গুৱাহাটী, ০৩ জুন (হি.স.)। গুৱাহাটীৰ পৰা নিৰুদ্দেশ হোৱা চাৰিগৰাকী নাবালিকা ছাত্ৰীক নিৰাপদে উদ্ধাৰ কৰি বশিষ্ঠ আৰক্ষীয়ে এক বৃহৎ সফলতা অৰ্জন কৰিছে। গুৱাহাটীৰ বশিষ্ঠৰ পৰা নিৰুদ্দেশ হোৱা চাৰিগৰাকী স্কুলীয়া ছাত্ৰীক পশ্চিমবংগৰ হাওৰাত উদ্ধাৰ কৰা হৈছে। বেলতলা মাঝিপাৰা এম. ই. স্কুলৰ ছাত্ৰীকেইগৰাকী বিদ্যালয়লৈ গৈ উভতি নহাত পৰিয়ালৰ লোকে আৰক্ষীক অৱগত কৰিছিল ৷ অসম আৰু পশ্চিমবংগ আৰক্ষীৰ যৌথ তৎপৰতাত তেওঁলোকক উদ্ধাৰ কৰা হয় ৷
খবৰ অনুসৰি পহিলা জুন সোমবাৰে পুৱা আঠ বজাত বিদ্যালয়লৈ যোৱাৰ পথত সন্ধানহীন হয় ১১-১২ বছৰ বয়সৰ ষষ্ঠ আৰু সপ্তম শ্ৰেণীত অধ্যয়ন কৰা চাৰিগৰাকী ছাত্ৰী। তেওঁলোকৰ নাম ক্ৰমে ৰুমী বৰুৱা, নিৰুপায় ৰয়, আয়ুশ্ৰী সিং আৰু জিলমিল দৈমাৰী বুলি জানিব পৰা গৈছে ৷ এই ঘটনাই তেওঁলোকৰ পৰিয়ালৰ মাজত উদ্বেগ প্ৰকাশ কৰি লগে লগে আৰক্ষীয়ে তালাচী আৰম্ভ কৰে।
বশিষ্ঠ আৰক্ষীৰ ক্ষিপ্ৰ পদক্ষেপ আৰু সমন্বিত প্ৰচেষ্টাৰ বাবে ছাত্ৰ-ছাত্ৰীক বিচাৰি উলিয়াই হাওৰাৰ পৰা নিৰাপদে উদ্ধাৰ কৰা হয়। পৰৱৰ্তী সময়ত সকলোকে পৰিয়ালৰ ওচৰত গতাই দিয়া হয়।
আৰক্ষীয়ে বিষয়টোৰ তদন্ত কৰি ছাত্ৰ-ছাত্ৰীসকল কি পৰিস্থিতিত আহিছিল আৰু আন কোনো ব্যক্তি এই ঘটনাত জড়িত আছিল নে নাই সেইটো নিৰ্ণয় কৰাৰ চেষ্টা চলাইছে।
হিন্দুস্থান সমাচাৰ / মনোজ কুমাৰ শইকীয়া
