চণ্ডীগড়, ০৯ জুন (হি.স.)। ধন সৰবৰাহৰ প্ৰতিৰোধ আইনৰ অধীনত চলি থকা তদন্তৰ সৈতে জড়িত পঞ্জাৱ, উত্তৰ প্ৰদেশ আৰু দিল্লী-এনচিআৰৰ ছটা স্থানত মঙলবাৰে বলবৎকাৰী সঞ্চালকালয়ে একেলগে অভিযান চলায়। হেম্পটন স্কাই ৰিয়েলটি লিমিটেডৰ সৈতে জড়িত এটা গোচৰত এই ব্যৱস্থা গ্ৰহণ কৰা হৈছে। ইডিৰ দলে উত্তৰ প্ৰদেশৰ লুধিয়ানা, জলন্ধৰ, বাৰেলী, আৰু দিল্লী-নয়দা অঞ্চলত তদন্তৰ অধীনত থকা ব্যক্তি আৰু সত্তাৰ বাসগৃহ আৰু ব্যৱসায়িক চৌহদত তালাচী চলায়।

পৌৰ নিগমৰ ঠিকাদাৰ অমিত বাজাজৰ জলন্ধৰত থকা নিউ জৱাহৰ নগৰৰ বাসগৃহতো অভিযান চলায় ইডিয়ে। অমিত বাজাজ আৰু তেওঁৰ জ্যেষ্ঠ ভাতৃ ইন্দ্ৰজিৎ বাজাজক পৌৰ নিগমকে ধৰি বিভিন্ন চৰকাৰী বিভাগৰ প্ৰধান ঠিকাদাৰ হিচাপে গণ্য কৰা হয়। দুয়োজন ভাতৃয়ে পঞ্জাৱৰ জলন্ধৰ, লুধিয়ানা, মোহলীকে ধৰি কেইবাখনো চহৰত আৰু গুজৰাটকে ধৰি অন্যান্য ৰাজ্যত ঠিকাদাৰী কামত জড়িত হৈ আছে। ইয়াৰ উপৰিও আউটচ’ৰ্চিঙৰ জৰিয়তে মানৱ সম্পদ প্ৰদান কৰা সংস্থাসমূহৰ কাৰ্য্যকলাপৰ সৈতেও তেওঁলোক জড়িত বুলি কোৱা হয়।

সূত্ৰ অনুসৰি বাজাজ ভাতৃদ্বয়ৰ বিভিন্ন ৰাজনৈতিক দলৰ নেতাৰ সৈতে ঘনিষ্ঠ সম্পৰ্ক আছে। ইয়াৰ উপৰিও তেওঁলোকে আম আদমী পাৰ্টিৰ কেইবাটাও কাৰ্যসূচীক আৰ্থিকভাৱে সহায় কৰাৰ লগতে নিৰ্বাচনৰ সময়ত দলটোক সমৰ্থন কৰা বুলিও দাবী কৰা হৈছে। দলৰ শীৰ্ষ নেতাসকলৰ সৈতে তেওঁলোকৰ ঘনিষ্ঠতাৰ বিষয়ে বহুলভাৱে চৰ্চিত হৈছে, আৰু তেওঁলোকক অসংখ্য ৰাজনৈতিক সভাত দেখা গৈছে। তদুপৰি পঞ্জাৱত আম আদমী পাৰ্টিয়ে চৰকাৰ গঠন কৰাৰ আগলৈকে বিভিন্ন দলৰ নেতাৰ সৈতে তেওঁলোকৰ সম্পৰ্কৰ খবৰ পোৱা গৈছিল। নির্বাচনৰ পূর্বে তেওঁলোকৰ বাসগৃহত উপস্থিত হয় প্রাক্তন মুখ্যমন্ত্রী পর্কাশ সিং বাদল৷ আনকি কংগ্ৰেছৰ শাসনকালতো তেওঁলোকৰ কংগ্ৰেছ নেতাৰ সৈতে ভাল সম্পৰ্ক আছিল বুলি কোৱা হয়।

ইফালে ইডিৰ এই কাৰ্যক লৈ প্ৰতিক্ৰিয়া প্ৰকাশ কৰি আম আদমি পাৰ্টিৰ ৰাষ্ট্ৰীয় আহ্বায়ক অৰবিন্দ কেজৰিৱালে কয় যে ইডিয়ে পুনৰবাৰ পঞ্জাৱৰ হিন্দু ব্যৱসায়ীসকলক লক্ষ্য কৰি লৈছে। ব্যৱসায়ীসকলক আতংকিত হোৱাৰ কোনো প্ৰয়োজন নাই বুলি উল্লেখ কৰি তেওঁ কয় যে পঞ্জাৱ চৰকাৰে তেওঁলোকৰ সৈতে থিয় দিছে আৰু তেওঁলোকে যৌথভাৱে ইডিৰ এই কাৰ্য্যৰ সন্মুখীন হ’ব।

বৰ্তমান ইডিৰ অনুসন্ধান অব্যাহত আছে, আৰু সংস্থাটোৱে আনুষ্ঠানিকভাৱে জব্দ বা তদন্তৰ কোনো সবিশেষ প্ৰকাশ কৰা নাই। তদন্ত সম্পূৰ্ণ হোৱাৰ পিছতহে গোচৰটোক কেন্দ্ৰ কৰি থকা তথ্যৰ স্পষ্ট ছবি ওলাই আহিব।

হিন্দুস্থান সমাচাৰ / অৰৱিন্দ