নতুন দিল্লী, ০৯ জুন (হি.স.)। ব্যক্তিগত খণ্ডৰ ঋণ প্ৰদানকাৰী এইচ ডি এফ চি বেংকে প্ৰান্তীয় খৰচ ভিত্তিক ঋণৰ হাৰ (এম চি এল আৰ) ০.১০% বৃদ্ধি কৰিছে। দুবছৰীয়া ঋণৰ হাৰ এতিয়া ৮.৪৫%ৰ পৰা ৮.৫৫%লৈ বৃদ্ধি পাইছে। ৮ জুনৰ পৰা কাৰ্যকৰী হৈছে এই নতুন হাৰ।

মঙলবাৰে জাৰি কৰা এক বিবৃতিত বেংকটোৱে কয় যে এই পদক্ষেপে প্ৰত্যক্ষভাৱে প্ৰভাৱ পেলাব যিসকল ঋণগ্ৰহণকাৰীৰ ঋণ এমচিএলআৰ ব্যৱস্থাৰ সৈতে জড়িত। একেদৰে বাহন, গৃহ নিৰ্মাণ, ব্যক্তিগত ঋণৰ দৰে বেছিভাগ গ্ৰাহক ঋণৰ বাবে মানক বুলি বিবেচিত এবছৰৰ এমচিএলআৰ ০.০৫% বৃদ্ধি পাই ৮.৪০% হৈছে। তদুপৰি ২৪ ঘণ্টা, তিনিমাহ, ছমাহ, আৰু তিনি বছৰৰ ঋণৰ কাৰ্যকালৰ হাৰো ০.০৫% বৃদ্ধি কৰা হৈছে।

এমচিএলআৰ কি?

এমচিএলআৰ হৈছে সেই ভিত্তি হাৰ যাৰ বিপৰীতে বেংকে তেওঁলোকৰ বেছিভাগ ঋণৰ সুতৰ হাৰ নিৰ্ধাৰণ কৰে। এই সিদ্ধান্তই গ্ৰাহকৰ গৃহ ঋণ, বাহন ঋণ আৰু ব্যক্তিগত ঋণৰ মাহিলী কিস্তিত প্ৰভাৱ পেলাব পাৰে। এইচ ডি এফ চি বেংকৰ এই পদক্ষেপ এনে সময়তে ভাৰতীয় ৰিজাৰ্ভ বেংকে একেৰাহে দ্বিতীয়বাৰৰ বাবে পলিচি ৰেট অৰ্থাৎ ৰেপো ৰেট অপৰিৱৰ্তিত ৰাখিছে। বৰ্তমান ৰেপো হাৰ ৫.২৫% ত সুস্থিৰ হৈ আছে।

হিন্দুস্থান সমাচাৰ / অৰৱিন্দ