নতুন দিল্লী, ০৩ জুন (হি.স.)। ইৰাণে যোৱা নিশা কুৱেইট আৰু বাহৰেইনত থকা আমেৰিকাৰ সামৰিক ঘাটিত ক্ষেপণাস্ত্ৰ আক্ৰমণৰ পিছত পশ্চিম এছিয়াত উত্তেজনা বৃদ্ধি পাইছে। এই উত্তেজনাৰ ফলত খাৰুৱা তেলৰ মূল্য বৃদ্ধি পাইছে। আজি প্ৰতি বেৰেলত ব্ৰেণ্ট খাৰুৱা তেলৰ মূল্য ৯৭ ডলাৰৰ ওপৰেৰে জঁপিয়াই পৰে। একেদৰে পশ্চিম টেক্সাছ ইণ্টাৰমিডিয়েট (ডব্লিউ টি আই) খাৰুৱা তেলেও প্ৰতি বেৰেলত ৯৬ ডলাৰ অতিক্ৰম কৰে।
ইতিমধ্যে চলিত সপ্তাহৰ প্ৰথম দুটা ব্যৱসায়িক অধিবেশনত খাৰুৱা তেলৰ মূল্য প্ৰায় সাত শতাংশ বৃদ্ধি পাইছে। আজি ইৰাণে আমেৰিকাৰ সামৰিক ঘাটিসমূহক লক্ষ্য কৰি লোৱাৰ ফলত পশ্চিম এছিয়াত পুনৰ যুদ্ধৰ আশংকা বৃদ্ধি পাইছে। এই উত্তেজনাই উপসাগৰীয় দেশসমূহৰ পৰা বিশ্বৰ আন দেশলৈ পেট্ৰলিয়াম সামগ্ৰীৰ যোগান ব্যাহত কৰাৰ ভাবুকিও সৃষ্টি কৰিছে।
আজি প্ৰতি বেৰেলত ব্ৰেণ্ট খাৰুৱা তেলৰ মূল্য ৯৬.৬৫ ডলাৰত ব্যৱসায় আৰম্ভ হয়। ব্যৱসায় আৰম্ভ হোৱাৰ লগে লগে ইয়াৰ মূল্য কিছু সময়ৰ বাবে প্ৰতি বেৰেলত ৯৬.৫৮ ডলাৰলৈ হ্ৰাস পায় যদিও তাৰ পিছত পুনৰ উত্থান ঘটে। পুৱা ৯ বজাত ব্ৰেণ্ট খাৰুৱা তেলৰ মূল্য প্ৰতি বেৰেলত ৯৭.১৬ ডলাৰ। একেদৰে পশ্চিম টেক্সাছ ইণ্টাৰমিডিয়েট (ডব্লিউ টি আই) খাৰুৱা তেলৰ মূল্য প্ৰতি বেৰেলত ৯৪.৩৯ ডলাৰত ব্যৱসায় আৰম্ভ হয়। প্ৰথম অৱস্থাত ই কিছু সময়ৰ বাবে প্ৰতি বেৰেলত ৯৩.৪৫ ডলাৰলৈ হ্ৰাস পাইছিল, তাৰ পিছত সুস্থ হৈ উঠিছিল। পুৱা ৯:০০ বজাত ডব্লিউ টি আই খাৰুৱা তেলৰ মূল্য প্ৰতি বেৰেলত ৯৬.০৮ ডলাৰত ব্যৱসায় কৰিছিল ।
বিশেষজ্ঞসকলে কয় যে আমেৰিকা আৰু ইৰাণৰ মাজত যুদ্ধবিৰতিৰ ভৱিষ্যত অনিশ্চিত হৈ আছে। একেদৰে হৰমুজ জলদ্বীপৰ মাজেৰে তেল টেংকাৰৰ চলাচল কাৰ্যতঃ বন্ধ হৈ আছে। দুয়োখন দেশৰ মাজত চলি থকা শান্তি আলোচনাৰ ভৱিষ্যতও অনিশ্চিত হৈ আছে, যাৰ ফলত আন্তঃৰাষ্ট্ৰীয় বজাৰত খাৰুৱা তেলৰ মূল্যত প্ৰভাৱ পৰাৰ সম্ভাৱনা আছে।
বিশেষকৈ কুৱেইট আৰু বাহৰেইনত থকা আমেৰিকাৰ সামৰিক ঘাটিসমূহৰ বিৰুদ্ধে যোৱা নিশা ইৰাণৰ ক্ষেপণাস্ত্ৰ আক্ৰমণে উত্তেজনা পুনৰ বৃদ্ধি পোৱাৰ আশংকা সৃষ্টি কৰিছে। এই আশংকাৰ ফলত খাৰুৱা তেলৰ মূল্য বৃদ্ধিৰ ধাৰা। ইয়াৰ পূৰ্বে মে’ মাহত আন্তঃৰাষ্ট্ৰীয় বজাৰত খাৰুৱা তেলৰ মূল্য প্ৰতি বেৰেলত ৯০ ডলাৰৰ তললৈ নামি আহিছিল, যাৰ ফলত দুয়োখন দেশৰ মাজত আপোচৰ আশা আছিল। অৱশ্যে দুয়োখন দেশৰ মাজত আপোচ কৰাৰ কোনো সুনিৰ্দিষ্ট সম্ভাৱনা এতিয়াও নাই।
হিন্দুস্থান সমাচাৰ / মনোজ কুমাৰ শইকীয়া
