বৰপেটা, ০৯ জুন (হি.স.): নামনি অসমৰ আলু খেতিৰ বাবে বিখ্যাত বৰপেটাৰ মন্দিয়া-বাঘবৰ অঞ্চল । বৰপেটা জিলাৰ বৃহত্তৰ মন্দিয়া অঞ্চলত আলু খেতি কৰা কৃষকৰ মাজত এতিয়া হাহাকাৰ অৱস্থাৰ সৃষ্টি হৈছে । মূৰৰ ঘাম মাটিত পেলাই উৎপাদন কৰা আলু আজিও বিক্ৰী নোহোৱাকৈ ঘৰতেই গেলি-পচি গৈছে কুইন্টলে কুইন্টলে আলু । বজাৰত নাই উপযুক্ত দাম, আনকি ১ টকা কেজি দৰতো বিক্ৰী কৰাৰ বাবে বেপাৰী নোপোৱাৰ অভিযোগ তুলিছে কৃষকসকলে ।
ঋণ লৈ খেতি কৰা বহু কৃষক এতিয়া সৰ্বহাৰা হোৱাৰ পথত আগবাঢ়িছে । বৰপেটা জিলাৰ বৃহত্তৰ মন্দিয়া-বাঘবৰ অঞ্চলৰ কৃষকে এইবাৰ আলু খেতি কৰি হতাশা ভূগিছে । উৎপাদিত আলু বজাৰত উপযুক্ত দাম নোপোৱাত এতিয়া মূৰে কপালে হাত দিবলগীয়া হৈছে কৃষকসকলৰ । বন্ধন বেংকৰ ঋণ লৈ, ঘৰৰ গৰু-ছাগলী বিক্ৰী কৰি,আনকি নিজৰ গহনাও বিক্ৰী কৰি আলু খেতি কৰা বহু দুখীয়া কৃষক এতিয়া বৃহৎ লোকচানৰ সন্মুখীন হৈছে। ইফালে অতিমাত্ৰা বৰষুণৰ ফলত বহু কৃষকৰ আলু পথাৰতেই নষ্ট হৈ ৰৈ যায় । যিখিনি উৎপাদন ঘৰত আনিব পাৰিছে, তাৰো অধিকাংশ বিক্ৰী নোহোৱাকৈ গেলি-পচি গৈছে । কৃষকসকলৰ প্ৰতি বিঘা আলু খেতিত প্ৰায় ৩০ৰ পৰা ৩৫ হাজাৰ টকালৈ লোকচান হৈছে । বজাৰত নাই আলুৰ চাহিদা, বেপাৰী বিচাৰি পোৱা নাই খেতিয়কে । সেয়েহে উপায়ন্তৰ হৈ চৰকাৰৰ পৰা আৰ্থিক সাহায্য বিচাৰিছে ক্ষতিগ্ৰস্ত কৃষকসকলে । লগতে কৃষি বিভাগ আৰু যোগান বিভাগে তৎপৰতাৰে খেতিয়কৰ সমস্যা বুজি ব্যৱস্থা ল’বলৈ আহ্বান জনাইছে ।
হিন্দুস্থান সমাচাৰ / কিশোৰ মিশ্ৰ