- ভৰুচত ৮৯৪ কোটি আৰু ভালছাদত ১৬৯.৩০ কোটি ₹তকৈ অধিক মূল্যৰ উন্নয়নমূলক প্ৰকল্প উদ্বোধন

- ঔদ্যোগিক অঞ্চলত আন্তঃগাঁথনি, নিষ্কাশন আৰু বর্জ্য পানী ব্যৱস্থাপনা আৰু অধিক শক্তিশালী

গান্ধীনগৰ, ০৩ জুন (হি.স.)। প্ৰধানমন্ত্ৰী নৰেন্দ্ৰ মোডী ৫ জুনত গুজৰাট ভ্ৰমণলৈ আহিব । এই ভ্ৰমণৰ সময়ত তেওঁ চুৰাটত মুঠ ১৮,৭৭৭ কোটি ₹তকৈ অধিক মূল্যৰ কেন্দ্ৰীয় আৰু ৰাজ্য চৰকাৰৰ উন্নয়নমূলক প্ৰকল্পৰ উদ্বোধন আৰু আধাৰশিলা স্থাপন কৰিব। ইয়াৰ ভিতৰত গুজৰাট ঔদ্যোগিক উন্নয়ন নিগমৰ অধীনত ১০৬৩.৪৩ কোটি টকা ব্যয় সাপেক্ষে সম্পূর্ণ হোৱা আঠটা গুৰুত্বপূৰ্ণ প্রকল্পৰ উদ্ধোধনো আছে৷ এই প্ৰকল্পসমূহৰ ভিতৰত ভৰুচ জিলাত ৮৯৪ কোটি ₹তকৈ অধিক আৰু ভালছাদ জিলাত ১৬৯.৩০ কোটি টকাৰ উন্নয়নমূলক প্ৰকল্প অন্তৰ্ভুক্ত কৰা হৈছে।

এই প্ৰকল্পসমূহে দক্ষিণ গুজৰাটৰ ঔদ্যোগিক অঞ্চলসমূহৰ আন্তঃগাঁথনি, নলা পৰিশোধন, আৰু নিষ্কাশন ব্যৱস্থা শক্তিশালী কৰিব।

ভৰুচে লাভ কৰিব ₹৮৯৪ কোটিৰো অধিক মূল্যৰ ছটা ডাঙৰ প্ৰকল্প

ভাৰুচ জিলাক ৰাসায়নিক আৰু পেট্ৰ’কেমিকেল উদ্যোগৰ এক প্ৰধান কেন্দ্ৰ হিচাপে গণ্য কৰা হয়। জিলাখনৰ ঔদ্যোগিক ক্ষমতা আৰু অধিক শক্তিশালী কৰাৰ বাবে প্ৰধানমন্ত্ৰীয়ে জিআইডিচিৰ ছটা গুৰুত্বপূৰ্ণ প্ৰকল্প উদ্বোধন কৰিব।

ডাহেজ পিচিপিআইআৰ ঔদ্যোগিক ক্লাষ্টাৰত ছাইখা পাম্পিং ষ্টেচনৰ পৰা দহেজৰ লেণ্ডফ’ল পইণ্টলৈকে ৯০ এমএলডি ক্ষমতাসম্পন্ন স্থল আৰু সাগৰৰ পাৰৰ এফ্লুৱেণ্ট নিষ্কাশন পাইপলাইন নিৰ্মাণ কৰা হৈছে। এই ₹৪৭৪.৬১ কোটি প্ৰকল্পত অসামৰিক গঠন, ইলেক্ট্ৰ’-মেকানিকেল চিষ্টেম, আৰু পিএলচি-এছচিএডিএ প্ৰযুক্তি অন্তৰ্ভুক্ত কৰা হৈছে। ইয়াৰ ফলত দহেজ আৰু ছাইখা অঞ্চলৰ নলা পৰিশোধন আৰু ব্যৱস্থাপনা যথেষ্ট শক্তিশালী হ’ব।

বৰ্তমান দহেজ পিচিপিআইআৰ অঞ্চলত ১০০০ৰো অধিক ঔদ্যোগিক ইউনিট চলি আছে। ইয়াৰ ভিতৰত ৰাসায়নিক, বস্ত্ৰ, ঔষধ, ৰং আৰু মধ্যৱৰ্তী, আৰু অভিযান্ত্ৰিক উদ্যোগ আদি অন্যতম।

ইয়াৰ উপৰিও জাম্বুছৰৰ বাল্ক ড্ৰাগ পাৰ্কত পথ, ধুমুহাৰ পানী নিষ্কাশন নেটৱৰ্ক, কেন্দ্ৰীয় নলাকে ধৰি আন্তঃগাঁথনি উন্নয়নৰ কাম ২৭৪.৯৬ কোটি টকা ব্যয় কৰা হৈছে। ইয়াৰ দ্বাৰা ঔষধ উদ্যোগৰ উন্নত আন্তঃগাঁথনি লাভ কৰিব।

ইয়াৰ উপৰিও প্ৰধানমন্ত্ৰীয়ে দহেজ-২ ঔদ্যোগিক এলেকাৰ বাবে ৩০ এমএলডি ড্ৰেনেজ পাম্পিং ষ্টেচন উদ্বোধন কৰিব। এই প্ৰকল্পই ঔদ্যোগিক নিষ্কাশন ব্যৱস্থাপনাক অধিক ফলপ্ৰসূ কৰি তুলিব আৰু সংহত এফ্লুৱেণ্ট পৰিবহণ নেটৱৰ্ক শক্তিশালী কৰিব। ইয়াৰ উপৰিও পানোলি সম্প্ৰসাৰণ ঔদ্যোগিক এলেকাত পথ, ক্ৰছ-ড্ৰেনেজ, পানী যোগান নেটৱৰ্ক, কম্পাউণ্ড দেৱাল, পেভাৰ ব্লক, বাগিচা, আৰু ষ্ট্ৰীটলাইটকে ধৰি আন্তঃগাঁথনি উন্নয়ন সম্পূৰ্ণ কৰা হৈছে। আন আন প্ৰকল্পসমূহৰ ভিতৰত আছে অংকলেশ্বৰৰ এফ্লুৱেণ্ট ট্ৰেন্সমিছন পাইপলাইনত এটা মধ্যৱৰ্তী বুষ্টাৰ পাম্পিং ষ্টেচন নিৰ্মাণ আৰু দহেজ-১ ঔদ্যোগিক এলেকাত প্ৰাকৃতিক নলা-২ উন্নীতকৰণ, যাৰ ফলত ধুমুহাৰ পানী নিষ্কাশন ব্যৱস্থা অধিক ফলপ্ৰসূ হ’ব আৰু পানী জমা হোৱা হ্ৰাস হ’ব।

ভালছাদত ১৬৯ কোটি টকাৰো অধিক মূল্যৰ দুটা গুৰুত্বপূৰ্ণ প্ৰকল্পৰ উদ্বোধন

প্ৰধানমন্ত্ৰীয়ে ভালছাদ জিলাৰ সাৰিগামত জিআইডিচিৰ দুটা বৃহৎ প্ৰকল্প উদ্বোধন কৰিব। প্ৰথম প্ৰকল্পৰ অধীনত কমন এফ্লুৱেণ্ট ট্ৰিটমেণ্ট প্লাণ্টৰ ক্ষমতা ১৫ এম এল ডিৰ পৰা ২৫ এম এল ডিলৈ বৃদ্ধি কৰা হৈছে। ইয়াৰ ফলত প্ৰদূষিত পানীৰ পৰিশোধন ক্ষমতা বৃদ্ধি পাব আৰু পৰিৱেশৰ মানদণ্ড ভালদৰে পালন কৰাটো নিশ্চিত হ’ব।

দ্বিতীয় প্ৰকল্পৰ অধীনত সাৰিগাম ঔদ্যোগিক এলেকাত ছাম্প আৰু পাম্পিং ষ্টেচনৰ লগতে এইচডিপিই অনশ্ব’ৰ আৰু অফশ্ব’ৰ আউটফল পাইপলাইন নেটৱৰ্ক গঢ়ি তোলা হৈছে। এই নেটৱৰ্কে পাম্পিং ষ্টেচনৰ পৰা লেণ্ডফ’ল চেম্বাৰলৈ আৰু গভীৰ সাগৰলৈ ঔদ্যোগিক বর্জ্য পানীৰ নিৰাপদ নিষ্কাশন নিশ্চিত কৰিব৷

এই প্ৰকল্পসমূহে দক্ষিণ গুজৰাটৰ ঔদ্যোগিক বিকাশ ত্বৰান্বিত কৰিব, পৰিৱেশ সুৰক্ষা আৰু আধুনিক ঔদ্যোগিক আন্তঃগাঁথনি শক্তিশালী কৰিব।

হিন্দুস্থান সমাচাৰ / মনোজ কুমাৰ শইকীয়া