি আৰু তেওঁলোকৰ সন্ত্ৰাসবাদী নেটৱৰ্কৰ সৈতে জড়িত তিনিটা গেংষ্টাৰৰ তদন্তৰ অংশ হিচাপে মঙলবাৰে ৰাষ্ট্ৰীয় তদন্ত সংস্থাই পঞ্জাৱ আৰু হাৰিয়ানাৰ ১৮টা স্থানত অভিযান চলায়। দুয়োখন ৰাজ্যৰ কেইবাটাও স্থানত একেলগে অভিযান চলাইছিল সংস্থাটোৱে। অভিযানৰ সময়ত ই কেইবাজনো ব্যক্তিক জেৰা কৰি যোগাযোগ নেটৱৰ্ক, বিত্তীয় লেনদেন, সন্দেহজনক কাৰ্যকলাপৰ সৈতে জড়িত ডিজিটেল ডিভাইচ, নথি-পত্ৰ আৰু প্ৰমাণ জব্দ কৰে।

এন আই এয়ে উল্লেখ কৰে যে তালাচীৰ সময়ত সংগ্ৰহ কৰা তথ্য আৰু প্ৰমাণ বৈজ্ঞানিক ফৰেনছিক বিশ্লেষণ আৰু কাৰিকৰী পৰীক্ষাৰ বাবে প্ৰেৰণ কৰি সীমা অতিক্ৰম কৰি বৃহত্তৰ ষড়যন্ত্ৰ উন্মোচন কৰা হৈছে। কিছু বিশেষ ব্যক্তিক অধিক সোধা-পোছাৰ বাবে জাননীও জাৰি কৰা হৈছে। আজিৰ এই অভিযানৰ প্ৰধান উদ্দেশ্য আছিল ভট্টীৰ সহযোগী আৰু নেটৱৰ্কৰ সৈতে জড়িত অন্যান্য ব্যক্তিসকলক চিনাক্ত কৰা।

তদন্তত প্ৰকাশ পাইছে যে ২০২৫ চনৰ মাৰ্চ মাহত পঞ্জাৱৰ জলন্ধৰত ছ’চিয়েল মিডিয়া কৰ্মী ৰজাৰ সন্ধুৰ ঘৰত গ্ৰেনেড আক্ৰমণৰ আঁৰত শ্বাহজাদ ভট্টি আছিল।এপ্ৰিল মাহত সংস্থাটোৱে ভট্টিক পলাতক বুলি ঘোষণা কৰি এই গোচৰৰ অভিযোগনামা দাখিল কৰিছিল। তদুপৰি ২০২৫ চনৰ নৱেম্বৰ মাহত হাৰিয়ানাৰ ছিৰছা মহিলা আৰক্ষী থানাত সংঘটিত বোমা বিস্ফোৰণ আৰু ২০২৬ চনৰ জানুৱাৰী মাহত আম্বালাৰ বলদেৱ নগৰ আৰক্ষী থানাত সংঘটিত গাড়ী বোমা বিস্ফোৰণৰ মাষ্টাৰমাইণ্ড ভট্টি বুলিও সংস্থাটোৱে জানিবলৈ দিয়ে। মে’ মাহত সংস্থাটোৱে ছিৰছা গোচৰৰ ভট্টি আৰু পাকিস্তানী হেণ্ডলাৰ সোহেইল আহমেদ ওৰফে সোহেইল বালোচকে ধৰি ৯জন অভিযুক্তৰ বিৰুদ্ধে অভিযোগনামা দাখিল কৰিছিল।

-----------------

হিন্দুস্থান সমাচাৰ / অৰৱিন্দ