নতুন দিল্লী, ০৫ জুন (হি.স.)। ৰাষ্ট্ৰীয় কৃষি বিজ্ঞান একাডেমী (এনএএএছ) প্ৰতিষ্ঠা দিৱস উদযাপনত শুকুৰবাৰে প্ৰদান কৰা ড° এম এছ স্বামীনাথন প্ৰতিষ্ঠা দিৱসৰ বক্তৃতাত ট্ৰাষ্ট ফৰ এডভান্সমেণ্ট অৱ এগ্ৰিকালচাৰেল ছায়েন্সৰ সভাপতি ড° আৰ এছ পাৰোডাই কয় যে ভাৰতে খাদ্য সুৰক্ষা লাভ কৰিছে আৰু এতিয়া কৃষি উন্নয়নৰ কেন্দ্ৰবিন্দু ‘কৃষক-প্ৰথম’ পদ্ধতিৰে কৃষকৰ সমৃদ্ধিৰ ওপৰত হ’ব লাগে।

ভাৰত ৰত্ন এম এছ স্বামীনাথনক শ্ৰদ্ধাঞ্জলি জনাই ড০ পৰোদাই কয় যে দেশে সেউজ, বগা, নীলা, আৰু ৰামধেনু বিপ্লৱৰ জৰিয়তে খাদ্য সুৰক্ষা নিশ্চিত কৰিছে। এতিয়া পৰৱৰ্তী লক্ষ্য হ’ব লাগে কৃষকৰ আয় আৰু জীৱন ধাৰণৰ মান উন্নত কৰা।

তেওঁ জনোৱা মতে, ২০২৫-২৬ বৰ্ষত ভাৰতে ৩৭.৬ কোটি টন খাদ্য শস্য উৎপাদনৰ অভিলেখ সৃষ্টি কৰিছে, যিটো পূৰ্বৰ বছৰৰ তুলনাত প্ৰায় ১ কোটি ৯০ লাখ টন বেছি। এই সময়ছোৱাত ধানৰ উৎপাদন ১৫৪ মিলিয়ন টন, ঘেঁহু ১২ কোটি টন, মাকৈ উৎপাদন ৫.৫ কোটি টন, আৰু তৈলবীজৰ উৎপাদন ৪.৩ কোটি টন অতিক্ৰম কৰিছিল।

ড০ পাৰোডাই কৃষি খণ্ডই সন্মুখীন হোৱা প্ৰত্যাহ্বানসমূহৰ ওপৰতো আলোকপাত কৰি কয় যে কৃষি লাভজনকতা হ্ৰাস পোৱা, ভূমিৰ অধিকাৰ সংকুচিত হোৱা, মাটি খহনীয়া, ভূগৰ্ভস্থ পানীৰ শোষণ, জলবায়ু পৰিৱৰ্তনৰ ভাবুকি, পুষ্টিহীনতা, আৰু কৃষিৰ প্ৰতি যুৱক-যুৱতীসকলৰ আগ্ৰহ হ্ৰাস পোৱা আদি বিষয়সমূহৰ সমাধান কৰাটো অতি প্ৰয়োজনীয়।

অধ্যাপক স্বামীনাথনৰ চিৰসেউজ বিপ্লৱৰ ধাৰণাটোৰ কথা উল্লেখ কৰি তেওঁ পৰিৱেশৰ ভাৰসাম্য বজাই ৰাখি উৎপাদনশীলতা বৃদ্ধিৰ প্ৰয়োজনীয়তাৰ ওপৰত গুৰুত্ব আৰোপ কৰে।

ড° পাৰোডাই ভাৰতীয় কৃষি পুনৰ নিৰ্মাণৰ বাবে পাঁচটা মূল স্তম্ভৰ পৰামৰ্শ দিছিল— আয়কেন্দ্ৰিক নীতি, জলবায়ু-স্মাৰ্ট কৃষি, অন্তৰ্ভুক্ত প্ৰযুক্তি, পুষ্টি সুৰক্ষা, আৰু মহিলা আৰু যুৱ নেতৃত্ব।

তেওঁ উল্লেখ কৰে যে ইতিমধ্যে ১০ হাজাৰ কৃষক উৎপাদক সংগঠন গঠনৰ লক্ষ্যত উপনীত হৈছে আৰু ২০ হাজাৰলৈ বৃদ্ধি কৰা হৈছে। বৰ্তমান প্ৰায় ৫৬ লাখ কৃষক এফ পি অ’ৰ সৈতে জড়িত, য’ত ২২ লাখ মহিলা কৃষকও আছে। কেৱল মহিলাৰ বাবে ১১৭৫টা এফপিঅ’ও চলি আছে।

ৰাষ্ট্ৰীয় পৰিয়াল স্বাস্থ্য সমীক্ষাৰ কথা উল্লেখ কৰি তেওঁ কয় যে দেশৰ পাঁচ বছৰৰ তলৰ শিশুৰ ৩৫.৫ শতাংশই ষ্টাণ্টিঙৰ ফলত আক্ৰান্ত হয়। তেওঁ মোটা শস্য, দালি, সৰিয়হ, জৈৱ শক্তিশালী শস্য, ফল-মূল, আৰু শাক-পাচলিৰ উৎপাদন আৰু ব্যৱহাৰক প্ৰসাৰিত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।

ড০ পাৰোডাই কয় যে প্ৰতিষ্ঠানিক সংস্কাৰ, শক্তিশালী কৃষি সম্প্ৰসাৰণ ব্যৱস্থা, ৰাজহুৱা প্ৰতিষ্ঠান, ব্যক্তিগত খণ্ড, কৃষক সংগঠনৰ মাজত উন্নত সহযোগিতা এই সময়ৰ প্ৰয়োজনীয়তা। তেওঁ কয় যে ভাৰতৰ কৃষকসকলে মৰ্যাদা, নিৰাপত্তা, সমৃদ্ধিৰ জীৱন যাপন কৰিবলৈ সক্ষম হৈছে নে নাই তাৰ ওপৰত ভাৰতৰ প্ৰকৃত অগ্ৰগতি জুখিব।

হিন্দুস্থান সমাচাৰ / মনোজ কুমাৰ শইকীয়া