কিংষ্টন, ০৪ জুন (হি.স.): শ্ৰীলংকাই ৱেষ্ট ইণ্ডিজ ভ্ৰমণৰ প্ৰথমখন এদিনীয়াত বুধবাৰে গভীৰ নিশা শক্তিশালী প্ৰদৰ্শন আগবঢ়াই ৪১ ৰানত জয়লাভ কৰে। অধিনায়কত্বলৈ ঘূৰি আহি কুশল মেণ্ডিছে এক সুন্দৰ অৰ্ধশতক অৰ্জন কৰাৰ বিপৰীতে বলাৰসকলে সফলতাৰে লক্ষ্য ৰক্ষা কৰি জয় নিশ্চিত কৰে।
শ্ৰীলংকাই সতৰ্কতাৰে আৰম্ভণি কৰিছিল যদিও পাথুম নিছাংকাই আগতীয়াকৈ জীৱনদান পাইছিল, যাৰ সম্পূৰ্ণ সুবিধা তেওঁ লৈছিল। আনটো মূৰত কুশল মেণ্ডিছে প্ৰথম অৱস্থাত সময় লৈছিল যদিও তাৰ পিছত দ্ৰুত ৰাণেৰে ইনিংছ ত্বৰান্বিত কৰিছিল।
বিশেষকৈ কুশলে স্পিনাৰ গুদাকেশ মোতীক আক্ৰমণ কৰি ধাৰাবাহিকভাৱে বিশাল বিশাল শ্বট মাৰিছিল। তেওঁ ৬২টা বলত খৰতকীয়াকৈ ৭২ ৰান সংগ্ৰহ কৰে। কুশল আৰু নিছাংকাৰ মাজত হোৱা গুৰুত্বপূৰ্ণ অংশীদাৰিত্বই শ্ৰীলংকাক এক শক্তিশালী স্থানত ৰাখিছিল।
নিছাংকাই ৭৯ ৰান কৰাৰ বিপৰীতে মিডল অৰ্ডাৰত চৰিথ আছালংকাই ৪৫ ৰান আৰু জেনিথ লিয়ানাগে অপৰাজিত ৪৪ ৰান কৰি ৫০ অভাৰত দলটোক ৩০৩/৭ ৰানলৈ লৈ যায়।
ইফালে লক্ষ্য অনুসৰণ কৰি ৱেষ্ট ইণ্ডিজে দ্ৰুত আৰম্ভণি কৰে। প্ৰথম অভাৰত জন কেম্পবেল আৰু জাষ্টিন গ্ৰীভছে আক্ৰমণাত্মকভাৱে বেটিং কৰিছিল যদিও ৰাণ আউটে দলৰ গতিবেগ ভংগ কৰিছিল। ইয়াৰ পিছতে শ্ৰীলংকাৰ বলাৰসকলে অদম্য হেঁচা প্ৰয়োগ কৰে।
মহিষ থিখনাই গ্ৰীভছক আউট কৰি খেলখনলৈ ঘূৰাই অনাৰ বিপৰীতে ৱানিন্দু হাছাৰাংগাই গুৰুত্বপূৰ্ণ উইকেট দখল কৰি মিডল অৰ্ডাৰক ডেণ্ট কৰে। অধিনায়ক শ্বাই হোপে ৫৬ ৰান কৰিবলৈ সংগ্ৰাম কৰিছিল যদিও আন বেটছমেনৰ পৰা পৰ্যাপ্ত সমৰ্থনৰ অভাৱ আছিল।
শেষত দুষ্মন্ত চমীৰণাই সুন্দৰ বলিং কৰি চাৰিটা উইকেট দখল কৰে আৰু ৱেষ্ট ইণ্ডিজে ৪৯.২ অভাৰত ২৬২ ৰান সংগ্ৰহ কৰি অল আউট হয়।
চমু স্ক’ৰ: শ্ৰীলংকা – ৩০৩/৭ (৫০ অভাৰ) পাথুম নিছাংকা ৭৯, কুশল মেণ্ডিছ ৭২; মেথিউ ফৰ্ড ২/৪৪
ৱেষ্ট ইণ্ডিজ – ২৬২ (৪৯.২ অভাৰ) শ্বাই হোপ ৫৬; দুষ্মন্ত চমীৰা ৪/৬৭, মহীশ থিকশানা ২/২৬
ফলত শ্ৰীলংকাই ৪১ ৰানত জয়লাভ কৰে।
হিন্দুস্থান সমাচাৰ / মনোজ কুমাৰ শইকীয়া
