নতুন দিল্লী, ০৫ জুন (হি.স.)। ভাৰত চৰকাৰৰ ছিকিউৰিটিজৰ পৰা বিদেশী বিনিয়োগকাৰীয়ে উপাৰ্জন কৰা আয় আৰু লাভৰ সকলো কৰ আঁতৰাই দিছে কেন্দ্ৰীয় চৰকাৰে। এই পদক্ষেপৰ লক্ষ্য হৈছে দেশৰ সাৰ্বভৌম ঋণৰ বজাৰখন বিশ্ব পুঁজিৰ বাবে অধিক আকৰ্ষণীয় কৰি তোলা। এই পৰিৱৰ্তনসমূহ ২০২৬ চনৰ ১ এপ্ৰিলৰ পৰা কাৰ্যকৰী হ’ব।
কেন্দ্ৰীয় চৰকাৰে চৰকাৰী ছিকিউৰিটিজ (জি-চেক্স)ত বিদেশী প্ৰতিষ্ঠানিক বিনিয়োগকাৰীয়ে কৰা বিনিয়োগৰ ওপৰত দীৰ্ঘম্যাদী মূলধনী লাভৰ কৰ (এলটিচিজি) বাতিল কৰাৰ সিদ্ধান্ত গ্ৰহণ কৰিছে। মন্ত্ৰালয়ৰ তথ্য অনুসৰি এই সন্দৰ্ভতো এক অধ্যাদেশ জাৰি কৰা হৈছে। লক্ষ্য হৈছে দেশত ডলাৰৰ প্ৰবাহ বৃদ্ধি কৰা। বিত্ত মন্ত্ৰালয়ে উল্লেখ কৰিছে যে চৰকাৰী ছিকিউৰিটিজ (জি-ছেক্স)ৰ পৰা সুতৰ আয় আৰু মূলধনী লাভৰ ওপৰত বিদেশী প্ৰতিষ্ঠানিক বিনিয়োগকাৰীক (এফআইআই) সম্পূৰ্ণ কৰ ৰেহাই প্ৰদান কৰিছে। ইয়াৰ বাবে ভাৰত চৰকাৰে ৫ জুনত জাৰি কৰা আয়কৰ (সংশোধনী) অধ্যাদেশ, ২০২৬ প্ৰৱৰ্তন কৰিছে। এই সিদ্ধান্ত ১ এপ্ৰিলৰ পৰা কাৰ্যকৰী হ'ব।
কেন্দ্ৰীয় বিত্ত আৰু কৰ্পৰেট পৰিক্ৰমা মন্ত্ৰী নিৰ্মলা সীতাৰমণে ২০২৬-২৭ বিত্তীয় বৰ্ষৰ কেন্দ্ৰীয় বাজেটত ঘোষণা কৰে যে পৰ্টফলিঅ’ বিনিয়োগ আঁচনিৰ জৰিয়তে তালিকাভুক্ত ভাৰতীয় কোম্পানীসমূহৰ ইকুইটি ছিকিউৰিটিত বিনিয়োগ কৰিবলৈ অনুমতি দিয়া হ’ব পাৰ্চনছ ৰেচিডেণ্ট আউটছাইড ইণ্ডিয়া (পি আৰ অ’ আই)ক। এই আঁচনি পূৰ্বতে কেৱল প্ৰবাসী ভাৰতীয় আৰু অ’চিআইৰ বাবেহে উপলব্ধ আছিল।
মন্ত্ৰালয়ৰ মতে, এই অধ্যাদেশৰ জৰিয়তে আয়কৰ আইন সংশোধন কৰি এই ৰেহাই প্ৰদান কৰা হৈছে। দীৰ্ঘম্যাদী আৰু সুস্থিৰ মূলধন আকৰ্ষণ কৰিবলৈ কেন্দ্ৰীয় চৰকাৰে চৰকাৰী ছিকিউৰিটিৰ ওপৰত মূলধনী লাভৰ কৰ আঁতৰোৱাৰ সিদ্ধান্ত লৈছে, কিয়নো এই যন্ত্ৰসমূহৰ মেচিউৰিটি দীঘলীয়া সময় থাকে।
এই চৰকাৰী সিদ্ধান্ত এনে সময়ত লোৱা হৈছে যেতিয়া বিদেশী বিনিয়োগকাৰীয়ে এই বছৰ এতিয়ালৈকে স্থানীয় শ্বেয়াৰ বজাৰৰ পৰা ২.৬ লাখ কোটি টকাৰ বৃহৎ পৰিমাণৰ ধন উলিয়াইছে, যিটো ২০২৫ চনত উলিওৱা ১.৬৬ লাখ কোটি ₹তকৈ বহু বেছি।এইটো বিশ্বজুৰি অনিশ্চয়তাৰ বাবেই হৈছে। কেৱল জুন মাহৰ প্ৰথম তিনিদিনত বিদেশী বিনিয়োগকাৰীয়ে ইকুইটিৰ পৰা প্ৰায় ৩৪,০০০ কোটি টকা উলিয়াইছিল, যাৰ ফলত টকাৰ ওপৰত অতিৰিক্ত হেঁচা পৰিছিল।
বিদেশী বিনিয়োগকাৰীয়ে সম্পূৰ্ণ প্ৰৱেশ পথ (এফএআৰ)ৰ অধীনত ঋণ বজাৰত ১৭,০০০ কোটি টকাৰো অধিক বিনিয়োগ কৰিছে। এই বছৰ এতিয়ালৈকে তেওঁলোকে সাধাৰণ ঋণ সীমাৰ অধীনত প্ৰায় ৪,০০০ কোটি টকা আৰু স্বেচ্ছামূলক ধৰি ৰখা পথ (ভিআৰআৰ)ৰ জৰিয়তে ৩৪০ কোটি টকা উলিয়াইছে। বৰ্তমান এফআইআইসমূহে ইকুইটি আৰু ঋণ বিনিয়োগৰ পৰা লাভৰ ওপৰত ১২.৫% হাৰত দীৰ্ঘম্যাদী মূলধনী লাভৰ কৰ আদায় দিয়ে।
উল্লেখযোগ্য যে ৰিজাৰ্ভ বেংকে পৃথকে পৃথকে কিছুমান দীৰ্ঘম্যাদী ছ’ভাৰেইন বণ্ডক সম্পূৰ্ণৰূপে সুলভ শ্ৰেণীত অন্তৰ্ভুক্ত কৰাৰ অনুমতি দিছে, যাৰ ফলত বিদেশী বিনিয়োগকাৰীয়ে কোনো বাধা নোহোৱাকৈ ইয়াত বিনিয়োগ কৰিব পাৰে। এই পথৰ অধীনত উপলব্ধ চৰকাৰী ছিকিউৰিটিৰ তালিকাখন শেষবাৰৰ বাবে ২০২৪ চনত সংশোধন কৰা হৈছিল যেতিয়া কেন্দ্ৰীয় বেংকে ১৪ বছৰীয়া আৰু ৩০ বছৰীয়া বণ্ড আঁতৰাইছিল। যোৱা মাহত পশ্চিম এছিয়াৰ সংকটৰ বাবে খাৰুৱা তেল আমদানিৰ ব্যয় বৃদ্ধি পোৱাৰ মাজতে প্ৰধানমন্ত্ৰী নৰেন্দ্ৰ মোদীয়ে জনসাধাৰণক বৈদেশিক মুদ্ৰা সংৰক্ষণৰ বাবে আহ্বান জনাইছিল।
হিন্দুস্থান সমাচাৰ / মনোজ কুমাৰ শইকীয়া
