নতুন দিল্লী, ২৮ জুন (হি.স.)। ইংলেণ্ডত অনুষ্ঠিত হোৱা ২০২৬ চনৰ মহিলা টি-২০ বিশ্বকাপৰ পৰা বাহিৰ হৈছে ডিফেণ্ডিং চেম্পিয়ন নিউজিলেণ্ড। ইংলেণ্ডৰ বিৰুদ্ধে পৰাজয়ৰ পিছত তেওঁলোকৰ তাৰকা খেলুৱৈ ছফী ডেভিন, চুজি বেটছ আৰু লিয়া টাহুহুৰ আন্তঃৰাষ্ট্ৰীয় কেৰিয়াৰৰো অন্ত পৰিল। খেলুৱৈসকলে তেওঁলোকক ‘গাৰ্ড অৱ অনাৰ’ৰে বিদায় দিয়ে।
প্ৰতিযোগিতা আৰম্ভ হোৱাৰ পূৰ্বে তিনিওজন খেলুৱৈয়ে অৱসৰৰ কথা ঘোষণা কৰিছিল। ইতিমধ্যে তেওঁলোকে স্পষ্ট কৰি দিছিল যে ২০২৬ চনৰ জুন-জুলাইত অনুষ্ঠিত হ’বলগীয়া মহিলা টি-২০ বিশ্বকাপটোৱেই হ’ব তেওঁলোকৰ চূড়ান্ত আন্তঃৰাষ্ট্ৰীয় প্ৰতিযোগিতা।
মেচৰ পিছত নিউজিলেণ্ডৰ অধিনায়ক আমেলিয়া কেৰে কয়, বেটছ, ডেভাইন আৰু টাহুহুৰ বিদায় হয়তো আটাইতকৈ দুখৰ বিষয়। তিনিগৰাকী কিংবদন্তি খেলুৱৈয়ে আমাৰ পৰিৱেশ আৰু মহিলা ক্ৰিকেট এৰি গৈছে। এই দললৈ আগবঢ়োৱা অৱদানৰ বাবে তেওঁলোক সদায় স্মৰণীয় হৈ থাকিব।
কেৰে কয়, মই তেওঁলোকৰ পৰা ইমানখিনি শিকিলোঁ। যেতিয়া মই যুৱ খেলুৱৈ হিচাপে নিউজিলেণ্ডৰ মহিলা দলত যোগদান কৰিছিলো, তেতিয়া তেওঁলোক তিনিওজনেই তাত আছিল। তেওঁলোকে মোক গাইড কৰিছিল আৰু দলত আদৰণি জনাইছিল। এই যাত্ৰাৰ সময়ত মই তেওঁলোকৰ সৈতে সময় কটোৱাৰ সৌভাগ্য হৈছিল। তেওঁলোক তিনিওজনৰ সৈতে ড্ৰেছিং ৰুমত ইমান সময় কটোৱাৰ সুযোগ পোৱাৰ বাবে মই অতিশয় কৃতজ্ঞ অনুভৱ কৰিছো।
নিউজিলেণ্ডৰ ৩৬ বছৰীয়া ছফী ডেভিনে আন্তঃৰাষ্ট্ৰীয় কেৰিয়াৰত নিউজিলেণ্ডৰ হৈ মুঠ ৩১৭খন মেচ (১৫৯খন এদিনীয়া আৰু ১৫৮খন টি-২০) খেলিছিল। এই সময়ছোৱাত এদিনীয়াত ৪২৭৯ ৰান আৰু টি-২০ত ৩৮১৭ ৰান সংগ্ৰহ কৰে। ইয়াৰ লগতে দুয়োটা ফৰ্মেটতে মিলি মুঠ ২৪১টা উইকেট দখল কৰে।
কিউই দলৰ গুৰুত্বপূৰ্ণ বেগী বলাৰ লিয়া টাহুহুৱে ২০৭খন মেচত (১০৩খন এদিনীয়া আৰু ১০৪খন টি-২০) দলটোক প্ৰতিনিধিত্ব কৰি ২২৫টা উইকেট দখল কৰে। নিউজিলেণ্ডৰ হৈ ১৮৪খন এদিনীয়া আৰু ১৮৬খন টি-২০ মেচ খেলি চুজি বেটছে এদিনীয়াত ৫৯৮২ ৰান আৰু টি-২০ত ৪৭৫৮ ৰান সংগ্ৰহ কৰে।
মহিলা টি-২০ বিশ্বকাপ ২০২৬ৰ ২৮ সংখ্যক খেলত ইংলেণ্ডে নিউজিলেণ্ডক ৯ উইকেটত পৰাস্ত কৰে। কেনিংটন অ’ভেলত প্ৰথম বেটিং কৰি নিউজিলেণ্ডে ২০ অভাৰত ৬ উইকেটত ১৬৩ ৰান সংগ্ৰহ কৰে। ইয়াৰ প্ৰত্যুত্তৰত ইংলেণ্ডে ১৭.২ অভাৰত ১ উইকেটত ১৬৪ ৰান সংগ্ৰহ কৰি মেচখনত জয়লাভ কৰে।
--------------------
হিন্দুস্থান সমাচাৰ / অৰৱিন্দ
30 Jun 2026
