নতুন দিল্লী, ০৩ জুন (হি.স.)। যুৱ পৰিক্ৰমা আৰু ক্ৰীড়া মন্ত্ৰালয়ৰ যুৱ পৰিক্ৰমা বিভাগৰ অধীনস্থ মোৰ যুৱ ভাৰতে (মাই ভাৰত) বিকশিত ভাইব্ৰেণ্ট ভিলেজ প্ৰগ্ৰেম (ভিভিভিপি) ২০২৬ৰ প্ৰথম পৰ্যায়ৰ আৰম্ভণি কৰিছে।

এই কাৰ্যসূচী দুটা পৰ্যায়ত ৰূপায়ণ কৰা হ’ব। এই পদক্ষেপৰ অধীনত দেশৰ বিভিন্ন প্ৰান্তৰ পৰা নিৰ্বাচিত ৫০০ মাই ভাৰতৰ স্বেচ্ছাসেৱকে সীমান্ত অঞ্চলত এসপ্তাহ কটাব আৰু স্থানীয় জনগোষ্ঠীৰ সৈতে কাম কৰিব। এই স্বেচ্ছাসেৱকসকলক দেশজোৰা অনলাইন কুইজ প্ৰতিযোগিতাৰ জৰিয়তে নিৰ্বাচিত কৰা হৈছিল য’ত ৩ লাখৰো অধিক যুৱকে অংশগ্ৰহণ কৰিছিল।

প্ৰথম পৰ্যায়ত ২৫০ জন স্বেচ্ছাসেৱকে লাডাখ, হিমাচল প্ৰদেশ, আৰু উত্তৰাখণ্ডৰ ৪৩ খন সীমান্ত গাঁৱত কাম কৰাৰ বিপৰীতে বাকী ২৫০ জন স্বেচ্ছাসেৱকে চলিত মাহত দ্বিতীয় পৰ্যায়ত ৫০ খন গাঁৱত কাৰ্যসূচীত অংশগ্ৰহণ কৰিব।

এই কাৰ্যসূচীয়ে যুৱক-যুৱতীসকলক সীমান্তৱৰ্তী অঞ্চলসমূহৰ সামাজিক, অৰ্থনৈতিক, আৰু সাংস্কৃতিক জীৱনক নিবিড়ভাৱে বুজিবলৈ সুযোগ প্ৰদান কৰিব। স্বেচ্ছাসেৱকসকলে গাঁৱৰ বাসিন্দা, পঞ্চায়তৰ প্ৰতিষ্ঠান, স্থানীয় প্ৰশাসন, আৰু নিৰাপত্তা বাহিনীৰ সৈতে মত বিনিময় কৰিব, আৰু এই অঞ্চলসমূহৰ উন্নয়ন আৰু কৌশলগত গুৰুত্বৰ বিষয়ে জানিব।

সীমান্ত সজাগতা, সাংস্কৃতিক বিনিময়, সম্প্ৰদায় জীৱন, সুশাসন, আৰ্থ-সামাজিক অধ্যয়ন, গাঁও উন্নয়ন পৰিকল্পনা, স্বেচ্ছাসেৱীতা, আৰু ৰাষ্ট্ৰীয় সংহতি আদি কেইবাটাও বিষয়বস্তুৰ ওপৰত ভিত্তি কৰি সাতদিনীয়া এই কাৰ্যসূচী।

স্বেচ্ছাসেৱকসকলে ঘৰে ঘৰে জৰীপ চলাব, গ্ৰাম সভাৰ কাৰ্যসূচীত অংশগ্ৰহণ কৰিব, স্বচ্ছতা আৰু পৰিৱেশ অভিযানত সহায় কৰিব, আৰু গাঁৱে-ভূঞে উন্নয়নৰ সম্ভাৱনা চিনাক্ত কৰিব।

এই কাৰ্যসূচীৰ এটা মূল উপাদান হৈছে ৰাষ্ট্ৰ প্ৰথম প্ৰত্যাহ্বান। এই কাৰ্যসূচীৰ অধীনত স্বেচ্ছাসেৱকসকলে পাঁচটা মূল বিষয়ত সজাগতা সৃষ্টি কৰিব:

থলুৱা সামগ্ৰী গ্ৰহণ কৰা

স্বাস্থ্যসন্মত খাদ্যাভ্যাসৰ প্ৰসাৰ

ৰাজহুৱা পৰিবহণ আৰু ইন্ধন সংৰক্ষণ

প্ৰাকৃতিক কৃষিৰ প্ৰসাৰ

স্থানীয় পৰ্যটনক প্ৰসাৰ কৰা

এই কাৰ্যসূচী গৃহ পৰিক্ৰমা মন্ত্ৰালয় আৰু ভাৰত-তিব্বত সীমান্ত আৰক্ষী (আই টি বি পি)ৰ সহযোগত ৰূপায়ণ কৰা হৈছে। ইয়াৰ উদ্দেশ্য হৈছে যুৱক-যুৱতীসকলৰ অংশগ্ৰহণৰ জৰিয়তে এখন উন্নত ভাৰত ২০৪৭ৰ লক্ষ্যক শক্তিশালী কৰা। কাৰ্যসূচীৰ সফল ৰূপায়ণৰ বাবে ৰাষ্ট্ৰীয়, ৰাজ্যিক আৰু জিলা পৰ্যায়ত নিয়ন্ত্ৰণ কক্ষ, ন’ডেল বিষয়া, গাঁৱৰ কাৰ্য্য পৰিকল্পনা, প্ৰশিক্ষণ অধিবেশন, আৰু অন্যান্য ব্যৱস্থা স্থাপন কৰা হৈছে।

হিন্দুস্থান সমাচাৰ / মনোজ কুমাৰ শইকীয়া