নতুন দিল্লী, ০৬ জুন (হি.স.)। ভাৰতীয় জনতা পাৰ্টিৰ বৈদেশিক পৰিক্ৰমা বিভাগৰ মুৰব্বী ড০ বিজয় চৌথাইৱালেৰ সৈতে নেপালৰ বৈদেশিক মন্ত্ৰী শিশিৰ খানালে শনিবাৰে সাক্ষাৎ কৰে। নেপাল-ভাৰত সম্পৰ্ক অধিক শক্তিশালী কৰা, ৰাজনৈতিক দলসমূহৰ মাজত সহযোগিতা বৃদ্ধি কৰা, দুয়োখন দেশৰ জনসাধাৰণৰ মাজত যোগাযোগ আৰু সম্পৰ্ক সম্প্ৰসাৰণ আদি কেইবাটাও গুৰুত্বপূৰ্ণ বিষয়ৰ ওপৰত দুয়োগৰাকী নেতাই আলোচনা কৰে।

ড০ চৌথাইৱালে ছ’চিয়েল মিডিয়া প্লেটফৰ্ম এক্সত এটা পোষ্টত উল্লেখ কৰিছে যে আলোচনাত দ্বিপাক্ষিক সম্পৰ্কক নতুন গতি প্ৰদান, দল-দলীয় আলোচনা গভীৰ কৰা, জনসাধাৰণৰ মাজত সম্পৰ্ক শক্তিশালী কৰা আদিৰ ওপৰত গুৰুত্ব আৰোপ কৰা হৈছে।

ভাৰতৰ বৈদেশিক মন্ত্ৰী ড° এছ জয়শংকৰৰ আমন্ত্ৰণত অহা ৫ জুনৰ পৰা ৭ জুনলৈ আনুষ্ঠানিকভাৱে ভাৰত ভ্ৰমণলৈ আহিছে বৈদেশিক মন্ত্ৰী খানাল। এই ভ্ৰমণৰ সময়ত তেওঁ নতুন দিল্লীত বৈদেশিক মন্ত্ৰী জয়শংকৰৰ সৈতে আনুষ্ঠানিক দ্বিপাক্ষিক আলোচনাত মিলিত হ’ব।

নেপালৰ বৈদেশিক মন্ত্ৰালয়ৰ তথ্য অনুসৰি এই বৈঠকত দুয়োখন দেশৰ পাৰস্পৰিক স্বাৰ্থৰ বিস্তৃত বিষয় সামৰি লোৱা হ’ব। বিশেষকৈ, আলোচনাত বাণিজ্য, বিনিয়োগ, সংযোগ নেটৱৰ্ক, শক্তি সহযোগিতা, আৰু জনসাধাৰণৰ মাজত সম্পৰ্ক শক্তিশালী আৰু সম্প্ৰসাৰণৰ ওপৰত গুৰুত্ব আৰোপ কৰা হ’ব। নিয়মীয়াকৈ উচ্চ পৰ্যায়ৰ আদান-প্ৰদানৰ ধাৰাবাহিকতা অব্যাহত ৰখা এই ভ্ৰমণে নেপাল আৰু ভাৰতৰ মাজত কূটনৈতিক, ঐতিহাসিক, বহুমুখী সম্পৰ্কক অধিক গভীৰ আৰু শক্তিশালী কৰাত গুৰুত্বপূৰ্ণ ভূমিকা পালন কৰিব। নিৰ্ধাৰিত সময় অনুসৰি অহা ৭ জুনত নেপাললৈ উভতি আহিব বৈদেশিক মন্ত্ৰী শিশিৰ খানাল।

হিন্দুস্থান সমাচাৰ / মনোজ কুমাৰ শইকীয়া