নতুন দিল্লী, ০৩ জুন (হি.স.)। দিল্লীৰ মালব্য নগৰ অঞ্চলৰ ফ্ল’ৰিছ ষ্টে বি এণ্ড বি ৰেষ্টুৰেণ্টত বুধবাৰে পুৱা সংঘটিত হোৱা অগ্নিকাণ্ডত ২১ জন লোকৰ মৃত্যু হোৱা বুলি নিশ্চিত হৈছে। নিৰাপদে উদ্ধাৰ হৈছে কুৰিজন লোকক। আৰক্ষী আৰু স্থানীয় বাসিন্দাৰ সহায়ত ৮টা অগ্নিনিৰ্বাপক বাহিনীৰ গাড়ীয়ে জুই নিয়ন্ত্ৰণলৈ আনে।

এই বৃহৎ অগ্নিকাণ্ডৰ ফলত ঘণ্টাৰ পিছত ঘণ্টা ধৰি অঞ্চলটোত আতংকৰ সৃষ্টি হয়। জুই ইমানেই দ্ৰুতগতিত বিয়পি পৰে যে ৰেষ্টুৰেণ্টখনৰ ভিতৰত আবদ্ধ হৈ থকা বহু লোক আৰু ইয়াৰ কাষৰীয়া চৌহদত আবদ্ধ হৈ পৰে। এই তথ্য লাভ কৰাৰ লগে লগে অগ্নিনিৰ্বাপক বাহিনী, দিল্লী আৰক্ষী, দুৰ্যোগ ব্যৱস্থাপনা সংস্থাৰ দলসমূহে ততাতৈয়াকৈ ঘটনাস্থলীত উপস্থিত হৈ এক বৃহৎ উদ্ধাৰ আৰু সাহায্য অভিযান আৰম্ভ কৰে।

চৰকাৰী তথ্য অনুসৰি এই মৰ্মান্তিক ঘটনাত ২১ জন লোকক মৃত বুলি ঘোষণা কৰা হৈছে। ৮টা অগ্নিনিৰ্বাপক বাহিনীৰ সহায়ত সফলতাৰে নিৰ্বাপিত হৈছে এই জুই। আৰক্ষী, অগ্নিনিৰ্বাপক সেৱা, আৰু অন্যান্য জৰুৰীকালীন উদ্ধাৰ কৰ্মীৰ সমন্বিত প্ৰচেষ্টাৰ জৰিয়তে ৪০ জনতকৈ অধিক লোকক নিৰাপদে উলিয়াই আনি ওচৰৰ চিকিৎসালয়ত চিকিৎসাৰ বাবে ভৰ্তি কৰা হৈছে।

বিষয়াসকলে কয় যে এই সংখ্যাত এতিয়ালৈকে অট্টালিকাৰ পৰা খালী কৰা সকলোকে অন্তৰ্ভুক্ত কৰা হৈছে। আহত ব্যক্তিৰ সংখ্যা আৰু তেওঁলোকৰ অৱস্থাৰ সবিশেষ তথ্য নিজ নিজ চিকিৎসালয়ৰ পৰা সংগ্ৰহ কৰা হৈছে। প্ৰশাসনে চিকিৎসালয়সমূহৰ সৈতে অহৰহ সংস্পৰ্শত থাকে আৰু আহতসকলৰ অৱস্থাৰ ওপৰত নজৰ ৰাখিছে।

উদ্ধাৰ আৰু সাহায্য অভিযানৰ সময়ত অগ্নিনিৰ্বাপক বাহিনীৰ লোকসকলেও প্ৰত্যাহ্বানৰ সন্মুখীন হ’বলগীয়া হয়। জুই নিৰ্বাপন কৰাৰ লগতে ভিতৰত আবদ্ধ হৈ থকা লোকসকলক উদ্ধাৰ কৰাৰ সময়তে আহত হয় এল এফ এম যোগেন্দ্ৰ। লগে লগে তেওঁক প্ৰাথমিক চিকিৎসাৰ ব্যৱস্থা কৰা হয়। ইফালে হঠাতে এছ টি অ’ মনোজৰ অৱনতি ঘটে, তাৰ পিছত তেওঁক কৰ্তব্যৰ পৰা মুক্ত কৰি পুনৰ ষ্টেচনলৈ প্ৰেৰণ কৰা হয়।

ঘটনাৰ ভয়াৱহতাৰ প্ৰতি লক্ষ্য ৰাখি অগ্নিনিৰ্বাপক বাহিনীৰ প্ৰধান সঞ্চালকেও সেই স্থানত উপস্থিত হয়। উচ্চপদস্থ বিষয়াৰ উপস্থিতিত সমগ্ৰ অভিযানটো নিৰীক্ষণ কৰা হৈছে। অগ্নিনিৰ্বাপক বাহিনী, আৰক্ষী, আৰু অন্যান্য সংস্থাসমূহৰ যৌথ দলে অট্টালিকাটোৰ প্ৰতিটো অংশত ভালদৰে তালাচী চলাইছে যাতে ভিতৰত কোনো লোক আবদ্ধ নাথাকে ।

ঘটনাস্থলীত উপস্থিত থকা বিষয়াসকলে জনোৱা মতে, অগ্নিকাণ্ড বহুলাংশে নিয়ন্ত্ৰণলৈ অনা হৈছে যদিও ধোঁৱা আৰু গৰমৰ বাবে অত্যন্ত সাৱধানতাৰে তালাচী অভিযান চলোৱা হৈছে। উদ্ধাৰকাৰী দলে অট্টালিকাটোত প্ৰৱেশ কৰি প্ৰতিটো কোঠা আৰু বেছমেণ্ট পৰিদৰ্শন কৰি আছে।

ঘটনাৰ পিছতে মালবিয়া নগৰ আৰু ইয়াৰ আশে-পাশে থকা অঞ্চলত এক বৃহৎ জনসমাগম হয়। আৰক্ষীয়ে নিৰাপত্তাজনিত কাৰণত ঘেৰাও কৰি জনসাধাৰণৰ চলাচল নিয়ন্ত্ৰণ কৰিছে। বৰ্তমান অগ্নিকাণ্ডৰ কাৰণ জানিব পৰা হোৱা নাই। প্ৰাথমিক তদন্তৰ পিছতহে কাৰণ স্পষ্ট হ’ব।

--------------

হিন্দুস্থান সমাচাৰ / অৰৱিন্দ