নতুন দিল্লী, ০৫ জুন (হি.স.)। বিশ্ব পৰিৱেশ দিৱস উপলক্ষে শুকুৰবাৰে কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰী ভূপেন্দ্ৰ যাদৱে কয় যে ভৱিষ্যত প্ৰজন্মৰ সুবিধাৰ্থে গছৰ যত্ন আৰু সংৰক্ষণৰ বাবে সামূহিক প্ৰচেষ্টা আৰু জনসাধাৰণৰ অংশগ্ৰহণ অতি প্ৰয়োজনীয়।

ভূপেন্দ্ৰ যাদৱ আৰু দিল্লীৰ মুখ্যমন্ত্ৰী ৰেখা গুপ্তাই যৌথভাৱে দিল্লীৰ মৈদানগড়ীৰ নমো অক্সিজেন পাৰ্কত এক অনুষ্ঠানত ১৮খন নমো অক্সিজেন পাৰ্ক উদ্বোধন কৰে। এই অনুষ্ঠানৰ সময়ত দুয়োজনে দেশজোৰা অভিযান মাতৃৰ নামত এজোপা গছৰ অধীনত কেইবাটাও পৰিৱেশ পদক্ষেপ আৰম্ভ কৰে। এই পদক্ষেপসমূহৰ লক্ষ্য হৈছে ৰাজধানীখনক সেউজীয়া কৰি তোলা, বায়ুৰ গুণাগুণ উন্নত কৰা, আৰু পৰিৱেশ সংৰক্ষণক প্ৰসাৰ কৰা।

প্ৰধানমন্ত্ৰীৰ মাতৃৰ নামত এজোপা গছ অভিযানৰ কথা উল্লেখ কৰি তেওঁ কয়, এই অভিযানে বৃক্ষৰোপণক কৃতজ্ঞতা, দায়িত্ব, পৰিৱেশ সচেতনতাৰ ওপৰত ভিত্তি কৰি গণ আন্দোলনলৈ ৰূপান্তৰিত কৰিছে। তেওঁ নাগৰিকসকলক কেৱল গছ ৰোপণ কৰাই নহয়, ভৱিষ্যত প্ৰজন্মৰ বাবে ইয়াৰ যত্ন আৰু সুৰক্ষাৰ বাবেও আহ্বান জনায়।

মন্ত্ৰীগৰাকীয়ে উল্লেখ কৰে যে প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰতে পৰিৱেশ সুৰক্ষাৰ ক্ষেত্ৰত বিশ্বৰ আগশাৰীৰ হিচাপে আত্মপ্ৰকাশ কৰিছে আৰু কেইবাটাও উল্লেখযোগ্য সাফল্য লাভ কৰিছে। ইয়াৰ ভিতৰত সৌৰশক্তিৰ ক্ষমতা সংযোজনৰ ক্ষেত্ৰত বিশ্বৰ অন্যতম আগশাৰীৰ দেশ হোৱা, পি এম সূৰ্য্য ঘৰ যোজনা ৰূপায়ণ, আন্তঃৰাষ্ট্ৰীয় সৌৰ মিত্ৰতা প্ৰতিষ্ঠা, আন্তঃৰাষ্ট্ৰীয় বিগ কেট এলায়েন্স (আই বি চি এ) আৰম্ভ কৰা, ৰামছাৰ জলাশয়ৰ স্থান সম্প্ৰসাৰণ, ৰাষ্ট্ৰসংঘৰ জলবায়ু পৰিৱৰ্তনৰ কাঠামো চুক্তিৰ অধীনত কেইবাখনো ৰাষ্ট্ৰীয়ভাৱে নিৰ্ধাৰিত অৱদান (এন ডি চি) লক্ষ্য নিৰ্ধাৰিত পূৰ্বেই লাভ কৰা আদি।

তেওঁ ব্যাখ্যা কৰে যে দিল্লীৰ বায়ু পৰিষ্কাৰ কৰাৰ বাবে দিল্লী চৰকাৰে গ্ৰহণ কৰা পদক্ষেপসমূহৰ ভিতৰত আছে অনলাইন কন্টিনিউয়াছ ইমিছন মনিটৰিং চিষ্টেম (অ’চিইএমএছ), বায়ু প্ৰদূষণ নিয়ন্ত্ৰণ যন্ত্ৰ (এপিচিডি) স্থাপন কৰা, যান্ত্ৰিকভাৱে পথসমূহ গভীৰ পৰিষ্কাৰ কৰা, আৰু বৈদ্যুতিক বাহনলৈ দ্ৰুত পৰিৱৰ্তন।

ৰেখা গুপ্তাই উল্লেখ কৰে যে দিল্লীৰ বায়ুৰ গুণাগুণ উন্নত কৰাৰ বাবে সেউজীয়া বৃদ্ধি কৰা অন্যতম গুৰুত্বপূৰ্ণ ব্যৱস্থা। তেওঁ ঘোষণা কৰে যে চলিত বৰ্ষত দিল্লী চৰকাৰে সমগ্ৰ মহানগৰীত ১৫ লাখ গছপুলি ৰোপণৰ লক্ষ্য নিৰ্ধাৰণ কৰিছে।

এই অনুষ্ঠানত দিল্লী চৰকাৰে প্ৰস্তুত কৰা তিনিখন গুৰুত্বপূৰ্ণ পৰিৱেশ প্ৰকাশন প্ৰকাশ কৰে। ইয়াৰ ভিতৰত আছিল এন চি টি দিল্লীৰ কাৰ্য্য পৰিকল্পনা, অসোলা ভাট্টি অভয়াৰণ্য ব্যৱস্থাপনা পৰিকল্পনা, আৰু বৈজ্ঞানিক পৰিৱেশ শাসন শক্তিশালী কৰাৰ বাবে দিল্লী চৰাই এটলাছ।

অনুষ্ঠানৰ সময়ত সকলো বিশিষ্ট ব্যক্তিয়ে মাতৃৰ নামত এজোপা গছ অভিযানৰ অধীনত গছপুলি ৰোপণ কৰে। ধূলিমুক্ত দিল্লী অভিযানৰ অধীনত স্থানীয় ঘাঁহ আৰু জোপোহা জাতৰ বিশেষ প্ৰদৰ্শনীও পৰিদৰ্শন কৰে।

দিল্লী পক্ষী এটলাছ প্ৰস্তুত কৰাত অমূল্য অৱদান আগবঢ়োৱা নাগৰিক সমাজৰ সংগঠন আৰু স্বেচ্ছাসেৱকসকলক প্ৰমাণপত্ৰৰে সন্মানিত কৰা হয়, যিয়ে পৰিৱেশ নিৰীক্ষণত সাধাৰণ নাগৰিকৰ ক্ৰমবৰ্ধমান আৰু গুৰুত্বপূৰ্ণ ভূমিকাক প্ৰতিফলিত কৰে।

এই উপলক্ষে উপস্থিত থকা আন বিশিষ্ট ব্যক্তিসকলৰ ভিতৰত আছে কেন্দ্ৰীয় ৰাজ্যিক মন্ত্ৰী কীৰ্তি বৰ্ধন সিং, দিল্লীৰ পৰিৱেশ, বন আৰু বন্যপ্ৰাণী মন্ত্ৰী চৰ্দাৰ মঞ্জিন্দৰ সিং ছিৰছা,কে ধৰি কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ৰ অন্যান্য উচ্চপদস্থ বিষয়া।

হিন্দুস্থান সমাচাৰ / মনোজ কুমাৰ শইকীয়া