বিশ্বনাথ, ০৫ জুন (হি.স.)। চিকিৎসাৰ নামত বিশ্বনাথৰ নিচা মুক্তি কেন্দ্ৰত যুৱকক অমানৱীয় অত্যাচাৰৰ ভিডিঅ’ ভাইৰেল হোৱাৰ পিছত আৰক্ষীৰ অভিযান আৰম্ভ । বিশ্বনাথৰ দুখন নিচা মুক্তি কেন্দ্ৰত পৃথকে পৃথকে দুজন যুৱকক নিৰ্মম ভাবে অত্যাচাৰ কৰাৰ দুটাকৈ ভিডিঅ’ ভাইৰেল হোৱাত এতিয়া তীব্ৰ চাঞ্চল্যৰ সৃষ্টি হৈছে ।

এই অত্যাচাৰ চলাইছিল কেন্দ্ৰ দুটাৰ স্বত্বাধিকাৰীৰ লগতে কৰ্মচাৰীয়ে । ঘটনা পোহৰলৈ অহাৰ পিছতেই সমাজ কল্যাণ বিভাগৰ বিষয়াই বিশ্বনাথ চাৰিআলি সদৰ আৰক্ষী থানাত এজাহাৰ দাখিল কৰিছে । এজাহাৰৰ ভিত্তিত বিশ্বনাথ আৰক্ষীয়ে অভিযান চলাই নিচা মুক্তি কেন্দ্ৰ দুটাৰ স্বত্বাধিকাৰী মানস শইকীয়া আৰু ৰাজা চাহা ওৰফে আকাশক আটক কৰিছে । লাইফ ৱেল ৰিহেবিলিটেচন চেন্টাৰ আৰু প্ৰতিজ্ঞা নিচামুক্তি কেন্দ্ৰত সংঘটিত হৈছে এই ঘটনা। ঘটনাৰ লগত জড়িত মুন্না হাজৰিকা আৰু গৌতম দৈমাৰীক বিচাৰি অভিযান অব্যাহত ৰাখিছে আৰক্ষীয়ে । বিশেষ সূত্ৰে জানিব পৰা মতে, তদন্তৰ পিছত আৰু কেইবাটাও নিচা মুক্তি কেন্দ্ৰ আৰু স্বত্বাধিকাৰীৰ বিৰুদ্ধে অভিযান চলোৱাৰ সম্ভাৱনা আছে । উল্লেখযোগ্য যে পূৰ্বতেও এই নিচা মুক্তি কেন্দ্ৰত যুৱকৰ মৃত্যুক লৈ বিতৰ্কৰ সৃষ্টি হৈছিল। আৰক্ষীৰ তদন্তত সেই মৃত্যুৰ ঘটনাও সাঙুৰি লোৱাৰ সম্ভাৱনা আছে । নিচা মুক্তিৰ নামত চলা এনে অমানৱীয় কাণ্ডই সমগ্ৰ বিশ্বনাথতে চাঞ্চল্যৰ সৃষ্টি কৰিছে।

হিন্দুস্থান সমাচাৰ / কিশোৰ মিশ্ৰ