নতুন দিল্লী, ০৪ জুন (হি.স.)। কেন্দ্ৰীয় চৰকাৰে ঔষধ খণ্ডত আমদানিৰ নিৰ্ভৰশীলতা হ্ৰাস, বহনক্ষম উৎপাদনক প্ৰসাৰিত কৰা, আৰু স্বাস্থ্য সুৰক্ষা শক্তিশালী কৰাৰ বাবে চেন্নাইস্থিত বায়’নিমটেক ইণ্ডিয়া প্ৰাইভেট লিমিটেডৰ সেউজ ৰসায়ন ভিত্তিক প্ৰকল্পৰ সমৰ্থন দিয়াৰ ঘোষণা কৰিছে। এই ঘোষণাই কোম্পানীটোক নিজৰ প্ৰযুক্তিসমূহ বাণিজ্যিকীকৰণত সহায় কৰিব আৰু ঘৰুৱাভাৱে সক্ৰিয় ঔষধ উপাদান (এপিআই) আৰু নতুন ঔষধ প্ৰদান ব্যৱস্থা নিৰ্মাণ আৰম্ভ কৰিব।

কেন্দ্ৰীয় বিজ্ঞান আৰু প্ৰযুক্তি মন্ত্ৰালয়ে উল্লেখ কৰিছে যে এই প্ৰকল্পৰ জৰিয়তে থলুৱাভাৱে মাইনোক্সিডিল, ট্ৰেনেক্সামিক এচিড, ডিকুৱেলিনিয়াম ক্লৰাইড, আৰু ইয়াৰ মধ্যৱৰ্তী পদাৰ্থ উৎপাদন কৰা হ’ব। বিশেষকৈ ট্ৰেনেক্সামিক এচিড কম খৰচী আৰু পৰিৱেশ অনুকূল সংশ্লেষণ পথ ব্যৱহাৰ কৰি উৎপাদন কৰা হ’ব, যিটো ৰক্তক্ষৰণৰ বিকাৰৰ চিকিৎসাত উপযোগী। নেন’টেকন’লজি ভিত্তিক ঔষধ লাইপ’জম এপিআইও প্ৰস্তুত কৰা হৈছে, যিবোৰ স্তন আৰু ছালৰ কৰ্কট ৰোগৰ চিকিৎসাত ব্যৱহাৰ কৰা হ’ব।

টিডিবিৰ সচিব ৰাজেশ কুমাৰ পাঠকে কয় যে ঔষধ উৎপাদনৰ ভৱিষ্যত নিহিত হৈ আছে বহনক্ষম আৰু প্ৰযুক্তি-চালিত উৎপাদন ব্যৱস্থাত যিয়ে গুণগত মান, দক্ষতা, আৰু পৰিৱেশৰ দায়বদ্ধতাৰ সংমিশ্ৰণ ঘটায়। থলুৱা এপিআই আৰু নতুন ঔষধ প্ৰদান ব্যৱস্থাৰ বিকাশে বিশ্বব্যাপী ফাৰ্মা হাব হিচাপে ভাৰতৰ স্থিতি শক্তিশালী কৰিব।

বায়’নিমটেক ইণ্ডিয়া প্ৰাইভেট লিমিটেডে কয় যে এই সহায়ে কোম্পানীটোক নিজৰ সেউজ ৰসায়ন ভিত্তিক উৎপাদন প্ৰযুক্তি আৰু উন্নত ঔষধ সামগ্ৰীৰ বাণিজ্যিকীকৰণ ত্বৰান্বিত কৰিবলৈ সক্ষম কৰিব। ইয়াৰ ফলত ঘৰুৱা আৰু আন্তঃৰাষ্ট্ৰীয় বজাৰত সুযোগ সৃষ্টি হ’ব, কৃষকসকল উপকৃত হ’ব, কৰ্মসংস্থাপন বৃদ্ধি পাব, আৰু গ্ৰাম্য শক্তিৰ সুৰক্ষা শক্তিশালী হ’ব।

হিন্দুস্থান সমাচাৰ / মনোজ কুমাৰ শইকীয়া