নতুন দিল্লী, ০৯ জুন (হি.স.)। ওমান উপকূলত পালাউৰ পতাকা থকা জাহাজ এম টি মেৰিভেক্সত সংঘটিত হোৱা আক্ৰমণৰ পিছত ভাৰতৰ ২৪ জন ক্ৰু মেম্বাৰক নিৰাপদে উদ্ধাৰ কৰা হৈছে বুলি মঙলবাৰে বৈদেশিক পৰিক্ৰমা মন্ত্ৰালয়ে প্ৰকাশ কৰে। ভাৰতীয় দূতাবাসে ওমান কৰ্তৃপক্ষৰ সৈতে সমন্বয় সাধন কৰি নাৱিকসকলক উদ্ধাৰত সহায় কৰে। মন্ত্ৰালয়ে ওমান চৰকাৰৰ প্ৰতি কৃতজ্ঞতা প্ৰকাশ কৰে।

মঙলবাৰে এম ই এৰ মুখপাত্ৰ ৰণধীৰ জয়ছোৱালে কয় যে ওমান উপকূলৰ ওচৰত পালাউৰ পতাকা থকা জাহাজ এম টি মেৰিভেক্সক আক্ৰমণ কৰা হৈছে। এই ঘটনাৰ পূৰ্বে জাহাজখনৰ ক্ৰু আৰু আমেৰিকাৰ নৌসেনাৰ মাজত কিছু যোগাযোগ আছিল। জাহাজখনত ২৪ জন ক্ৰু মেম্বাৰ আছিল, আটাইকেইজন ভাৰতীয় নাগৰিক। সকলোকে নিৰাপদে খালী কৰা হৈছে। ভাৰতীয় দূতাবাসে ওমান কৰ্তৃপক্ষৰ সৈতে সমন্বয় সাধন কৰি উদ্ধাৰ অভিযান চলাইছিল। মন্ত্ৰালয়ে ওমান চৰকাৰৰ প্ৰতি কৃতজ্ঞতা প্ৰকাশ কৰি কয় যে দূতাবাস নাৱিকসকলৰ সৈতে যোগাযোগত আছে।

উল্লেখযোগ্য যে সোমবাৰে দিনৰ প্ৰায় ২:২০ বজাত মুম্বাইস্থিত সামুদ্ৰিক উদ্ধাৰ সমন্বয় কেন্দ্ৰ (এম আৰ চি চি মুম্বাই) জাহাজখনত সংঘটিত আক্ৰমণৰ তথ্য লাভ কৰে। এই তথ্য জাহাজত থকা এজন নাৱিকৰ পৰিয়ালৰ এজন সদস্যই দিছিল। পৰিস্থিতিৰ ভয়াৱহতাৰ প্ৰতি লক্ষ্য ৰাখি এম আৰ চি চি মুম্বাইয়ে তৎক্ষণাত ওমানী মেৰিটাইম চাৰ্চ এণ্ড ৰেচকিউ চেণ্টাৰ (ও. এম. এছ. চি.)ৰ সৈতে যোগাযোগ কৰি ক্ৰুসকলক তাৎক্ষণিকভাৱে সহায়ৰ অনুৰোধ জনায়। ইয়াৰ পিছতে ওমানিয়াৰ সংস্থাসমূহে দ্ৰুত সঁহাৰি জনায়।

বিয়লি প্ৰায় ৫ বজাত ওমানী মেৰিটাইম ৰেচকিউ চেণ্টাৰে নিশ্চিত কৰে যে ওমানী নৌসেনাৰ হেলিকপ্টাৰে ২৪ জন ভাৰতীয় নাৱিকক নিৰাপদে উদ্ধাৰ কৰিছে। সকলোকে নিৰাপদ স্থানলৈ লৈ যোৱা হয়, আৰু কোনো লোক আহত হোৱাৰ খবৰ পোৱা নাই। ইণ্ডিয়ান ক’ষ্ট গাৰ্ডে ছ’চিয়েল মিডিয়া প্লেটফৰ্ম এক্সতো উল্লেখ কৰিছে যে এই তথ্য লাভ কৰাৰ লগে লগে এম আৰ চি চি মুম্বাইয়ে ওমানৰ সংস্থাসমূহৰ সৈতে সমন্বয় সাধন কৰে, যাৰ ফলত সকলো ভাৰতীয় নাৱিকক নিৰাপদে উদ্ধাৰ কৰা হয়।

আমেৰিকাৰ চেণ্ট্ৰেল কমাণ্ডে (চেণ্টকম) এক বিবৃতিত প্ৰকাশ কৰি কয় যে যোৱা ৮ জুনত আমেৰিকাৰ সেনাই ওমান উপসাগৰত এখন খালী টেংকাৰক বাধা দিছিল। টেংকাৰখনে ইৰাণৰ বন্দৰলৈ যাবলৈ চেষ্টা কৰি অৱৰোধ উলংঘা কৰিছিল। যেতিয়া ক্ৰুৱে আমেৰিকাৰ সামৰিক নিৰ্দেশনা অমান্য কৰিলে, তেতিয়া এফ/এ-১৮ ছুপাৰ হৰ্নেট বিমানে জাহাজখনক আক্ৰমণ কৰে।

-----------------

হিন্দুস্থান সমাচাৰ / অৰৱিন্দ