নতুন দিল্লী, ০৪ জুন (হি.স.)। প্ৰধানমন্ত্ৰী নৰেন্দ্ৰ মোদীয়ে কাইলৈ (৫ জুন) গুজৰাট আৰু দমন ভ্ৰমণ কৰিব । এই ভ্ৰমণৰ সময়ত তেওঁ গুজৰাটৰ চুৰাটত প্ৰায় ১৮,৮০০ কোটি ₹ আৰু দমনত প্ৰায় ২,৯৭০ কোটি টকাৰ বিভিন্ন উন্নয়নমূলক প্ৰকল্প উদ্বোধন কৰিব, আধাৰশিলা স্থাপন কৰিব আৰু উৎসৰ্গা কৰিব। ইয়াৰ উপৰিও প্ৰধানমন্ত্ৰীয়ে লক্ষদ্বীপৰ বাবে ₹৮৮৫ কোটি টকাৰ বন্দৰ প্ৰকল্পৰ আধাৰশিলা স্থাপন কৰিব।

আজি প্ৰধানমন্ত্ৰীৰ কাৰ্যালয়ে ঘোষণা কৰে যে তেওঁ কাইলৈ দুপৰীয়া প্ৰায় ২:৩০ বজাত চুৰাট জিলাৰ হাজিৰাত উপস্থিত হৈ তাত চলি থকা উদ্যোগিক কাৰ্যকলাপ আৰু আন্তঃগাঁথনি প্ৰকল্পসমূহ পৰ্যালোচনা কৰিব। ইয়াৰ পিছত তেওঁ পথ, শক্তি, আৰু উদ্যোগ খণ্ডৰ সৈতে জড়িত ১৮,৮০০ কোটি ₹তকৈ অধিক মূল্যৰ প্ৰকল্পৰ উদ্বোধন আৰু আধাৰশিলা স্থাপন কৰিব, আৰু এখন ৰাজহুৱা সভাত ভাষণ দিব।

চুৰাটত প্ৰধানমন্ত্ৰীয়ে আঠ লেনযুক্ত বদোদৰা-মুম্বাই প্ৰৱেশ নিয়ন্ত্ৰিত এক্সপ্ৰেছৱেৰ পেকেজ ৬ আৰু পেকেজ ৭ দেশৰ বাবে উৎসৰ্গা কৰিব। তেওঁ ৫৬ নং ৰাষ্ট্ৰীয় ঘাইপথৰ গুৰুত্বপূৰ্ণ অংশসমূহৰ চাৰিলেনিঙৰ আধাৰশিলা স্থাপন কৰিব।ইয়াৰ ফলত জনজাতীয় অঞ্চলসমূহত সংযোগ শক্তিশালী হ’ব আৰু ঐক্যৰ মূৰ্তিলৈ যোৱাৰ সুবিধা হ’ব।

এই ভ্ৰমণৰ সময়ত প্ৰধানমন্ত্ৰীয়ে চুৰাটত ২০০ বিছনাযুক্ত ই এছ আই চি চিকিৎসালয় এখনো উদ্বোধন কৰিব। চিকিৎসালয়খনত বিভিন্ন ধৰণৰ বিশেষ চিকিৎসা সেৱা, কেন্দ্ৰীয় পৰীক্ষাগাৰ, ২৪ ঘণ্টীয়া জৰুৰীকালীন আৰু আঘাতৰ যত্নৰ ব্যৱস্থা কৰা হ’ব। তেওঁ আন্তঃৰাজ্যিক শক্তি সঞ্চাৰণ ব্যৱস্থাৰ অধীনত গুজৰাটৰ সংবহন নেটৱৰ্ক সম্প্ৰসাৰণ প্ৰকল্পও উদ্বোধন কৰিব। তেওঁ ভালছাদত শক্তি বিতৰণ ব্যৱস্থাৰ উন্নীতকৰণ, দহেজ পেট্ৰলিয়াম-কেমিকেলছ এণ্ড পেট্ৰ’কেমিকেলছ ইনভেষ্টমেণ্ট ৰিজিঅ’নত আৱৰ্জনা নিষ্কাশন আৰু পৰিশোধন আন্তঃগাঁথনি, সৰুগাম ঔদ্যোগিক উন্নয়ন নিগম, আৰু জাম্বুছাৰ বাল্ক ড্ৰাগ পাৰ্কত উপযোগী প্ৰকল্পৰ শুভাৰম্ভ কৰিব।

ইয়াৰ পিছত তেওঁ দমনলৈ গৈ সন্ধিয়া প্ৰায় ৬:১৫ বজাত নতুন বিমানবন্দৰ টাৰ্মিনেল ভৱনটো উদ্বোধন কৰিব আৰু নামো চিকিৎসালয়খন দেশৰ বাবে উৎসৰ্গা কৰিব। ইয়াৰ পিছত তেওঁ প্ৰায় ২,৯৭০ কোটি টকাৰ বিভিন্ন উন্নয়নমূলক প্ৰকল্পৰ উদ্বোধন, উৎসৰ্গা আৰু আধাৰশিলা স্থাপন কৰিব।

দমনত নমো বিমানবন্দৰৰ নতুন টাৰ্মিনেল ভৱন আৰু নমো হাস্পতালকে ধৰি প্ৰায় ১,৩৪০ কোটি টকাৰ প্ৰকল্প ৰাষ্ট্ৰৰ বাবে উৎসৰ্গা কৰা হ’ব। নতুন টাৰ্মিনেলটোৱে আঞ্চলিক বিমান সংযোগ শক্তিশালী কৰিব, আনহাতে চিকিৎসালয়খনে দৈনিক প্ৰায় ১৫০০ বহিঃৰোগীক সেৱা আগবঢ়াব পাৰিব।

প্ৰধানমন্ত্ৰীয়ে প্ৰায় ১৬৩০ কোটি টকাৰ প্ৰকল্পৰ আধাৰশিলাও স্থাপন কৰিব। ইয়াৰ ভিতৰত আছে আইকনিক ব্ৰীজ, ডামান কনভেনচন চেণ্টাৰ, নেশ্যনেল ইনষ্টিটিউট অৱ ফেশ্বন টেকন’লজি (এন আই এফ টি) কেম্পাছ। এই প্ৰকল্পসমূহে পৰ্যটন, বিনিয়োগ, নিয়োগ, আৰু আন্তঃগাঁথনি বৃদ্ধি কৰিব বুলি আশা কৰা হৈছে।

লগতে লক্ষদ্বীপৰ বাবে ₹৮৮৫ কোটি টকাৰ চাৰিটা গুৰুত্বপূৰ্ণ বন্দৰ প্ৰকল্পৰ আধাৰশিলা স্থাপন কৰিব। ইয়াৰ ভিতৰত কালপেনি আৰু কদমাত দ্বীপৰ পূব আৰু পশ্চিম উপকূলত বন্দৰৰ সুবিধাৰ উন্নয়ন। এই বহুমুখী জেটী নিৰ্মাণৰ ফলত ৩০০ মিটাৰ পৰ্যন্ত দৈৰ্ঘ্যৰ ক্ৰুজ আৰু যাত্ৰীবাহী জাহাজ বছৰজুৰি চলাচল কৰিব পৰা যাব। এই প্ৰকল্পসমূহে যাত্ৰী আৰু মাল পৰিচালনা, মাছ প্ৰক্ৰিয়াকৰণ, ইন্ধন বিতৰণ, বৰফ যোগান, নাও মেৰামতিৰ দৰে সুবিধাও গঢ়ি তুলিব।

হিন্দুস্থান সমাচাৰ / মনোজ কুমাৰ শইকীয়া